11/16/2018
Today from Hiiraan Online:  _
Wararka Maanta- Arbaco, Jun 6 , 2012
Madaxweynaha Somalia oo ka dalbaday Odayaasha-dhaqanka inay soo xulaan Ergadii Ansixin lahayd Dastuurka


Arbaco, June 06, 2012 (HOL) — Madaxweynaha Soomaaliya, Shariif Sheekh Axmed iyo xubno dowladda ka tisan oo wasiirka ganacsiga iyo warshadaha, Cabdiwahaab Ugaas Khaliif uu ka mid ahaa ayaa la kulmay odayaasha dhaqanka ee laga doonayo inay soo xulaan ergada ansixinta dastuurka cusub ee Soomaaliya.

Shariif Axmed oo la hadlayay odayaasha ayaa sheegay inay baryanaan soo bateen wararka sheegaya in odayaasha-dhaqanka ay ku jiraan kuwo aan sax ahayn oo la sameeyay, wuxuuna madaxweynuhu sheegay inaysan jirin oday la sameyn karo.

"Baryahaan waxaa soo badanayay wararka la sheegaya in odayaasha dhaqanka ay ku jiraan kuwo la sameeyay... War suldaan qofi ma sameyn karto, anigu ma dooran karo siyaasi, waayo suldaanku wuu ka weyn yahay siyaasiga," ayuu yiri Sheekh Shariif.

Madaxweynuhu wuxuu qiray inay jiraan boosas ay dad ilmo adeer ah isku haystaan, balse aanay jirin salaadiin gacanta lagu sameeyay oo odayaasha ku jira, isagoo ku daray hadalkiisa in odayaasha laga doonayo haddii ay jiraan odayaal aan sax ahayn oo ku dhex-jira inay sheegaan si ay maanta albaabka uga saaraan.

"Innagu wax dhibaato ah uma aragno in ugaaskii dufuur awgeed u imaan waaya uu soo dirsado wakiil," ayuu yiri madaxweyne Shariif oo ka dalbaday odayaasha in looga baahan yahay inay arrintaas dadka ka shaafiyaan, maadaama ay yihiin dadkii ummadda ka shaafin lahaa hadalkaas, si looga fogaado ceeb.

Dhanka kale, madaxweynaha Soomaaliya wuxuu odayaasha ka dalbaday inay soo qoraan ergadii ansixin lahayd dastuurka cusub ee Soomaaliya isla markaana soo xuli lahaa xildihbaannadii bedeli lahaa kuwa hadda shaqeynaya, isagoo ku adkeeyay inay soo xulaan mas'uuliyiin howshooda kasoo bixi kara.

"Mas'uuliyad taariikhi ah ayaa idin saaran... waayo 100-sano kaddib waa la idin xusi doonaa, waxaana la dhihi doonaa Soomaaliya markii ay dhibaatada ka baxaysay waxay qaadatay nidaamkaas oo odayaasha-dhaqanka ayaa soo xulay ergadii ansixin lahayd dastuurka iyo xildhibaannada... waxaana ka dambeeyay dowlad fiican iyo wixii la mid ah," ayuu yiri madaxweynaha Soomaaliya.

Ugu dambeyn, waxaa goobta ka hadlay wasiirka ganacsiga iyo warshadaha DKMG ah oo ah ku simaha ra'iisul wasaaraha isagoo sheegay in odayaasha loo soo gudbin doona bishan bartamaheeda dastuurka si ay u eegaan, wuxuuna sheeagy in dastuurku uu yahay mid si wanaagsan looga soo shaqeeyay.

Wasiirku ayaa hadalkiisa kusoo xiray inay soo gaareen cabashooyin ammaanka ku aaddan oo ka imaanaya dhinaca odayaasha, ayna dowladdu adkeyn doonto intii ay awooddo ammaanka odayaasha-dhaqanka ee soo xulaya ergada ansixinta iyo kuwa soo xulaya xildhibaannada cusub.

Kulankan oo ka dhacay agagaarka garoonka diyaaradaha Muqdisho oo odayaasha dhaqanku ay deggen yihiin ayaa waxaa la xiray jidka gala garoonka diyaaraaha iyo kan taga madaxtooyada, iyadoo dadka loo ogolaa inay socod ku maraan jidadkaas.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
6/6/2012 8:35 AM EST
Arbaco, June 06, 2012 (HOL) — Wasaaradda xannaanada xoolaha, beeraha, dhirta iyo daaqa dowaldda KMG ah ee Soomaaliya ayaa sheegay in miro-beereedkii xilligan soo go'i lahaa ay baabi'iyeen cayayaan, isagoo ka digay in dadka beeraleyda ah ay mar kale ka barakacaan deegaannadooda.

6/6/2012 8:00 AM EST
Arbaco, June 06, 2012 (HOL) — Dowladda Kenya ayaa heegan gelisay ciidankeeda ammaanka kaddib markii diyaaradaha aan duuliyaha lahayn ee Mareykanka ay ku dileen goboka Wiziristaan ee dalka Bakistaan Abuu-Yaxye Al-Liibi oo ka mid ahaa saraakiisha Al-Qaacida ee ka howlgalay Soomaaliya.

6/6/2012 7:50 AM EST
Arbaco, June 06, 2012 (HOL) — Magaalada Baydhabo ee gobolka Bay oo 100-askari oo AMISOM ka tirsan ay ku sugan yihiin ayaa la geeyay qalab ay AMISOM leedahay kuwaasoo ay ku jiraan taangiyo iyo gaadiidka gaashaaman.

6/6/2012 7:44 AM EST
Arbaco, June 06, 2012 (HOL) — Kooxo bastoolado ku hubeysan ayaa goor dhaw xaafadda howlwadaag ee magaalada Beledweyne waxaa ay ku toogteen Nin rayid ah oo ka mid ahaa ganacstada magaalada.

6/6/2012 7:15 AM EST
Arbaco, June 06, 2012 (HOL) — Saraakiisha hogaamineeysa ciidamada dowladda KMG ee ku sugan gobolka Jubada Hoose ayaa sheegay in ay isu soo dhiibeen 20 askari oo hore uga tirsanayd dagaalyahannada Al-shabaab ee ku sugan gobolka Jubada Hoose.

6/6/2012 3:57 AM EST
Arbaco, June 06, 2012 (HOL) — Ciidamada ammaanka dalka Uganda ayaa maalmihii ugu dambeeyay ka sameynayay magaalada Kampala howlgallo lagu xoojinayo ammaanka, iyagoo si gaar ah u adkeynayaya ammaanka hoteellada, goobaha laga adeegto, dhismayaasha dhaadheer iyo kuwa ay dhismayaashu ka socdaan ee ku dhow goobaha muhiimka ah.

6/6/2012 3:40 AM EST
Arbaco, June 06, 2012 (HOL) — Dalka Koonfur Afrika oo ay kumannaan Soomaali ah ay ku nool yihiin ayaa waxaa marba marka kasii dambeysa sii kordhaya xiriirka iyo isdhex-galka ay la yeelanayaan dadka dalkaas u dhashay.

6/6/2012 3:07 AM EST
Arbaco, June 06, 2012 (HOL) — Saraakiisha dowladda KMG ah ayaa soo rogay amar looga mamnuucayo hubka degmada Afgooye ee gobolka Shabeellada hoose. halkaas oo ciidamada dowladda KMG ah oo kaashanaya kuwa AMISOM ay kala wareegeen laba todobaad ka hor xoogaggii Al-shabaab ee ka talinayay.