11/16/2018
Today from Hiiraan Online:  _
Wararka Maanta- Khamiis, May 3 , 2012
Dowladda KMG Soomaaliya oo sheegtay inaan Muqdisho lagu qaban karin shir aan lagu Wargelin Wasaaradda Arrimaha Gudaha


Khamiis, May 03, 2012 (HOL) — Dowladda KMG ah ee Soomaaliya ayaa sheegtay in aan Muqdisho lagu qaban karin shirar aan lagu soo wargelin wasaaradda arrimaha gudaha iyo ammaanka Qaranka ee dowladda KMG ah ee Soomaaliya.

Wasiirka arrimaha gudaha iyo ammaanka Qaranka, C/samad Maxamuud Xasan ayaa hadal ku sheegay wareysi uu siiyay VOA-da isagoo sheegay in amarkan uu yahay mid daba socda amar ay horay u soo saareen.

"Wasaaraddu horay ayay u soo saartay goaan ku saabsan inaan Muqdisho lagu qaban karin shirar aysan ka warhayn wasaaradda, taasoo aan uga gol leennahay sidii ammaanka dadka loo ilaalin lahaa, balse ma ahan mid lagu caburiyo dadka shirarka qabsanaya," ayuu yiri wasiirka arrimaha gudaha.

Sidoo kale, wasiirku ma sheegin tallaabada ay ka qaadi doonaan ciddii shir aanay ka warhayn wasaaradda ku qabta Muqdisho, iyadoo amarkii midkan ka horreeyay aanu ka hirgelin magaalada Muqdisho.

Hadalka wasiirka ayaa wuxuu imaanayaa xilli ay kusoo badanayaan Muqdihso shirar looga horjeeda dastuurka cusub ee Soomaaliya iyo habka uu ku socdo hannaanka dhaqangelinta heshiiska looga baxayo xilliga KMG ah ee Roadmap-ka.

Xukuumadda KMG ah ee ayaa waxay dhowr jeer ku celisay inay ka go'an tahay in dastuurka la ansixiyo sidoo kalena xilliga KMG ah lagu soo gabagabeeyo waqtigii lagu heshiiyay oo ah bisha Ogoosto ee sannadkan.

Dhanka kale, wasiirka arrimaha gudaha wuxuu sheegay inay socdaan dadaallo lagu adkeynayo ammaanka Muqdisho, maadaama uu soo dhow yahay xilligii uu qabsoomi lahaa shirka ansixinta dastuurka KMG ah oo lagu wado in codka loo qaado 15-ka bishan May.

Inkastoo wasiirku uu sheegay inay adag tahay sidii looga hortegi lahaa qof doonaya inuu is-qarxiyo balse ay iyagu xoogga saari doonaan sidii looga hortagi lahaa wax walba oo ammaanka wax u dhimaya.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/3/2012 12:42 PM EST
Khamiis, May 03, 2012(HOL): Xaflad si aad u heer sarraysa loo soo agaasimay laguna soo dhawaynayey Cayaaryahanaddii weyneyd ee kooxda Muqdisho, iyo Xulka Qranka K/Kolayga soomaaliyeed Luul Cusmaan Sabriye ayaa lagu qabtay Magaalada Stockholm ee caasimadda dalka Sweden.

5/3/2012 9:29 AM EST
Khamiis, May 03, 2012 (HOL) — Wasiirka arrimaha gudaha iyo ammaanka Qaranka DKMG ah ee Soomaaliya, C/samad Macallin Maxamuud ayaa maanta si rasmi ah xariga uga jaray barnaamijka xasilinta Muqdisho oo ay iska kaashanayaan hay’adda Mareykanka u qaabilsan horumarinta caalamiga (USAID) iyo hay’adda Ingiriiska (UK) u qaabilsan horumarinta dibadda (DFID), iyadoo barnaamijkan lagu taageerayo $9.5 malyuun oo ah deeq ka timid dowladaha Mareykanka iyo UK.

