9/25/2018
Today from Hiiraan Online:  _
Wararka Maanta- Talaado, May 8 , 2012
Faahfaahin ku saabsan duqeyn xalay ka dhacday Muqdisho iyo AMISOM oo sheegtay in Askar laga dhaawacay


Talaado, May 08, 2012 (HOL) — Faahfaahin dheeraad ah ayaa kasoo baxay madaafiic xalay ku dhacday xaafadda Zone-K ee degmada Hodan, iyadoo tirada dadkii ku dhintay ay gaartay sagaal qof, kuwaasoo afar ka mid ah ay kasoo jeedeen qoys keliya.

Wararka soo baxaya ayaa sheegaya in madaafiicda ay ahaayeen kuwo ka yimid deegaannada ku yaalla duleedka Muqdisho oo Al-shabaab ay ka taliso, balse ma jiro hadal kasoo baxay kooxdan ama sheegasho ay sheegatay inay iyadu madaafiicda soo gantay.

"Xalay waxaa dhacayay dagaallo culus... laba ka tirsan xoogagga Al-shabaab ayaa waxay mayadadkoodu yaallaan meel ku dhow saldhiggeenna," ayuu yiri afhayeenka ciidamada Burundi ee ku sugan Muqdisho, Cap. Ndayiragije Come.

Afhayeenka oo hadalkiisa sii wata ayaa yiri "Dhinaceenna waxaa naga dhaawacmay laba askari. Al-shabaab waxay sidoo kale duqeeyeen saldhigeenna - madaafiicda qaarkood way la waayeen saldhigga."

Goobjoogayaal ayaa sheegay in madaafiicdu ay ahaayeen laba ku dhacay hal guri oo ay ku noolaayeen laba qoys, ayna halkaas ku dileen toddoba qof oo afar ka mid ah ay isku qoys kasoo jeedeen.

"Madaafiic culus ayaa xalay ku dhacay guri ka sameysan jiingad. Aabbe, Hooyo iyo laba caruur ah oo ay dhaleen ayaa ku dhintay, laba cunug oo keliya ayaa qoyskaas ka badbaaday kuwaasoo dhaawacyo qaba," ayuu yiri Cabdi Gaas oo la hadlay Reuters.

"Madfac kale ayaa ku dhacay meel guriga ku dhow, hooyo iyo cunug ay dhashay ayuuna dilay. Firirka madfaca ayaa sidoo kale wiil yar ku dilay guri kale, halkaas waxaa ku dhintay toddoba qof oo la aasay," ayuu Cabdi Gaas hadalkiisa ku daray.

Ma jirto cid sheegatay duqeyntii khasaaraha nafeed geystay ee xalay ka dhacday Muqdisho, sidoo kalena ma jiro hadal kasoo baxay mas'uuliyiinta Al-shabaab. Iyadoo laba ka mid ah dadkii dhaawac ahaanta loo dhigay isbitaalada Muqdisho ay u dhinteen dhaawacyo halis ah oo soo gaaray.

Xaafada Zone-K oo ay xalay duqeyntu ka dhacday ayaa ka mid ahayd goobihii ka badbaaday inay saameynta ku yeeshaan dagaaladii magaalada Muqdisho ku dhex-marayay ciidamada DKMG ah oo garabsanaya AMISOM iyo xoogaga Al-shabaab.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/8/2012 9:02 AM EST
Talaado, May 08, 2012 (HOL) — Ra'iisul wasaaraha Soomaaliya, Cabdiweli Maxamed Cali ayaa maanta Muqdihso ku qaabilay wafdiyo kala duwan oo ka kala socday Qaramada Midoobay, Mareykanka iyo Midowga Yurub.

5/8/2012 8:55 AM EST
Talaado, May 08, 2012 (HOL) — Maamulka gobolka Hiiraan ayaa maanta beeniyay warar maalmihii ugu danbeeyayba si weyn u hadal hayeen warbaahinta Soomaalida kuwaasoo sheegaya in ciidammo ka socda dalka Jabuuti qeybna ka ah AMISOM ay gaareen magaalada Beledweyne.

