8/14/2022
Today from Hiiraan Online:  _
Wararka Maanta- Sabti, Oct 6 , 2012
Hay'adaha Ammaanka Dowladda Federaalka Soomaaliya oo soo saaray Amarro lagu adkeynayo Ammaanka Muqdisho
Sabti, Oktoobar 06, 2012 (HOL) — Saraakiisha hay'adaha ammaanka Soomaaliya oo ku yeeshay Muqdisho kulan ay go'aanno ammaanka lagu adkeynayo kasoo saareen ayaa sheegay inaan hub lagu dhex-qaadan karin magaalada Muqdisho, iyagoo sheegay in ciddii rasaas ku ridda magaalada dhexdeeda laga qaadi doono tallaabo sharci ah.

Wasiirka Gaashaandhiga ee xukuumadda waqtigeedu dhammaaday, Xuseen Carab Ciise ayaa sheegay in kulankaas ay kasoo baxeen qodobbo muhiim ah, isagoo xusay inuu yahay mid looga tashanayay sidii ammaanka caasimadda Soomaaliya lagu adkeyn lahaa.

"Qorshu wuxuu yahay in ammaanka Muqdisho la adkeeyo, waxaana ku baaqaynaa in hub aan lagu dhexqaadan karin magaalada," ayuu yiri wasiirka difaaca oo intaas ku daray in askarigii ama qofkii rasaas ku fura magaalada dhexdeeda sharciga la marin doon.

Xuseen Carab, ayaa sidoo kale sheegay inaan la sameyn karin dabaal-degyo iyo in rasaas aan si macno-darro ah loogu ridin karin gudaha magaalada, isagoo shacabka ka dalbaday inay gacan ka siiyaan ciidamada dowladda sidii lagu qaban lahaa cid walba oo caqabad ku ah ammaanka.

Wasiirka arrimaha gudaha ee waqtigiisu dhammaadka yahay Cabdisamad Macallin Maxamuud ayaa ayaa sheegay in ciidamada dowladda ay habeen iyo maalin ka shaqeynayaan sidii ammaanka lagu xaqiijin lahaa, isagoo tilmaamay in maanta wixii ka dambeeyay ay billaaban doonaan howl-galo cusub.

"Maanta wixii ka dambeeya waxaa billaaban doona howgallo cusub, ciidamaduna waxay sameyn doonaan maalmaha soo socda howgallo dheeraad ah, kuwaasoo ay ugu muhiimsan yihiin inay ka hortagaan hubka sida sharci-darrada ah loogu dhex-wato magaalada iyo xabadaha sida aan macnaha lahayn loogu rido magaalada dhexdeeda," ayuu yiri wasiirka ammaanka Qaranka.

Taliyaha ciidamada xoogga, Jen. Cabdulqaadir Sheekh Cali Diini oo isaguna hadlay ayaa sheeagy in haddii uusan ammaan jirin aanu horumar jirin, isagoo intaas ku daray in ciidamada iyo shacabka looga baahan yahay in wada-shaqeyn dhex-marto.

"Ammaan hadduusan jirin horumarna ma jiro; waxbarasho ma jiro; nasasho ma jirto, dalxiis ma jiro, cibaadadana lama gudan karo. Si ammaanka loo sugo waxaa loo baahan yahay in shacabka ay gacan siiyaan ciidamada dowladda," ayuu Jen. Diini u sheegay warfidiyeenka.

Sidoo kale, taliyaha ciidanka booliiska Soomaaliya, Jen. Shariif Sheekhunaa Maye oo isaguna saxaafadda la hadlay ayaa sheegay in qaladaad dhinaca ammaanka ah ay mararka qaar ka dhacaan Muqdisho, isagoo xusay inaan la ogolaan doonin baabuur aan taargo ama sumad lahayn oo magaalada dhex-maraya, ciidamaduna ay diyaar u yihiin inay tallaabo ka qaadaan.

Ugu dambeyn, hay'adaha ammaanka dowladda Soomaaliya waxay NOG-yada iyo hay'adaha gargaarka ee ka howgala Muqdisho ugu baaqeen inaysan hubkooda lasoo dhexgelin magaalada; sidoo kalena aan lagu dhexqaadan karin magaalada hub aan diiwaan-gashanayn.

