11/11/2019
Today from Hiiraan Online:  _
Wararka Maanta- Isniin, Jun 24, 2013
Boqolaal ka tirsan Saraakiisha Ciidanka xoogga dalka oo Tababar loogu soo Gagagabeeyay Magaalada Muqdisho (SAWIRRO)



Isniin, Juun 24, 2013 (HOL) — Saraakiishii ugu horreysay oo ka tirsan cidiamada xoogga dalka oo tiradoodu ahayd 880-askari ayaa tababar loogu soo xiray maanta xerada tababarka ciidamada ee Jaziira, iyagoo noqonaya kuwii ugu horreeyay oo tabbabar ku qaata gudaha dalka.

Xirtaanka tababarkan ayaa waxaa ka qaybgalay, ra’iisul wasaaraha Somalia, Cabdi Farax Shirdoon (Saacid), wasiirka gaashaandhigga, Cabdixakiin Xaaji Maxamuud Fiqi, wasiirka kheyraadka dalka, Cabdirisaq Cumar Maxamed  iyo wasiirka warfaafinta, Cabdullaahi Cilmooge Xirsi, iyadoo ciidamadan ay soo bandhigeen gaaddo-ka-ciyaarro kala duwan.

Taliyaha ciidanka xoogga dalka, Jen. Daahir Cilmi Aadan (Indha-qarsho) oo ka hadlay xafladda xirtaanka ayaa sheegay in ciidamadu ay ahmiyad weyn u leeyihiin wax ka qabashada ammaanka dalka.

“Ciidanka maanta tababarka loo xirayo waa ciidan markii aan xaraynaynay aad la isku weydiiyay halka aan ka helayno dhaqaalaha ku baxaya, waxaana sharaf u ah dowladda Soomaaliya, iyadoo kaashanaysa beesha caalamka in ay ciidmadan u dhameystirto tababar soconayay lix bilood ah, waxaana aad ugu kalsoonnahay in ciidamadan ay noqon doono kuwo ka xoreeya meelaha ay dalka uga harsan tahay Al-shabaab,” ayuu yiri Jen. Indho-qarsho.

Wasiirka gaashaandhiga, C/xakiin Xaaji Maxamuud Fiqi ayaa ku bogaadiyay sida mutawacnimada ah ee ay ciidmadan u dalbadeen inay ka mid noqdaan ciidamada dalkooda difaacaya, isagoo tilmamay in ciidamadan ay saldhiga u noqonayaan asaaska ciidamadan Qaranka Soomaaliyeed.

“Waa ciidankii ugu horreeyey ee dalka gudihiisa ay ku tababbaraan saraakiil Soomaaliyeed, waxaana makhraati ma doonta ah haddii aan isku tashano in aan wax qabsan karno, ciidankan waxay doorteen inay dalkooda & diintooda ka difaacaan cadowga, waana lagu abaal-marin doona,” ayuu yiri Fiqi.

Ra’iisul wasaaraha Soomaaliya oo isaguna goobta ka hadlay ayaa sheegay in ciidankaan sida ugu dhaqsaha badan loogu dhamaystirayo agabyadii ay ku howl-geli lahaayeen, si ay u gutaan waajibaadkooda shaqo.

“Ciidankan waxaa tababbarka loo furay markii xukuumadda la ansixiyay, waana wax  lagu farxo in muddo 23 sano ah kaddibd markii ugu horreysay ay ciidanka Qaranka ay tababaraan saraakiil Soomaaliyeed, tababbarkan waa wajigii koowaad, wayna sii socon doonaan, waxaana xukuumadda ka go’an in dhammaan ciidanka qalabka sida ay si joogta ah u helaan tababar iyo xuquuqaadkooda,” ayuu yiri ra’iisul wasaare Saacid ka sheegay xaflada xiritaanka tababarka.

