8/8/2022
Today from Hiiraan Online:  _
Wararka Maanta- Khamiis, Sept 27, 2012
Madaxweynaha Soomaaliya oo sheegay in Xukuumadda lasoo dhisayo ay ka shaqeyn doono dib u dhiska dalka iyo Ammaanka
Khamiis, September 27, 2012 (HOL) — Madaxweynaha Soomaaliya, Xasan Sheekh Maxamuud oo taleefoonka la iska arko uga qaybgalay shir looga hadlayay arrimaha Soomaaliya oo xalay ka dhacay magaalada New York ee dalka Mareykanka ayaa sheegay inay ka shaqeyn doonaan afarta sano ee soo socota sugidda ammaanka iyo dib u dhiska dalka.

Xasan Sheekh ayaa khudbad uu shirkaas ka jeediyay ku sheegay in dowladda uu soo dhisi doono ra'iisul wasaaraha uu magacaabayaa ay noqon doonto mid karti iyo awood u leh inay dhaqaalaha dalka dib u soo noolayso, sidoo kalena ay ammaanka xoojiso.

"Waxan idiin sheegayaa inaan goosannahay inaan dhisno Soomaaliya cusub; taasna ay hadda billaabatay waana si xoojin doonnaa. Si diirran waa inaan ugu mahad-celiyo dhammaan urruradii iyo dalalkii Soomaaliya garab-taagnaa xilliyadii colaaduhu ay jireen, kuwaasoo ay ka mid yihiin: Qaramada Midoobay, Midowga Afrika, Midowga Yurub, Mareykanka, Jaamacadda Carabta iyo Ururka ay dalalka Islaamku ku mideysan yihiin." ayuu madaxweynuhu ku yiri khudbaddiisa.

Sidoo kale, madaxweynaha Soomaaliya, wuxuu sheegay in dhibaato muddo dheer ah kaddib la sameeyay jamhuuriyaddii saddexaad ee Soomaaliya, isagoo xusay inuu ballanqaadayo in dowladda uu hoggaaminayo ay noqoto mid howsheeda u billowda hab cusub oo billow ah.

"Ra'iisul wasaaraha aan dhawaan soo magacaabi doono wauxuu hoggaamin doonaa dowlad federaali ah oo karti leh taasoo leh hay'ado shaqeeya oo soo nooleeeya dhaqaalaha dalka iyo bulshada, keenana nabadgalyo iyo dib u hagaajin oo wax walba ku dhameysa wadahadal kuna shaqeysa cadaalad iyo sharci," ayuu yiri Xasan Sheekh Maxamuud.

Ugu dammbeyn, madaxweynaha Soomaaliya wuxuu ka dalbaday beesha caalamka in gargaarka ay Soomaaliya  ugu talogaleen uu noqdo mid toos ah oo aan lasoo marin hay'ado kale, isagoo sheegay in Soomaaliya ay iyadu awooddo in dhaqalaaha loogu talogalay ay maamulato.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
9/27/2012 9:26 AM EST
Khamiis, September 27, 2012 (HOL) — Ugu yaraan afar qof oo ay ku jirto haweeney ka ganacsata caanaha ayaa ku dhaawacmay qarax ka dhashay bam gacmeed lagu weeraray gaari ay wateen ciidamada dowladda Soomaaliya oo marayay isgoyska KM-4 ee Muqdisho oo ah mid aad u mashquul badan.

9/27/2012 9:04 AM EST
Khamiis, September 27, 2012 (HOL) — Wasiirka Waxbarashadda iyo Tacliinta Sare ee Somaliland marwo: Samsam Cabdi Aadan, ayaa maanta si rasmi ah ugu dhawaaqay natiijadii imtixaanka shahaadiga ah ee dugsiyadda sare iyo kuwa dhexe/hoose.

9/27/2012 8:21 AM EST
Khamiis, September 27, 2012 (HOL) — Hay'adda nabadsugidda dowladda Federaalka Soomaaliya ayaa maanta soo bandhigtay 80 qof oo dhallinyaro ah, kuwaasoo lagu soo qabqabtay howgallo laga sameeyay degmooyinka Muqdisho 24-kii saac ee ugu dambeeyay.

9/27/2012 8:00 AM EST
Khamiis, September 27, 2012 (HOL) — Taliyaha ciidamada Jabuuti ee qeybta ka ah howlgalka midowgga Afrikaa ee dhawaan gaaray magaalada Baladweyne, Col. Cismaan Dubad ayaa baaq u dirray dhalinyarrada ka tirsan Xarrakada Al-shabaab.

9/27/2012 7:55 AM EST
Khamiis, September 27, 2012 (HOL) — Wararka laga helayo magaalada Gaalkacyo ee gobolka Mudug ayaa sheegaya in laba mid ah saraakiishii ururka Xisbul Islaam la qabtay shalay xilli ay ka dhoofayeen garoonka diyaaradaha ee Gaalkacyo, inkastoo wadahadallo dheer kaddib lasii daayay maanta.

9/27/2012 3:56 AM EST
Khamiis, September 27, 2012 (HOL) — Maamulka gobolka Hiiraan ayaa sheegay in ay wadaa qorsheyaal la doonayo in lagu xaqiijiyo amniga magaalada Baladweyne ee xarunta gobolka Hiiraan.

9/27/2012 3:53 AM EST
Khamiis, September 27, 2012 (HOL) — Xoghayaha guud ee Qaramada Midoobay, Ban Ki-Moon ayaa ammaanay horumarka dhinaca dimuqraadiyadda ah ee ay ku tallaabsatay Soomaaliya, isagoo beesha caalamka ugu yeeray inay sii wadaan gargaarkii ay siin jireen Soomaaliya.

9/27/2012 3:24 AM EST
Khamiis, September 27, 2012 (HOL) — Taliyaha booliiska gobolka Bay, Col. Mahad C/raxmaan ayaa saxaafadda u sheegay in dagaalyahanno ka tirsan Al-shabaab oo lagu helay dambiyadii lagu soo eedeeyay ay maxkamadda ciidamada qalabsida faraceeda Baydhab ay ku ridday xukunno kala duwan.

9/27/2012 3:13 AM EST
Khamiis, September 27, 2012 (HOL) — Wasiirka arrimaha gudaha Somaliland, Maxamed Nuur Caraale (Duur), ayaa maanta hortagay guddi hoosaadka Arrimaha gudaha iyo nabadgalyadda golaha Wakiiladda, kuwaas oo wax ka waydiiyey xaaladda amniga ee dalka, cafiskii uu u fidiyey dhalinyaradda Al-shabaab iyo inuu ka tirsan yahay ururka islaamiga ah ee Islaax.