5/8/2012 8:28 AM EST
Talaado, May 08, 2012 (HOL) — Sanad-guuraddii tobanaad ee ka soo wareegtay Geeridii Madaxweynihii hore ee Somaliland marxuum Maxamed Ibraahim Cigaal ayaa xalay lagu qabtay Hoteel Maansoor ee magaaladda Hargeysa.

5/8/2012 8:20 AM EST
Talaado, May 08, 2012 (HOL) — Hay'adda nabadsugidda DKMG ah ee Soomaaliya ayaa maanta kusoo bandhigtay xarunteeda Muqdisho saddex dhallinyaro ah oo ay sheegtay in Al-shabaab ay ka tirsanaayeen, mid ka mid ahna uu doonayay inuu is-qarxiyo.

5/8/2012 7:59 AM EST
Talaado, May 08, 2012 (HOL) — Kulankan oo ahaa kii 13-aad socdayna muddo laba maalmood ah ayaa maanta lagu soo gabgabeeyay magaalada Muqdisho, waxaana kasoo baxay qodobbo ay ka mid yihiin in la adkeeyo ammaanka dalka iyo weliba deegaannadii Al-shabaab laga qabsaday.

5/8/2012 7:15 AM EST
Talaado, May 08, 2012 (HOL) — Guddoomiyaha maamulka gobollka Hiiraan oo maalintii shalay goob joog ka ahaa kulan ay gollaha deegaannka degmada Beledweyne ku soo dooranayeen Duqa degmada, ayaa sheegay in uu soo dhamaaday waqtigii bulshada loo soo magacaabi jiray hogaan-ka, laakiin wixii hadda ka danbeeya la doonayo in dadku iyaga soo doortaan cidii ay doonayaan.

5/8/2012 7:13 AM EST
Talaado, May 08, 2012 (HOL) — Waxaa maanta ka soconayo Xaafadda Eastleigh (Islii) ee magaalada ee Nairobi dibad-bax ballaaran oo ay soo qabanqaabiyeen ganacsatada xaafadda, kaasoo ay uga cabanayaan amni darrida kusoo badaneysa Xaafadda.

5/8/2012 7:13 AM EST
Talaado, May 08, 2012 (HOL) — Dagaal la isku adeegsaday hubka noocyadiisa kala duwan ayaa galinkii dambe ee shalay ku dhaxmaray deegaanka lagu magacaabo Waro-dhuumaleh oo gobolka Galguduud ka tirsan xoogagga Ahlusunna Waljameeca iyo kuwa Xarrakada Al-shabaab.

5/8/2012 3:51 AM EST
Talaado, May 08, 2012 (HOL) — Haweeneyda madaxda ka ah hay'adda UNESCO oo Qaramada Midoobay u qabilsan waxbarashada, sayniska iyo dhaqanka ayaa maanta ugu baaqay dowladda KMG ah inay cadaaladda horkeento kuwa caadeystay dilka suxufiyiinta Soomaalida.

5/8/2012 3:36 AM EST
Talaado, May 08, 2012 (HOL) — Ergayga xoghayaha guud ee Qaramada Midoobay u qaabilsan arrimaha dalka Soomaaliya, danjire Augsutine Mahiga ayaa muujiyay rajo uu ka qabo in xilliga KMG ah ee ay ku shaqeynayso dowladda KMG ah lasoo af-jaro bisha Ogoosto ee sannadkan 2012.

5/8/2012 3:20 AM EST
Talaado, May 08, 2012 (HOL) — Ugu yaraan shan qof oo qoys kasoo wada-jeeda ayaa ku dhintay, sagaal kale way ku dhaawacmeen kaddib madfac aan la garanayn halka uu ka yimid oo xalay ku dhacay xaafadda Zone-K ee degmada Hodan ee gobolka Banaadir.

5/8/2012 3:12 AM EST
Talaado, May 08, 2012 (HOL) — Ugu yaraan afar qof oo laba ka mid ah ay ka mid ahaayeen shaqaalaha waaxda socdaalka iyo jinsiyadaha Soomaaliya ayaa lagu dilay xalay Muqdisho, waxaana dilkaas geystay rag bastoolado ku hubeysan oo wajiga qarsaday.