Sidoo kale, wuxuu sheegay in siyaasadda dowladda ay mudnaanta koowaad siinayso daryeelka ciidanka, iyadoo golaha wasiirradu ay Khamiistii lasoo dhaafay magacabeen guddi ka shaqayn doona sidii wax looga qaban lahaa baahiyaha kala duwan ee haysta ciidanka qalabka sida.

Ugu danbayn, saraakiishii, wasiirradii iyo ra’iisal wasaaraha ayaa ciidanka la qadeeyey, iyagoo kala sheekeystay duruufaha ay ku tababarteen, waxaana arrinkaas qayb ka yahay dadaalka ay dowladdu ugu jiro sidii kor loogu qaadi lahaa moraalka ciidanka.

Ra’iisul wasaaraha ayaa u ballan-qaaday kooxda horseed oo duruufo dhanka nolosha ah ay ka muuqdeen in la siinayo lacag gaaraysa 30,000 oo doollar, isagoona ku tilmaamay in kooxdaani ay laf-dhabar u tahay guubaabinta ciidanka xoogga dalka.








Maxaxmed Xaaji Xuseen, Hiiraan Online
[email protected]
Muqdisho, Soomaaliya










Click here
6/24/2013 3:09 PM EST
Isniin, Juun 24, 2013 (HOL) — Sheekh Xasan Daahir Aweys oo sannadihii ugu dambeeyay ka mid ahaa saraakiisha Al-shabaab ayaa warar maanta soo baxay waxay sheegayaan inuu si qarsoodi ah uga baxsaday degmada Baraawe ee gobolka Shabeellada Hoose oo muddooyinkii ugu dambeeyay uu deggenaa.

6/24/2013 1:25 PM EST
Isniin, Juun 24, 2013 (HOL) — Boqor Cabdullaahi Boqor Muuse ayaa maanta ku geeriyoodey dalka Finland. Xaaladda caafimaad ee boqorka oo bilihii u dambeeyey aad u liidatey ayaa kasii dartay kaddib markii uu dhiigga maskaxdu istaagey, taasoo sabab u noqotay geeridiisa.

6/24/2013 1:11 PM EST
Isniin, Juun 24, 2013 (HOL) — Xaflad weyn oo ay ku qalin-jabinayeen arday Soomaaliyeed ee dhameystay wax-barasho Jaamacadeed ayaa lagu qabtay magaalada Hyderabad ee dalka Hindiya.

6/24/2013 11:27 AM EST
Isniin, Juun 24, 2013 (HOL) — Madaxweynaha Somaliland, Axmed Maxamed Siillaanyo, ayaa magacaabay guddi ka hor tagga tahriibka iyo hirgalinta shaqo abuur loo sameeyo dhalinyaradda.

6/24/2013 10:57 AM EST
Isniin, Juun 24, 2013 (HOL) — Baarlamaanka Soomaaliya ayaa joojiyay ka doodista sharciga xuquuqul aadanaha ee Soomaaliya, kaddib markii ay ka dalbadeen guddiga baarlamaanka u qaabilsan arrintan in dib loo dhigo tan iyo kal-fadhiga saddexaad ee baarlamaanka oo furmaya kaddib fasax ay dhawaan galayaan xildhibaannada.

6/24/2013 9:19 AM EST
Isniin, June 24, 2013 (HOL) - Madaxweynaha dalka Kenya Uhuru Kenyatta ayaa sheegay inuu awood u isticmaali doono maleeshiyaadka hubaysan ee ku dagaallamaya deegaanadda Mandheera iyo Wajeer hadii aanay hubkooda soo dhiibin.

6/24/2013 9:15 AM EST
Isniin, Juun 24, 2013 (HOL) — Prof Axmed Ismaaciil Samater ayaa markii uu soo dhamaystay socdaalkii uu goboladda ku marayey, xalay kulan balaadhan la yeeshay ardayda jaamcadda Hargeysa,kuwaas oo waydiiyey su’aalo aad u kulkullaa oo ku aadan mawqifkiisa madax banaanidda Somaliland uu ka qabo.