Hadalka saraakiisha dowladda Soomaaliya ayaa wuxuu imaanayaa iyadoo magaalada Muqdisho ay ka jireen maalmihii lasoo dhaafay howlgallo lagu sugayay ammaanka, iyadoo sidoo kalena ay magaalada ka dhaceen toddobaadyadii lasoo dhaafay dhowr qarax iyo dilal qorsheysan oo ay ku dhinteen in ka badan konton qof.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
10/6/2012 11:22 AM EST
Sabti, Oktoobar 06, 2012(HOL): Madaxweynaha Dowladda Soomaaliya Xasan Shiikh Maxamuud ayaa goor dhaweyd soo magacaabay Ra'iisal Wasaaraha Xukuumadda Soomaaliya, kaasi oo muddo bil ku dhow soo magacaabiddiisa laga sugayay.

10/6/2012 9:30 AM EST
Sabti, Oktoobar 06, 2012 (HOL) — Xildhibaanada baarlamanaka Soomaaliya iyo odayaasha dhaqanka Soomaaliyeed ayaa maanta kulan ku yeeshay Muqdisho, kaasoo ay talooyin ku wadaageen, iyadoo kulankan uu noqonayo kii ugu horreeyay oo dhexmara xildhibaannada baarlamaanka iyo odayaasha dhaqanka ee soo xulay.

10/6/2012 9:17 AM EST
Sabti, Oktoobar 06, 2012 (HOL) — Ruux waxyaabaha qarxa ay ku xiran yihiin ayaa weerar ismiidaamin ah ku qaaday maanta koontarool ay ciidamada dowladdu ay ku leeyihiin isgoyska Baar Ismaaciil ee degmada Afgooye, iyadoo warar kala duwan ay kasoo baxayaan khasaaraha ka dhashay weerarkaas ismiidaaminta ah.

10/6/2012 8:44 AM EST
Sabti, Oktoobar 06, 2012 (HOL) — Askari ka tirsan ciidamada maamulka gobollka Hiiraan ayaa geeriyooday mid kalana dhaawac ayaa soo gaaray kadib markii uu rasaas ku furay mid ka mid ah ciidamada dowladda Itoobiya ee ku sugan magaalada Baladweyne.

10/6/2012 8:34 AM EST
Sabti, Oktoobar 06, 2012 (HOL) — Maamulka Puntland ayaa maanta oo Sabti ah albaabbada isugu dhuftay idaacadda Horseed oo ka mid ah idaacadaha ka howgala deegaannada Puntland, kaddib markii lagu eedeeyay inay ka hadashay arrimo uu horay u mamnuucay maamulkaas in laga hadlo.

10/6/2012 5:53 AM EST
Jimco, Oktoober, 05, 2012 (HOL) – Iyadoo wali ay jirto gurmadka loo fidinayo dadkii ku barakacay Fatahaadii dhawaan ku dhuftay magaalada Baladweyne ee xarunta gobollka Hiiraan, ayaa waxaa deeq soo gaarsiiyay dadkii ay dhibaatadu ka soo gaartay Fatahaada Jaaliyada Bermingham ee dalka Britian.

10/6/2012 4:58 AM EST
Sabti, Oktoobar 06, 2012 (HOL) — xukuumadda dalka Kenya ayaa sheegtay inay la shaqeynayso maamul walba oo loo sameeyo Jubbooyinka, gaar ahaan magaalada Kismaayo oo uu ka taagan yahay muran ku saabsan cidda maamul u sameynaysa.

10/6/2012 4:43 AM EST
Sabti, Oktoobar 06, 2012 (HOL) — Madaxweynaha dowladda Soomaaliya, Xasan Sheekh Maxamuud ayaa lagu wadaa inuu maanta oo Sabti ah magacaabo ra'iisul wasaaraha cusub ee Soomaaliya, iyadoo xilliga uu u haysto inuu ra'iisul wasaare magacaabo ay dhowr cisho ka dhiman tahay.

10/6/2012 4:30 AM EST
Sabti, Oktoobar 06, 2012 (HOL) — Boqollaal qoys oo hore uga barakacday magaalada Kismaayo ayaa bilaabay in ay dib ugu soo noqdaan guryahooda, waxaana soo laabashada dadkani siweyn looga dareemaya magaalada.