11/19/2018
Today from Hiiraan Online:  _
Wararka Maanta- Arbaco, Jun 6 , 2012
Saraakiisha Amaanka DKMG ah ee Somalia oo hubka ka manuucay Degmada Afgooye una digay Ciidamada Degmadaas ku sugan


Arbaco, June 06, 2012 (HOL) — Saraakiisha dowladda KMG ah ayaa soo rogay amar looga mamnuucayo hubka degmada Afgooye ee gobolka Shabeellada hoose. halkaas oo ciidamada dowladda KMG ah oo kaashanaya kuwa AMISOM ay kala wareegeen laba todobaad ka hor xoogaggii Al-shabaab ee ka talinayay.

Digniintan ayaa waxaa si wadajir ah ugu dhawaaqay guddoomiyaha maxkamadda ciidamada qalabka sida, G/sare Xasan Maxamed Xuseen (Muun-gaab), afhayeenka booliiska. Jen. C/llaahi Xasan Bariise iyo taliyaha gobolka Banaadir, Jen. Axmed Xasan Maalin xilli ay ku suganayeen degmada Afgooye.

"Maanta wixii ka dambeeya lama arki karo qof hub ku dhex-wata degmada Afgooye oo aan ka ahayn guutada lixaad ee ciidamada milateriga Soomaaliya, booliiska iyo cidamada nabadsugidda," ayay saraakiishan ka sheegeen shir jaraa'id oo shalay ay ku qabteen degmada Afgooye.

Saraakiishu waxay sheegeen in ruxii lagu qabto isagoo hub ku dhex-wata gudaha degmada oo aan ciidamada ku sugna ka mid ahayn in la ciqaabi doono, inkastoo aysan sheegin ciqaabta nooceeda.

"Ciidamada dowladda waxaan uga digaynaa inay gaadiidka lacago ka qaataan, qofkii lagu helo isagoo lacago baad ah qaadanaya waxaa la horgeyn doonaan sharciga. Waayo innagu ma aqbali karo in fowdo aan fowdo ku bedelno," ayuu yiri Col. Muun-gaab.

Degmada Afgooye oo ka tirsan gobolka Shabeellada Hoose ayaa waxaa dhawaan la wareegay ciidamada dowladda KMG ah iyo kuwa AMSOM oo isgarabsanaya, iyadoo ay dhowr jeer ka dhaceen iskahorimaadyo u dhexeeya ciidamada dowladda.

Guddoomiyaha maxkamadda qalabka ayaa wuxuu shalay maxkamad ka furay degmadaas, isagoo sheegay in maxkamaddaas ay xukumi doonto askarta dowladda ee dambiyada lagu helo.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
6/6/2012 8:35 AM EST
Arbaco, June 06, 2012 (HOL) — Wasaaradda xannaanada xoolaha, beeraha, dhirta iyo daaqa dowaldda KMG ah ee Soomaaliya ayaa sheegay in miro-beereedkii xilligan soo go'i lahaa ay baabi'iyeen cayayaan, isagoo ka digay in dadka beeraleyda ah ay mar kale ka barakacaan deegaannadooda.

6/6/2012 8:00 AM EST
Arbaco, June 06, 2012 (HOL) — Dowladda Kenya ayaa heegan gelisay ciidankeeda ammaanka kaddib markii diyaaradaha aan duuliyaha lahayn ee Mareykanka ay ku dileen goboka Wiziristaan ee dalka Bakistaan Abuu-Yaxye Al-Liibi oo ka mid ahaa saraakiisha Al-Qaacida ee ka howlgalay Soomaaliya.

6/6/2012 7:50 AM EST
Arbaco, June 06, 2012 (HOL) — Magaalada Baydhabo ee gobolka Bay oo 100-askari oo AMISOM ka tirsan ay ku sugan yihiin ayaa la geeyay qalab ay AMISOM leedahay kuwaasoo ay ku jiraan taangiyo iyo gaadiidka gaashaaman.

6/6/2012 7:44 AM EST
Arbaco, June 06, 2012 (HOL) — Kooxo bastoolado ku hubeysan ayaa goor dhaw xaafadda howlwadaag ee magaalada Beledweyne waxaa ay ku toogteen Nin rayid ah oo ka mid ahaa ganacstada magaalada.

6/6/2012 7:19 AM EST
Arbaco, June 06, 2012 (HOL) — Madaxweynaha Soomaaliya, Shariif Sheekh Axmed iyo xubno dowladda ka tisan oo wasiirka ganacsiga iyo warshadaha, Cabdiwahaab Ugaas Khaliif uu ka mid ahaa ayaa la kulmay odayaasha dhaqanka ee laga doonayo inay soo xulaan ergada ansixinta dastuurka cusub ee Soomaaliya.

6/6/2012 7:15 AM EST
Arbaco, June 06, 2012 (HOL) — Saraakiisha hogaamineeysa ciidamada dowladda KMG ee ku sugan gobolka Jubada Hoose ayaa sheegay in ay isu soo dhiibeen 20 askari oo hore uga tirsanayd dagaalyahannada Al-shabaab ee ku sugan gobolka Jubada Hoose.

6/6/2012 3:57 AM EST
Arbaco, June 06, 2012 (HOL) — Ciidamada ammaanka dalka Uganda ayaa maalmihii ugu dambeeyay ka sameynayay magaalada Kampala howlgallo lagu xoojinayo ammaanka, iyagoo si gaar ah u adkeynayaya ammaanka hoteellada, goobaha laga adeegto, dhismayaasha dhaadheer iyo kuwa ay dhismayaashu ka socdaan ee ku dhow goobaha muhiimka ah.

6/6/2012 3:40 AM EST
Arbaco, June 06, 2012 (HOL) — Dalka Koonfur Afrika oo ay kumannaan Soomaali ah ay ku nool yihiin ayaa waxaa marba marka kasii dambeysa sii kordhaya xiriirka iyo isdhex-galka ay la yeelanayaan dadka dalkaas u dhashay.