5/3/2012 9:16 AM EST
Khamiis, May 03, 2012 (HOL) — Ra’iisul wasaaraha Soomaaliya, Cabdiweli Maxamed Cali ayaa maanta kulan la qaatay qeybaha kala duwan ee bulshadda Soomaliyeed; sida ururada, xubno ka tirsan culumaa’udiinka Ahlusunna iyo dhalinyaradda.

5/3/2012 8:57 AM EST
Khamiis, May 03, 2012 (HOL) — Hay'adaha samofalka ee HARO iyo WAMY ayaa ugu qaybiyay maanta oo Khamiis ah ugu qaybiyay Muqdihso 450-qoys oo barakacayaal ah gargaar isugu jiray dhar, raashin iyo caano-boore.

5/3/2012 8:42 AM EST
Khamiis, May 03, 2012 (HOL) — Guddidda Diiwaangelinta ururadda Siyaasadda iyo ansixinta axsaabta Somaliland, ayaa sheegay sagaalka urur ee qiimeynta ku hadhay in aanay buuxin shuruudihii laga rabay,isla markaana ay ka xun yihiin eeddaha ay usoo jeediyeen ururadaasi hadhay.

5/3/2012 8:39 AM EST
Khamiis, May 03, 2012 (HOL) — Xukuumadda Soomaaliya ayaa waxay waddaa qorshe ay isugu diyaarinayso inay xukunka ku wareejiso dowlad lasoo doortay marka la gaaro bisha Ogoosto ee sannadkan, markaasoo ay dhammaanayso xilliga dowladda KMG ah ay shaqeynayso.

5/3/2012 8:01 AM EST
Khamiis, May 03, 2012 (HOL) — Kulankan oo lagu qabtay hotel Saxafi ee Muqdisho ayaa waxaa kasoo qaybgalay waxgarad, suldaanno, dhallinyaro isugu jiray gabdho iyo wiilal iyo dad waayeel ah, waxaana looga hadlayay xoojinta nabadda iyo sidii ay Soomaaliya ku heli lahayd nabad.

5/3/2012 7:18 AM EST
Khamiis, May 03, 2012 (HOL) — Maalinta xoriyatul qawlka aduunka ayaa si weyn loogu xusay magaaladda Hargeysa ee Somaliland, kaas oo ay ka soo qaybgaleen suxufiyiinta ka hawlgalla magaaladda Hargeysa iyo masuuliyiin ka tirsan xukuumadda iyo xisbiga muxaafadka ah ee KULMIYE.

5/3/2012 7:16 AM EST
Khamiis, May 03, 2012 (HOL) — Ciidamada dowladda KMG ah ee Soomaaliya ayaa maanta is-hortaag ku sameysay shir ay Muqdihso ku yeelan lahaayeen siyaasiyiin iyo xildhibaanno kasoo horjeeda dowladda KMG ah, kuwaasoo uu ku jiray Sheekh Yuusuf Maxamed Siyaad (Indha-cadde).

5/3/2012 1:38 AM EST
Khamiis, May 03, 2012 (HOL) — Kooxo hubeysan ayaa xalay ku toogtay xaafadda garsoor ee waqooyiga degmada Gaalkacyo ee gobolka Mudug suxufi u shaqeynayay idaacadda Daljir oo lagu magacaabi jiray, Farxaan Jeemis Cabdulle xilli uu ka tagay goobtiisa shaqo uuna kusii socday gurigiisa.

5/3/2012 1:29 AM EST
Khamiis, May 03, 2012 (HOL) — Xoogagga Xarakada Al-shabaab ayaa la wareegay gacan ku haynta deegaanka Goobo oo ka tirsan degmada Maxaas ee gobolka Hiiraan gallinkii dambe ee shalay kaddib dagaal muddo kooban socday oo tuuladaas ku dhexmaray xoogagga Al-shabaab iyo kuwa Ahlusunna oo halkaas ku sugnaa.