11/15/2018
Today from Hiiraan Online:  _
Wararka Maanta- Khamiis, May 24, 2012
Kooxo hubeysan oo xalay Ganacsade Turki ah ku dilay Suuqa Bakaaraha kana qaatay lacago fara badan oo Doollar ah


Khamiis, May 24, 2012 (HOL) — Kooxo hubeysan ayaa xalay ku dilay gudaha hoteel ku yaalla suuqa weyn ee Bakaaraha ganacsade ajnabi ah oo la heegay inuu Turki ahaa oo lagu magacaabi jiray Zeyn Caabidiin, iyadoo kooxihii dilkiisa geystay ay ka qaateen lacago fara badan oo doollar ah.

Ganacsadahan oo 47-jir ahaa ayaa lagala soo baxay hoteelkii uu deggenaa oo lagu magacaabo Fardows kuna yaalla suuqa bakaaraha, waxaana lagu toogtay illinka hore ee hoteelka oo laba maalmood uu degenaa, iyadoo aan la ogeyn sababta ka dambeysay dilkan ganacsadahan Turkiga ah.

"Kooxo bastoolado ku hubeysan ayaa dilay ninka, goobta waxaa soo gaaray ciidamada dowladda KMG oo xiray laba ruux oo ka mid ah mas'uuliyiinta hoteelka oo lagu kala magacaabo Faarax iyo Nuunne," ayuu yiri goobjooge la hadlay HOL.

Ma jirto cid sheegatay inay ka dambeyso dilka ganacsadahan, laakiinse taliyaha ciidanka booliiska gobolka Banaadir Col. Axmed Xasan Maalin oo saxaafadda la hadlay ayaa sheegay in ganacsadahan Turkiga ah aysan dowladdu wax war ah ka hayn, balse ay ku tuhunsan yihiin inay ka dambeyso Al-shabaab.

Falkan ayaa noqonaya kii ugu horreeyay oo nin ajnabi ah loogu geysto suuqa Bakaaraha, waxayna sidoo kale uu noqonaysaa markii ugu horreysay oo nin dhalashadiisa Turki tahay lagu dilo Muqdisho tan iyo markii ay ka billaabeen Muqdisho howlaha ay ku caawinayaan Soomaalida.

Saraakiil ka tirsan safaaradda Turkiga ayaa xaqiijiyay in ninkii xalay lagu dilay Bakaaraha uu ahaa ganacsade u dhashay dalka Turkiga, iyagoo sheegay inuu la socday ganacsade Soomaali ah oo ay qorsheynayeen inay ka furaan Muqdisho shirkado ganacsi, balse waxay sheegeen inaysan garanayn sababta loo dilay iyo cidda ka dmabeysay dilkiisa.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/24/2012 9:44 AM EST
Khamiis, May 24, 2012 (HOL) — Hay’adda nabad-sugidda DKMG ah ee Soomaaliya ayaa soo bandhigtay maanta wiil sheegay inuu dhalay guddoomiyaha Al-shabaab ee gobolka Shabeellada dhexe, Sheekh Yuusuf Ciise Axmed (Kabo-kutukade).

5/24/2012 8:27 AM EST
Khamiis, May 24, 2012 (HOL) — Wasiirka arrimaha gudaha iyo amniga Qaranka ee dowladda KMG Soomaaliya, C/samad Macallin Maxamuud Xasan oo saxaafadda kula hadlay Muqdisho kaddib shir ay yeesheen golaha wasiirrada ayaa sheegay inaysan jirin xiriir ka dhexeeya shirkadda Isgaarsiinta Hormuud iyo Xarakada Al-shabaab.

5/24/2012 7:57 AM EST
Khamiis, May 24, 2012 (HOL) — Taliyaha gaaska koowaad ee ciidamada DKMG ah ee Soomaaliya, Jen. C/llaahi Cali Caanood oo sheegay inuu ku sugan yahay baar Ismaaciil oo ah halka laga galo degmada Afgooye ee gobolka Shabeellada hoose ayaa sheegay inuu xiran yahay jidka xiriiriya degmooyinka Afgooye iyo Muqdisho.

5/24/2012 7:42 AM EST
Khamiis, May 24, 2012 (HOL) — Xoogagga Al-shabaab ay billaabay inay baneeyaan saldhigyo degmada Afgooye ku lahaayeen halkaas ahayd goobaha ay awoodda badan ku lahaayeen tan iyo markii ay ka baxeen Muqdisho sannadkii hore.

5/24/2012 7:19 AM EST
Khamiis, May 24, 2012 (HOL) — Kooxo hubeysan oo aan la garanayn ayaa ku dilay suuq-boocle oo ka tirsan degmada Dharkeynley wariye Axmed Caddoow Canshuur oo ka tirsanaa wariyeyaasha idaacadda Shabeelle.

5/24/2012 3:53 AM EST
Khamiis, May 24, 2012 (HOL) — Boqolaal qoys oo kasoo barakacaya deegaannada ka sameysay inta u dhexeysa Muqdisho iyo Afgooye ayaa kusoo qulqulaya maanta magaalada Muqdisho, kuwaasoo sheegay inay cabsi weyn soo wajahday.

5/24/2012 3:31 AM EST
Khamiis, May 24, 2012 (HOL) — Ciidamada DKMG Soomaaliya iyo kuwa AMISOM ayaa ku wajahan deegaanka ceelasha biyaha iyagoo saakay dhaafay deegaanka KM-13 ee duleedka Muqdisho, halkaasoo saldhig weyn ay kul lahaayeen xoogaggii Al-shabaab.

5/24/2012 3:24 AM EST
Khamiis, May 24, 2012 (HOL) — Madaxda Soomaalida oo xalay soo gabgabeeyay shir uga socday muddo saddex maalmood ah uga socday magaalada Addis Ababa ee xarunta dalka Itoobiya ayaa waxay ku heshiiyeen in lagu dhameystiro xilliga KMG ah illaa bisha Ogoosto ee sannadkan.