10/20/2019
Today from Hiiraan Online:  _
Wararka Maanta- Isniin, May 27, 2013
Maamulka Gobolka Banaadir oo Tababar ku saabsan ilaailnta Hantida dadka kusoo gabagabeeyay Muqdisho (SAWIRRO)



Isniin, May 27, 2013 (HOL) — Maamulka gobolka Banaadir ayaa Muqdisho ugu soo gabagabeeyay tababar xubno laga soo xulay degmooyinka Hodan, Howlwadaag, Wardhiigley iyo Yaaqshiid, kuwaasoo loo tababaray sidii ay u ilaalin lahaayeen hantida dadweynaha oo ay ka mid yihiin nalalka qoraxda ku shaqeeya oo dhawaan la suray jidka 30-ka ee Muqdisho.

Tababarkan oo muddo saddex maalmood ah ka socday xarunta hay’adda CRD ee Muqdisho ayaa waxay dadkan ku qaateen casharro la xiriira sida ay u shaqeeyaan nalalka soollarka ku shaqeeya, iyadoo uu tababarka soo xiray guddoomiye ku xigeenk gobolka Banaadir, Imaan Nuur Iikar.

Agaasimaha CRD, Jabriil Ibraahim C/lle oo goobta ka hadlay ayaa sheegay in dadkan la baray habka ay u shaqeeyaan nalalka iyo macluumaad kale oo la xiriira sidii ay shacabka uga dhaadhicin lahaayeen in nalalka ay yihiin hanti ay iyagu leeyihiin oo ay ilaashadaan.

Guddoomiyaha maamulka degmooyinka ee gobolka Banaadir oo isaguna ka hadlay xiritaanka tababarka ayaa sheegay inay dadkan kasoo xuleen afar degmo ayna u soo xusheen inay yihiin kuwo dadka kale gaarsiin kara inay ilaashadaan hantidooda.

Imaan Nuur Iikar oo soo xiray tababarka ayaa dardaaran aad u dheer siiyay dadkii la tababaray isagoo sheegay inay maanta ku hayaan in nalalkan iyo mashaariic kale oo socota ay yihiin kuwo ay caalamku ugu deeqeen Somalia.

“Magaaladan innaga ayaa iska leh, gacmaheenna ayaan ku burburinnay, mar haddii dunidu ay diyaar u tahay inay dib u dhis noogu sameyso, waa inaan ka ilaashanno kuwa doonaya inay burburiyaan,” ayuu yiri guddoomiye ku xigeenka maamulka gobolka Banaadir.

Sidoo kale, guddoomiye ku xigeenku wuxuu sheegay in maamulka gobolka uu dadaal u galay sidii uu dunida u weydiisan lahaa in dib loo dhiso Muqdisho taasna ay ku guuleysteen.

“Caalamka markaan u tagno ma weydiisanno lacag ee waxaan weydiisannaa in dib u dhis lagu sameeyo Muqdisho, waayo waxaan ogaannay in nalalka ay nacfi weyn u leeyihiin bulshada,” ayuu hadalkiis ku daray.

Ugu dambeyn, wuxuu sheegay inay soo socdaan mashaariic fara badan oo la doonayo in dalka laga fuliyo, kuwaasoo ay lagu sameynayo canshuur dad kale laga soo qaaday, waxaana dalalka fulinaya ka mid ah Mareykanka iyo Turkiga.






Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
5/27/2013 1:24 PM EST
Isniin, May 27, 2013 (HOL) — Ciidamada la-dagaalanka argagaxisada dalka Kenya ayaa maanta oo Isniin ah ku toogtay deegaan lagu magacaabo Kisauni oo ku yaalla duleedka magaalada xeebta leh ee Mombasa, waxaana iska hor-imaad dhexmaray ninkaas iyo booliiska ku dhaawacmay lab aka mid ah ciidamada Kenya.

5/27/2013 1:02 PM EST
Isniin, May 27, 2013 (HOL) — Ugu yaraan lix qof oo dhinacyadii dagaalamay ah ayaa ku dhintay dagaal culus oo ciidamada dowladda Soomaaliya, kuwa AMISOM iyo xoogagga Al-shaabaab ku dhexmaray duleedka waqooyi ee degmada Jowhar.

5/27/2013 12:50 PM EST
Isniin, May 27, 2013 (HOL) — Wasiirka Wasaarada Arimaha Gudaha Somaliland, Maxamed Nuur Caraale(duur), ayaa maanta Xabsiga Dhexe ee Magaalada Boorame ka siidaayey Odayaal ka soo jeedda degmadda Xariirad oo illaa sideetan maalmood ugu xidhnaa dil ka dhacay degmadaasi, isla markaana odayaashan loo xidhay sidii ay soo qaban lahaayeen ninkii dilkaasi geystay.

5/27/2013 10:13 AM EST
Isniin, May 27, 2013 (HOL) — Xarunta CRD ee Muqdisho ayaa maanta tababar loogu soo xiray in ku dhow 30-shaqaale ah oo ka tirsan wasaaradda arrimaha gudaha iyo amniga Qaranka xukuumadda Soomaaliya, kuwaasoo loo tababaray fulinta howlaha wasaaradda, iyadoo la guddoonsiiyay shahaadooyin.

5/27/2013 10:05 AM EST
Isniin, May 27, 2013 (HOL) — Dowladda Soomaaliya ayaa sheegtay inay tayeyn doonto ciidamada dowladda ee ku sugan gobollada Jubbooyinka si ay deegaannada kale ee gobolkaas ug saaraan Xarakada Al-shabaab.

5/27/2013 8:19 AM EST
Isniin, May 27, 2013 (HOL) — Maxkamad degmadda Hargeysa, ayaa shalay ka furantay dacwad ka dhan ah saddex qof oo Itoobiyaan ah oo lagu eedeeyey fasahaadin diimeed, kaas oo mudaddii u dambeeyey kiiskoodu ka socday maxkamadda.

5/27/2013 1:51 AM EST
Isniin, May 27, 2013 (HOL) — Madaxweynaha Soomaaliya Xasan Sheekh Maxamuud aya walaac ka muujiyay howlaha nabad ilaalineed ee ciidamada Kenya ay ku joogaan magaalada Kismaayo ee gobolka Jubbada Hoose, xilli ay dowladda Soomaaliya doonayso inay qabsato deegaannada kale ee ku yaalla gobolka Jubbada Hoose.

5/27/2013 1:49 AM EST
Isniin, May 27, 2013 (HOL) — Ciidamada booliiska Soomaaliya iyo kuwa AMISOM ayaa saakay howlgallo baaritaanno ah kawada xaafado ka tirsan degmada Wadajir ee gobolka Banaadir, iyagoo howlgalladaas ku qabqabtay dad fara badan.