6/24/2013 8:53 AM EST
Isniin, June 24, 2013(HOL)—Xaflad si weyn loo soo agaasimay oo lagu abaalmarinayay dad wax fiican sameeyay oo ku nool dalka Sweden, gaar ahaan magaalada Borlänge ayaa lagu qabtay magaaladaas, iyadoo xafladdana ay ahayd mid ay ka qeybgaleen inta badan oo ka mid ah dadka ku nool magaaladaas.

6/24/2013 8:51 AM EST
Isniin, Juun 24, 2013 (HOL) — Guddidda la dagaalanka cudurka HIV/AIDS ee Somaliland, ayaa golaha Wakiiladda warbixin ka siiyey heerka uu cudurkaasi ka marayo Somaliland iyo sida looga baahan yahay in golaha Wakiiladdu qayb uga qaadan lahaayeen wacyigelinta bulshadda, isla markaana shacabka ula wacyigelin lahaa halista uu leeyahay cudurkan.

6/24/2013 8:42 AM EST
Isniin, Juun 24, 2013 (HOL) —Ra’iisul wasaaraha xukuumadda Soomaaliya, Cabdi Faarax Shirdoon (Saacid) ayaa maanta u magacaabay afhayeenka xafiiskiisa, Ridwaan Xaaji Cabdiweli oo ah waaya-arag dhanka warbaahinta ah.

6/24/2013 8:19 AM EST
Isniin, Juun 24, 2013 (HOL) — Xildhibaannada baarlamaanka Somalia ayaa maanta kulan ay ku yeesheen xaruntooda Muqdisho waxay kaga doodeen hidise sharciyeedka maal-gashiga dalka, iyagoo warbixin dheer ka dhageystay wasiirka ganacsiga iyo warshadaha xukuumadda Soomaaliya, Maxamuud Axmed Xasan.

6/24/2013 8:04 AM EST
Isniin, Juun 24, 2013 (HOL) — Kulan looga hadlay sida ururrada bulshada rayidka ah ay uga qaybqaadan lahaayeen dadaallada loogu jiro sidii lagu sugi lahaa ammaanka ayaa maanta lagu qabtay Muqdisho, iyadoo ay kasoo qaybgaleen odayaasha dhaqanka, nabadoonno, haween iyo dhallinyaro.

6/24/2013 5:44 AM EST
Isniin, Juun 24, 2013 (HOL) — AMISOM Siminaar socday afar maalmood ah u soo xirtay guddiga arrimaha gudaha iyo amniga Qaranka ee baarlamaanka Soomaaliya, kaasoo sare loogu aqaadayay aqoontooda la xiriira howlaha ay u hayaan baarlamaanka iyo bulshada Soomaaliyeed.

6/24/2013 5:33 AM EST
Isniin, Juun 24, 2013 (HOL) — Dowladda hoose ee magaalada Laascaanood ee gobolka Sool ayaa billaabay howlo lagu burburinayo dhismayaal laga sameeyay hareeraha waddooyinka magaaladaas.

6/24/2013 4:37 AM EST
Isniin, Juun 24, 2013 (HOL) — Kooxo hubeysan oo aan la garanayn ayaa xalay ku toogtay xaafadda Ceel-qalow ee degmada Wadajir mid ka mid ah shaqaalaha rayidka ah ee baarlamaanka Soomaaliya xilli uu gurigiisa kusii socday.

6/24/2013 4:25 AM EST
Isniin, June 24, 2013 (HOL) - Dagaal beeloodyo u dhexeeya qaar kamid ah beelaha dega gobolka Soomaalida Kenya ee waqooyi bari ayaa sababay inay socon waayaan gaariyaashii basaska ahaa ee qaadi jiray dadka isaga kala goosha deegaanada gobolka iyo caasimada dalka Kenya ee Nairobi.