3/28/2024
Today from Hiiraan Online:  _
Wararka Maanta- Sabti, Jun 9 , 2012
Cunto bisil oo la siinayo Haweenka iyo Caruurta Jilicsan oo laga billaabay Qaybo ka mid ah Magaalada Baladweyne


Sabti, June 09, 2012 (HOL) — Magaalada Beledweyne ee xarunta gobolka Hiiraan ayaa waxaa bilihii ugu dambeeyayba ka jiray ugu yaraan isku-day ay doonayaan hay’addaha samafalka ee ka howlgala Beledweyne in ay ku caawiyaan dadka jilicsan gaar ahaan caruurta iyo haweenka aan mudada dheer helin gargaarkii ay u baahnaayeen.

Hay’adda ICRC oo ka mid ah hay’addaha durbaba ka bilaawday magaalada iyo deegannada ku dhaw dhaw howlaha lagu gargaarayo dadka dhibaateysan, ayaa sidoo kale markii ugu horeysay magaalada Beledweyne ka bilaawday howl quudin ah oo raashin bisil lagu siinayo caruurta miisaankoodu hooseeyo iyo haweenka jilicsan, iyaga oo u sii marinaya gargaarka noocaas ah NGO-ga lagu magacaabo Daryeel Bulsho.

Goobta raashinkan lagu bixiyo ayaa mar aynu booqanay waxaa kula kulannay dad isugu jira haween iyo caruur halkaa ka qaadanaya raashin bisil oo u badan ‘’Mishaari’’ ka kooban raashin isku dhaf ah oo dib u soo celinaya miisaanka caruurta iyo haweenka la liita nafaqo darrada.


Mas’uuliyiinta xarunta Daryeel Bulsho qaarkood ayaa HOL u sheegay in mudo sadax bilood ah ay wadaan howshan lagu quudanayo dadka u baahan, waxaana ay intaa ku darreen in mudadii sadaxda biloow aheyd oo ay howshan ku guda jireen wax weyn oo isabadal ah ka dareemeen haweenka iyo caruurta goobta ka qaata cunada bisil.

Dadka gargaarka ka faa’ideysta ayaa isugu jira dad barakacayaal ah oo horay u degnaa xeryaha ku hareereysan Beledweyne iyo kuwa ku dul saar ku ah qoysas kale kadib markii ay ka soo dhamaadeen xoolihii ay miyiga ku dhaqanayeen.

"Haa subaxa hore ayaa imanaa halkan, mudo sadax biloow ah ayaan imaaneynaa aniga iyo curuurteyda, waan u mahad-celineynaa dadka noo sameeyay xaruntan, waxaana jeclaan laheyn in la sii balaariyo oo gargaarka intaa laga sii badiyo ayeey tiri,’’ mid ka mid haweenka halkaa caruurteeda uga qaada raashinka.

Mas’uuliyiinta NGO-ga Daryeel Bulsho ayaa ugu baaqay hay’addaha samafalka in ay gargaaraan dadka dhibaateysan, gaar ahaan waxaa ay ugu baaqeen hay’adda ICRC oo howshan bilawday in ay sii labo jibaarto, si ay uga faa’ideystaan dad intan ka badan.


C/raxmaan Diini, Hiiraan Online
[email protected]
Beledweyne, Soomaaliya













Click here
6/9/2012 8:00 AM EST
Sabti, June 09, 2012 (HOL) — Wasiir ku xigeenka wasaaradda gaadiidka cirka, dhulka iyo dekedaha dowladda KMG ah ee Soomaaliya, Cabdiraxmaan Kulmiye Xirsi (C/raxmaan Dheere) ayaa sheegay in muddo kooban lagu xiray magaalada Berbera ee Somaliland ayna si xun ula dhaqmeen maamulka garoonka diyaaradaha iyo ciidamadii xiray.

6/9/2012 6:58 AM EST
Sabti, June 09, 2012 (HOL) — Ciidammo Itoobiyaan ah oo wata gaadiid dagaal oo fara badan ayaa maanta soo buuxiyay degmada Luuq ee gobolka Gedo, halkaas oo ay gacanta ku hayaan ciidamada dowladda Soomaaliya.

6/9/2012 6:38 AM EST
Sabti, June 09, 2012 (HOL) — Kulankan oo lagu taageerayey shirkii dhawaan lagu qabtay dalka Turkiga ee looga arinsanayey aayaha Soomaaliya, ayaa waxaa ka soo qeybgalay kala dad kala duwan oo isugu jira aqoon-yahano, siyaasin, cuqaal iyo waliba qeybaha ee bulshada Soomaalida ah ee ku dhaqan gobolka Minnesota.

6/9/2012 6:35 AM EST
Sabti, June 09, 2012 (HOL) — Iska-horimaadkan ayaa yimid kaddib markii xoogag ka tirsan Al-shabaab ay saaka weerareen fariisimo ay ciidamada dowladda KMG, kuwa Raaskaambooni iyo ciidamada Kenya ay ku lahaayeen duleedka degmada Afmadow ee gobolka Jubbada Hoose.

6/9/2012 3:55 AM EST
Sabti, June 09, 2012 (HOL) — Afhayeenka dagaalyahannada taageersan DKMG ah ee Raaskambooni, Cabdinaasir Seeraar Maax ayaa sheegay in xoogaggooda oo gacan ka helaya ciidamada dowladda KMG ah iyo kuwa Kenya oo ka tirsan AMISOM ay ku dhow yihiin magaalada Kismaayo ee xarunta gobolka Jubbada hoose.

6/9/2012 3:34 AM EST
Sabti, June 09, 2012 (HOL) — Xaaladda caafimaad ee wariye Maxamed Shariif oo ka mid ah wariyeyaasha u shaqeeya idaacadda Bar-Kulan oo xalay lagu dhaawacay Muqdisho ayaa soo wanaagsaneysa.

6/9/2012 3:22 AM EST
Sabti, June 09, 2012 (HOL) — Maxamed Cumar Xabeeb (Maxamed Dheere) oo soo qabtay xilka guddoomiyaha gobolka Banaadir iyo duqa Muqdisho ayaa lacagihii la dul-dhigay saraakiisha Al-shabaab ku sheegay inuu soo dhaweynayo; isagoo ku tilmaamay mid guul u ah Soomaaliya iyo calaamka oo dhan.

6/9/2012 3:19 AM EST
Sabti, June 09, 2012 (HOL) — Sheekh Fu'aad Maxamed Khalaf (Shan-gole) oo ka mid ahaa toddoba xubnood oo hoggaanka Al-shabaab ka tirsan ee Mareykanku uu sheegay inuu malaayiin dollar ku bixinayo xogtooda ayaa hadlalkaas ka jawaabay, isagoo sheegay in iyaguna ay xoolo nool ku bixniayaan xogta ku saabsan madaxda Mareykanka.