11/14/2018
Today from Hiiraan Online:  _
Wararka Maanta- Talaado, May 8 , 2012
Hay'adda Nabad-sugidda DKMG Soomaaliya oo soo Bandhigay dhallinyaro ay sheegtay inay Xarakada Al-shabaab ka tisranaayeen


Talaado, May 08, 2012 (HOL) — Hay'adda nabadsugidda DKMG ah ee Soomaaliya ayaa maanta kusoo bandhigtay xarunteeda Muqdisho saddex dhallinyaro ah oo ay sheegtay in Al-shabaab ay ka tirsanaayeen, mid ka mid ahna uu doonayay inuu is-qarxiyo.

Saraakiisha hay'adda ayaa sheegay in dhallinyaradan lagu soo qabtay baaritaan ay ciidamadu sameeyeen, iyagoo sheegay in midka doonayay inuu is-qarxiyo uu watay jaakad ay waxyaabaha qaraxa laga buuxiyay.

"Ruuxan wuxuu doonayay inuu isku qarxiyo jaamacadda ummadda oo saldhig u ah ciidamada Burundi oo ka tirsan kuwa AMISOM," ayay yiraahdeen saraakiil ka tirsan hay'adda nabadsugidda dowladda Soomaaliya.

Wiilka la sheegay inuu doonayay inuu isqarxiyo oo lagu magacaabo Ismaaciil Cumar Sheekh Nuur oo saxaafadda la hadlay ayaa sheegay inuu muddo laba sano ah ka tirsanaa Al-shabaab uuna doonayay inuu isku-qarxiyo ciidamada Buurndi ee ku jira jaamacadda ummadda balse la qabtay.

Taliyaha ciidamada nabadsugidda gobolka Banaadir, Khaliif Axmed Ereg oo isna kula hadlay saxaafadda Muqdisho ayaa sheegay inay ciidamadu ka hortageen qorshe ay Al-shabaab ku doonaysay inay Muqdisho kaga fuliso weerar is-miidaamin ah, ayna qabteen ruuxa doonayay inuu fuliyo kaddib markii ay heleen xog iyagoo ku qabtay isgoyska ex-koontarool Afgooye.

Dhallinyarada kale ee labada ah ayay saraakiisha hay'addu sheegeen inay iyagana ku qabteen baaritaanno ay Muqdisho ka sameeyeen, balse ma aysan sheegin wax qalab ah oo lagu qabtay.

Ma ahan markii ugu horreysay oo ay hay'adda nabadsugiddu soo bandhigto dhallinyaro la sheegay inay ka mid yihiin Al-shabaab oo lagu qabtay howlgallo laga sameeyay Muqdisho, waxaana qabashada dhalinyaradan ay imaanaysaa iyadoo xalay ay Muqdisho ka dhaceen falal dilal ah oo qaarkood ay geysteen rag bastoolado ku hubeysnaa.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/8/2012 10:08 AM EST
Talaado, May 08, 2012 (HOL) — Faahfaahin dheeraad ah ayaa kasoo baxay madaafiic xalay ku dhacday xaafadda Zone-K ee degmada Hodan, iyadoo tirada dadkii ku dhintay ay gaartay sagaal qof, kuwaasoo afar ka mid ah ay kasoo jeedeen qoys keliya.

5/8/2012 9:02 AM EST
Talaado, May 08, 2012 (HOL) — Ra'iisul wasaaraha Soomaaliya, Cabdiweli Maxamed Cali ayaa maanta Muqdihso ku qaabilay wafdiyo kala duwan oo ka kala socday Qaramada Midoobay, Mareykanka iyo Midowga Yurub.

5/8/2012 8:55 AM EST
Talaado, May 08, 2012 (HOL) — Maamulka gobolka Hiiraan ayaa maanta beeniyay warar maalmihii ugu danbeeyayba si weyn u hadal hayeen warbaahinta Soomaalida kuwaasoo sheegaya in ciidammo ka socda dalka Jabuuti qeybna ka ah AMISOM ay gaareen magaalada Beledweyne.

