3/19/2024
Today from Hiiraan Online:  _
Wararka Maanta- Arbaco, Jun 6 , 2012
Soomaalida ku nool South Africa oo Shahaadooyin Guddoonsiiyey Dhakhaatiir Koonfur Afrikaan ah Kalkaaliso Soomaaliyeed

Arbaco, June 06, 2012 (HOL) — Dalka Koonfur Afrika oo ay kumannaan Soomaali ah ay ku nool yihiin ayaa waxaa marba marka kasii dambeysa sii kordhaya xiriirka iyo isdhex-galka ay la yeelanayaan dadka dalkaas u dhashay.

Tallaabada horumarka leh ee ay Soomaalida Koonfur Afrika qaaday ayaa waxaa hormuud u ah dhallinyarada Soomaaliyeed ee aqoonta leh, isla markaana wax ka baratay dalkaas, kuwaasoo hadda bilaabay inay daboolaan baahida qaxootiga Soomaaliyeed qaasatan dhinaca Caafimaadka.

Fatxi Cabdikariin waa gabar Soomaaliyeed oo da'yar, waxay ka hawlgashaa xarun-caafimaad oo ku taalla magaalo-xeebeedda Cape-town, gaar ahaan xaafadda ay Soomaalida ku badan tahay ee Bellville, Fatxi shaqadeeda waa caawinta qof kasta oo bukaan ah; gaar ahaan Soomaalida oo ay ka gacan siiso dhanka Caafimaadka iyo tarjumaanad luuqadda.

Kalkaalisadan ayaa waxay ka howlgashaa rugta caafimaadka ee City-kem iyadoo la guddoonsiiyay shahaado sharaf ay wax-qabadkeeda ku muteysatay, taasoo golaha fidinta dacwada Islaamiga Soomaaliyeed ee Al-Bayaan uu bixiyay, iyadoo bahda Al-Bayaan sidoo kale shahaado taas la mid ah siiyeen madaxda rugta caafimaadka ee City-kem.

Sheekh Xuseen Shibbis oo xubin firfircoon ka ah golaha dacwada Al-Bayaan ayaa isagoo wakiil ka ah guddoomiyaha guud ee Al-Bayaan, Sheekh Xasan Guure, wuxuu shahaadooyinka ku wareejiyay kalkaalisada Soomaaliyeed ee Fatxi Cabdiraxmaan, Mr. C. Herman iyo Mr. Sher oo ka mid ah dhaqaatiirta rugtaas ka howlgala ee aadka u caawiya Soomaalida, waxaa iyaguna ay si xushamd leh ugu mahadceliyeen jaaliyadda Soomaaliyeed ee ku nool Koonfur Afrika.

Cumar Caweyste oo ka mid ah hor-joogayaasha jaaliyaada Soomaalida, Cape-town ayaa saxaafadda u sheegay in goobaha caafimaadka ee Koonfur Afrika lagu qabay dhibaato xagga luqadda ah, balse markaani ay sidii hore kasoo hagaagayso maadaama dhalinyaro Soomaaliyeed oo caafimaadka bartay ay ka shaqo bilaabeen.

Guddoomiyaha ururka saxafiyiinta Soomaaliyeed ee Koonfur Afrika, Maxamed Muuse Nuur (Deeq-darajo) ayaa arrintan ku tilmaamay tallaabo horumar leh, isagoo ku daray hadalkiisa in Soomaalida Koonfur Afrika ku nool ay markan dhan walba iska dhisayaan, iyagoo wax la qabsanaya qowmiyadaha kale ee kula nool dalkaas.

Waa markii ugu horreysay oo gabar Soomaaliyeed ka hawlgasho xarun Caafimaad oo ku taalla dalka Koonfur Afrika waxaana si weyn u soo dhaweeyay isla markaana ugu riyaaqay dhammaan Soomaalida ku nool dalkaas.

Cabdirisaaq Indho-Jacayl
[email protected]
Cape Town, Koonfur Afrika













Click here
6/6/2012 8:35 AM EST
Arbaco, June 06, 2012 (HOL) — Wasaaradda xannaanada xoolaha, beeraha, dhirta iyo daaqa dowaldda KMG ah ee Soomaaliya ayaa sheegay in miro-beereedkii xilligan soo go'i lahaa ay baabi'iyeen cayayaan, isagoo ka digay in dadka beeraleyda ah ay mar kale ka barakacaan deegaannadooda.

6/6/2012 8:00 AM EST
Arbaco, June 06, 2012 (HOL) — Dowladda Kenya ayaa heegan gelisay ciidankeeda ammaanka kaddib markii diyaaradaha aan duuliyaha lahayn ee Mareykanka ay ku dileen goboka Wiziristaan ee dalka Bakistaan Abuu-Yaxye Al-Liibi oo ka mid ahaa saraakiisha Al-Qaacida ee ka howlgalay Soomaaliya.

6/6/2012 7:50 AM EST
Arbaco, June 06, 2012 (HOL) — Magaalada Baydhabo ee gobolka Bay oo 100-askari oo AMISOM ka tirsan ay ku sugan yihiin ayaa la geeyay qalab ay AMISOM leedahay kuwaasoo ay ku jiraan taangiyo iyo gaadiidka gaashaaman.

6/6/2012 7:44 AM EST
Arbaco, June 06, 2012 (HOL) — Kooxo bastoolado ku hubeysan ayaa goor dhaw xaafadda howlwadaag ee magaalada Beledweyne waxaa ay ku toogteen Nin rayid ah oo ka mid ahaa ganacstada magaalada.

6/6/2012 7:19 AM EST
Arbaco, June 06, 2012 (HOL) — Madaxweynaha Soomaaliya, Shariif Sheekh Axmed iyo xubno dowladda ka tisan oo wasiirka ganacsiga iyo warshadaha, Cabdiwahaab Ugaas Khaliif uu ka mid ahaa ayaa la kulmay odayaasha dhaqanka ee laga doonayo inay soo xulaan ergada ansixinta dastuurka cusub ee Soomaaliya.

6/6/2012 7:15 AM EST
Arbaco, June 06, 2012 (HOL) — Saraakiisha hogaamineeysa ciidamada dowladda KMG ee ku sugan gobolka Jubada Hoose ayaa sheegay in ay isu soo dhiibeen 20 askari oo hore uga tirsanayd dagaalyahannada Al-shabaab ee ku sugan gobolka Jubada Hoose.

6/6/2012 3:57 AM EST
Arbaco, June 06, 2012 (HOL) — Ciidamada ammaanka dalka Uganda ayaa maalmihii ugu dambeeyay ka sameynayay magaalada Kampala howlgallo lagu xoojinayo ammaanka, iyagoo si gaar ah u adkeynayaya ammaanka hoteellada, goobaha laga adeegto, dhismayaasha dhaadheer iyo kuwa ay dhismayaashu ka socdaan ee ku dhow goobaha muhiimka ah.

6/6/2012 3:07 AM EST
Arbaco, June 06, 2012 (HOL) — Saraakiisha dowladda KMG ah ayaa soo rogay amar looga mamnuucayo hubka degmada Afgooye ee gobolka Shabeellada hoose. halkaas oo ciidamada dowladda KMG ah oo kaashanaya kuwa AMISOM ay kala wareegeen laba todobaad ka hor xoogaggii Al-shabaab ee ka talinayay.