Khamiis, June, 22, 2017 (HOL) – Dowladda Kenya ayaa sheegtay in ay gudaha
dalkeeda u tallaabeen dagaalyahano hubaysan oo ka tirsan Ururka
Al-shabaab.
Booliska dalka Kenya ayaa ku waramay in ilaa 30 dagaalyahan oo ka tirsan Ururka
Al-shabaab oo si aad ah u hubaysan ay ka tallaabeen xadka ay wadaagaan wadamada
Soomaaliya iyo Kenya.
Laamaha amniga dalka Kenya ayaa digniin u diray goobaha ay dadweynaha ku
kulmaan oo ay ka mid yihiin, kaniisadaha,waxaana ay sheegeen in dagaalyahanadan
ka tirsan Al-shababaab oo ku hubaysan hubka culus iyo midka fudud in ay
qorsheynayaan weeraro ay ka geystaan maalmaha Ciida.
Saraakiisha dowladda Kenya ayaa sidoo kale sheegay in ay bilaabeen hawlgallo
looga baadi goobayo Al-shabaab gudaha dalka Kenya.
Dowladda Kenya oo Soomaaliya ay ka joogaan ciidamo qeyb ka ah hawlgalka
AMISOM ayaa waxaa ay dagaal adag kula jirtaa Ururka Al-shabaab oo
dalkaasi marar badan oo hore ka fuliyay weeraro dad badan lagu dilay.
C/raxmaan Diini, Hiiraan Online
[email protected]