5/8/2012 8:28 AM EST
Talaado, May 08, 2012 (HOL) — Sanad-guuraddii tobanaad ee ka soo wareegtay Geeridii Madaxweynihii hore ee Somaliland marxuum Maxamed Ibraahim Cigaal ayaa xalay lagu qabtay Hoteel Maansoor ee magaaladda Hargeysa.

5/8/2012 7:59 AM EST
Talaado, May 08, 2012 (HOL) — Kulankan oo ahaa kii 13-aad socdayna muddo laba maalmood ah ayaa maanta lagu soo gabgabeeyay magaalada Muqdisho, waxaana kasoo baxay qodobbo ay ka mid yihiin in la adkeeyo ammaanka dalka iyo weliba deegaannadii Al-shabaab laga qabsaday.

5/8/2012 7:15 AM EST
Talaado, May 08, 2012 (HOL) — Guddoomiyaha maamulka gobollka Hiiraan oo maalintii shalay goob joog ka ahaa kulan ay gollaha deegaannka degmada Beledweyne ku soo dooranayeen Duqa degmada, ayaa sheegay in uu soo dhamaaday waqtigii bulshada loo soo magacaabi jiray hogaan-ka, laakiin wixii hadda ka danbeeya la doonayo in dadku iyaga soo doortaan cidii ay doonayaan.

5/8/2012 7:13 AM EST
Talaado, May 08, 2012 (HOL) — Waxaa maanta ka soconayo Xaafadda Eastleigh (Islii) ee magaalada ee Nairobi dibad-bax ballaaran oo ay soo qabanqaabiyeen ganacsatada xaafadda, kaasoo ay uga cabanayaan amni darrida kusoo badaneysa Xaafadda.

5/8/2012 7:13 AM EST
Talaado, May 08, 2012 (HOL) — Dagaal la isku adeegsaday hubka noocyadiisa kala duwan ayaa galinkii dambe ee shalay ku dhaxmaray deegaanka lagu magacaabo Waro-dhuumaleh oo gobolka Galguduud ka tirsan xoogagga Ahlusunna Waljameeca iyo kuwa Xarrakada Al-shabaab.

5/8/2012 3:51 AM EST
Talaado, May 08, 2012 (HOL) — Haweeneyda madaxda ka ah hay'adda UNESCO oo Qaramada Midoobay u qabilsan waxbarashada, sayniska iyo dhaqanka ayaa maanta ugu baaqay dowladda KMG ah inay cadaaladda horkeento kuwa caadeystay dilka suxufiyiinta Soomaalida.

5/8/2012 3:36 AM EST
Talaado, May 08, 2012 (HOL) — Ergayga xoghayaha guud ee Qaramada Midoobay u qaabilsan arrimaha dalka Soomaaliya, danjire Augsutine Mahiga ayaa muujiyay rajo uu ka qabo in xilliga KMG ah ee ay ku shaqeynayso dowladda KMG ah lasoo af-jaro bisha Ogoosto ee sannadkan 2012.

5/8/2012 3:20 AM EST
Talaado, May 08, 2012 (HOL) — Ugu yaraan shan qof oo qoys kasoo wada-jeeda ayaa ku dhintay, sagaal kale way ku dhaawacmeen kaddib madfac aan la garanayn halka uu ka yimid oo xalay ku dhacay xaafadda Zone-K ee degmada Hodan ee gobolka Banaadir.

5/8/2012 3:12 AM EST
Talaado, May 08, 2012 (HOL) — Ugu yaraan afar qof oo laba ka mid ah ay ka mid ahaayeen shaqaalaha waaxda socdaalka iyo jinsiyadaha Soomaaliya ayaa lagu dilay xalay Muqdisho, waxaana dilkaas geystay rag bastoolado ku hubeysan oo wajiga qarsaday.