Axad, August, 05, 2018 (HOL) - Kaddib howlgal
ciidamada dowladda Soomaaliya ay ka sameeyeen qeybo ka mid ah magaalada
Muqdisho ayeey sheegeen mas’uuliyiinta maamulka gobolka Banaadir in lagu soo
qabtay sarkaal ka tirsan Ururka Al-shabaab.
Duqa Muqdisho Cabdiraxmaan Cumar Cisimaan
Yariisoow ayaa warbaahinta u sheegay in ciidamadu gacanta ku dhigeen horjooge
ka tirsan Al-shabaab oo ku dhuumaaleysanayay sida uu hadalka u dhigay degmada
Wadajir.
“Waxaan u mahadcelinayaa Shacabka Degmada Wadajir
oo gacan ka geystay in la soo qabto Horjooge ka tirsan argagixisada Alshabaab,
kaas oo doonayey in uu ku dhex dhuumaaleysto shacabka.”ayuu yiri guddoomiyaha
gobolka Banaadir.
Sidoo kale maamulka gobolka Banaadir ayaa soo
bandhigay hub isugu jiray walxaha qarxa iyo bastoolado oo sida ay sheegeen lagu
soo qabtay howlgal laga sameeyay qeybo ka mid ah caasimada,
Guddoomiye ku-xigeenka amniga iyo siyaasada
maamulka gobolka Banaadir Maxamed Cabdullaahi Tuulax ayaa sheegay in hubkan
lala soo qabtay ilaa 6 ruux oo mid ka mid ah haweeney tahay, kuwaa oo lagu
wareejiyay xarunta danbi baarista.
C/raxmaan Diini, Hiiraan
Online
[email protected]