10/15/2019
Today from Hiiraan Online:  _
Wararka Maanta- Isniin, May 27, 2013
Dagaal Ciidamada Dowladda Somalia, AMISOM iyo Xoogagga Al-shabaab ku dhexmray Duleedka Degmada Jowhar


Isniin, May 27, 2013 (HOL) — Ugu yaraan lix qof oo dhinacyadii dagaalamay ah ayaa ku dhintay dagaal culus oo ciidamada dowladda Soomaaliya, kuwa AMISOM iyo xoogagga Al-shaabaab ku dhexmaray duleedka waqooyi ee  degmada Jowhar.

Dagaalkan oo ka dhacay agagaarka garoonka diyaaradaha ee Jowhar ayaa qarxay kadidb markii dagaalyahanno taabacsan Al-shabaab ay weerareen saldhigyo ay ciidamada isbahaysanaya ku lahaayeen duleedka degmadaas.

“Saqdii dhexe ee xalay ayuu dagaal ka dhacay duleedka Jowhar meel ku dhow garoonka diyaaradaha, waxaana maqlaynay hugunka hubka ay is-weydaarsanayaan labada dhinac,” ayuu yiri Xuseen Cali oo ka mid ah dadka ku nool degmada Jowhar.

Wararka ayaa waxay sheegayaan in dhaawacyo badan ay dagaalkaas ka dhasheen kuwaasoo qaarkood la dhigay isbitaalka degmada Jowhar, iyadoo dagaalkan uu ka mid yahay dagaallada degmadaas ku dhexmara dhincyada iska soo horjeeda.

Degmada Jowhar oo dhinaca waqooyi kaga beegan Muqdisho 90-KM ayaa waxay ka mid ahayd degmooyinkii ay ciidamada dowladda iyo kuwa AMISOM kala wareegeen Al-shabaab sannadkii hore.

Xaaladda degmada oo xarun u ah gobolka Shabeellada dhexe ayaa maanta ahayd mid deggen inkastoo dadka degmadaas ku sugan ay hadal hayeen dagaalkii xalay ka dhacay agagaarka garoonka diyaaradaha Jowhar.

Inta badan gobolka Shabeellada Dhexe waxaa gacanta ku haysa Al-shabaab iyadoo ciidamada dowladda iyo kuwa AMISOM ay gobolkaas kaga sugan yihiin degmooyinka Jowhar iyo Balcad oo 30-km u jirta Muqdisho.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
5/27/2013 1:24 PM EST
Isniin, May 27, 2013 (HOL) — Ciidamada la-dagaalanka argagaxisada dalka Kenya ayaa maanta oo Isniin ah ku toogtay deegaan lagu magacaabo Kisauni oo ku yaalla duleedka magaalada xeebta leh ee Mombasa, waxaana iska hor-imaad dhexmaray ninkaas iyo booliiska ku dhaawacmay lab aka mid ah ciidamada Kenya.

5/27/2013 12:50 PM EST
Isniin, May 27, 2013 (HOL) — Wasiirka Wasaarada Arimaha Gudaha Somaliland, Maxamed Nuur Caraale(duur), ayaa maanta Xabsiga Dhexe ee Magaalada Boorame ka siidaayey Odayaal ka soo jeedda degmadda Xariirad oo illaa sideetan maalmood ugu xidhnaa dil ka dhacay degmadaasi, isla markaana odayaashan loo xidhay sidii ay soo qaban lahaayeen ninkii dilkaasi geystay.

5/27/2013 10:13 AM EST
Isniin, May 27, 2013 (HOL) — Xarunta CRD ee Muqdisho ayaa maanta tababar loogu soo xiray in ku dhow 30-shaqaale ah oo ka tirsan wasaaradda arrimaha gudaha iyo amniga Qaranka xukuumadda Soomaaliya, kuwaasoo loo tababaray fulinta howlaha wasaaradda, iyadoo la guddoonsiiyay shahaadooyin.

5/27/2013 10:05 AM EST
Isniin, May 27, 2013 (HOL) — Dowladda Soomaaliya ayaa sheegtay inay tayeyn doonto ciidamada dowladda ee ku sugan gobollada Jubbooyinka si ay deegaannada kale ee gobolkaas ug saaraan Xarakada Al-shabaab.

5/27/2013 9:58 AM EST
Isniin, May 27, 2013 (HOL) — Maamulka gobolka Banaadir ayaa Muqdisho ugu soo gabagabeeyay tababar xubno laga soo xulay degmooyinka Hodan, Howlwadaag, Wardhiigley iyo Yaaqshiid, kuwaasoo loo tababaray sidii ay u ilaalin lahaayeen hantida dadweynaha oo ay ka mid yihiin nalalka qoraxda ku shaqeeya oo dhawaan la suray jidka 30-ka ee Muqdisho.

5/27/2013 8:19 AM EST
Isniin, May 27, 2013 (HOL) — Maxkamad degmadda Hargeysa, ayaa shalay ka furantay dacwad ka dhan ah saddex qof oo Itoobiyaan ah oo lagu eedeeyey fasahaadin diimeed, kaas oo mudaddii u dambeeyey kiiskoodu ka socday maxkamadda.

5/27/2013 1:51 AM EST
Isniin, May 27, 2013 (HOL) — Madaxweynaha Soomaaliya Xasan Sheekh Maxamuud aya walaac ka muujiyay howlaha nabad ilaalineed ee ciidamada Kenya ay ku joogaan magaalada Kismaayo ee gobolka Jubbada Hoose, xilli ay dowladda Soomaaliya doonayso inay qabsato deegaannada kale ee ku yaalla gobolka Jubbada Hoose.

5/27/2013 1:49 AM EST
Isniin, May 27, 2013 (HOL) — Ciidamada booliiska Soomaaliya iyo kuwa AMISOM ayaa saakay howlgallo baaritaanno ah kawada xaafado ka tirsan degmada Wadajir ee gobolka Banaadir, iyagoo howlgalladaas ku qabqabtay dad fara badan.