3/29/2024
Today from Hiiraan Online:  _
Wararka Maanta- Isniin, Sept 24, 2012
Xildhibaannada Baarlamaanka Somalia oo Maanta yeelanaya kulankii ugu horreeyay tan iyo markii ay doorteen Madaxweynaha
Isniin, September 24, 2012 (HOL) — Xildhibaannada baarlamaanka Soomaaliya ayaa kulan ku yeelanaya maanta xarunta golaha shacabka ee Muqdisho, kaasoo aan la ogeyn ajandayaasha ay uga hadli doonaan.

Kulankan ayaa wuxuu noqonayaa kii ugu horreeyay oo ay xidlhibaannadu yeeshaan tan iyo markii ay doorteen madaxweynaha Soomaaliya 10-kii bishan, waxaana uu ka dhacayaa kulankan xarunta golaha shacabka ee Muqdisho.

"Baarlamaanku wuxuu maanta yeelanayaa kulankii ugu horreeyay tan iyo markii uu doortay madaxweynaha Soomaaliya," ayuu yiri mudane ka tirsan baarlamaanka oo la hadlay HOL, balse wuxuu sheegay inaan lagu wargelin ajandaha looga hadlayo.

Kulankan ayaa wuxuu kusoo beegmayaa iyadoo habeen hore lagu dilay Muqdisho mid ka mid ah xildhibaannada baarlamaanka Soomaaliya, kaasoo dalbey bastooolado watay ay ku weerareen gurigiisa oo ku yaallay degmada waaberi ee magaalada Muqdisho.

Al-shabaab ayaa sidoo kale ku hanjabtay inay beegsan doono xildhibaannada kale ee baarlamaanka, kuwaasoo ay ku eedeysay inay ka dhego-adeygeen digniinno ay horay ugu jeedisay, kuwaasoo ahaa inaysan ka mid noqon baarlamaanka.

Fadhiga uu maanta yeelanayo baarlamaanku Soomaaliya ayaa wuxuu sidoo kale kusoo beegmayaa iyadoo ay xaaladda Muqdisho tahay mid aan wanaagsanayn, iyadoo sidoo kale aan lagu dhawaaqin ra'iisul wasaaraha cusub ee Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
9/24/2012 11:20 AM EST
Isniin, September 24, 2012(HOL): 20-kii bishan waxaa Muqdisho ka dhacay labo qorax oo geystay khasaare aad u faro badan, waxaana qaraxyadaas ku dhintay dad badan oo ay ku jireen wariyayaal caan ah oo ka howl-gelayay TV-ga Qaranka iyo Idaacado Muqdisho ka howlagala, sidoo kalena waxaa ku dhaawacmay dad aad u badan oo sidoo kalena ay wariyayaal ka mid ahaayeen.

9/24/2012 7:03 AM EST
Isniin, September 24, 2012 (HOL) — Golaha Wakiiladda Somaliland,ayaa dood adag ka yeeshay xeerka guddida maamul-wanaagga iyo la dagaalanka musuqmaasuqu ay ku shaqayn lahaayeen.

9/24/2012 6:55 AM EST
Isniin, September 24, 2012 (HOL) — Xildhibaannada baarlamaanka Soomaaliya oo maanta kulan ku yeeshay Muqdisho ayaa waxay kaga hadleen waxyaabihii tan iyo markii la dhisay u qabsoomay, iyadoo sidoo kale la dhaariyay maanta labadii mudane ee ugu dambeeyay baarlamaanka, kuwaasoo buuxiyay kuraasta baarlamaanka.

9/24/2012 6:54 AM EST
Isniin, September 24, 2012 (HOL) — Kulan looga hadlayay qaabka lagu badbaadin karo amaba looga hortegi karo boobka kooxda loo geysto raashinka gargaarka ah ee loogu talogalay dadka dhibaateysan ayaa ka dhacay Magaalada Muqdisho, kaasoo ay soo agaasiintay hay'adda CCD.

9/24/2012 6:30 AM EST
Isniin, September 24, 2012 (HOL) — Ugu yaraan laba askari oo ka tirsan ciidamada dowladda Soomaaliya ayaa ku dhintay iskahorimaad ka dhacay deegaanka Lafoole ee gobolka Shabeellada hoose, kaasoo u dhexeeyay ciidammo dowladda kawada tirsan.

9/24/2012 2:59 AM EST
Isniin, September 24, 2012 (HOL) — Dowladda Soomaaliya ayaa la wareejiyay deeq bani'aadamnimo oo shacabka dalka Ciraaq ay ugu deeqeen shacabka Soomaaliyeed, iyadoo markabka waday deeqdan oo culeyskeedu yahay 13,500 tan uu shalay oo Axad ahayd kusoo xirtay dekedda Muqdisho.

9/24/2012 2:42 AM EST
Isniin, September 24, 2012 (HOL) — Dowladda Itoobiya ayaa qorsheysanaysa inay dalka Soomaaliya u soo dirto kumannaan askari oo ay ku xoojinayso ciidamadii kaga sugnaa Soomaaliya si ay gacan uga siiyaan dowladda Soomaaliya dadaalka ay nabadda dalka kusoo celinayso.

9/24/2012 2:31 AM EST
Isniin, September 24, 2012 (HOL) — Ra'iisul wasaaraha Soomaaliya ee waqtigiisu dhammaadka yahay, C/weli Maxamed Cali ayaa xarunta Qaramada Midoobay ay ku leedahay magaalada New York ee dalka Mareykanka, isagoo Soomaaliya ku matalaya shirkaas.

9/24/2012 2:19 AM EST
Isniin, September 24, 2012 (HOL) — Ciidamada Kenya ee qaybta ka ah howgalka Midowga Afrika ee AMISOM ayaa shacab Soomaaliyeed oo xoolo dhaqato ah ku laayay deegaanka Janaay-Cabdala oo ka tirsan gobolka Jubbada Hoose, sida uu saxaafadda u xaqiijiyay afhayeenka ciidamada dowladda ee Jubbooyinka, Col. Aadan Axmed Xirsi (Rufle).