11/14/2018
Today from Hiiraan Online:  _
Wararka Maanta- Khamiis, May 24, 2012
Madaxda Soomaalida oo ku Heshiiyay in bisha Ogoosto ka hor lasoo afjaro dhammaan howlaha looga gudbayo xilliga KMG ah


Khamiis, May 24, 2012 (HOL) — Madaxda Soomaalida oo xalay soo gabgabeeyay shir uga socday muddo saddex maalmood ah uga socday magaalada Addis Ababa ee xarunta dalka Itoobiya ayaa waxay ku heshiiyeen in lagu dhameystiro xilliga KMG ah illaa bisha Ogoosto ee sannadkan.

Shirka oo ahaa mid ay muranno badan hareeyeen waxay madaxda Soomaalidu ka heshiiyeen khilaafyadii u dhexeeyay oo ku saabsanaa dastuurka kuwaasoo ay isla garteen in isbedel lagu sameeyo, waxay sidoo kale ka heshiiyeen xulidda ergada ansixinaysa dastuurka cusub.

Qodobbada lagu heshiiyay ayaa waxay kala yihiin:

  1. In 26-ka bishan May ay soo gabgabeeyaan guddi loo xilsaaray dhexdhexaadinta odayaal-dhaqameedyada soo xulaya ergada ansixinaysa dastuurka, isla markaana soo xuli doona baarlamaanka cusub.
  2. In 01-da bisha Juun lasoo gabagabeeyo xulitaanka guddiga ansixinta dastuurka iyo soo xulida baarlamaanka cusub ee uu dalku yeelanayo.
  3. In ugu dambeyn 20-ka bisha Juun la helo oo lasoo gudbiyo magacyada golaha ansixinta, iyadoo loosoo gudbinayo gudiga farsamada.
  4. In 30-ka bisha Juun ay magaalada Muqdisho xaadir ku ahaadaan ergada ansixinaysa dastuurka cusub.
  5. In 02-Juulaay ay gudiga ansixinta dastuurka si rasmi ah u bilaabaan shirarkooda.
  6. In 10-ka Juulaay la ansixiyo dastuurka cusub ee Soomaaliya.
  7. In 15-ka Juulaay guddigu soo gudbiyo magacyada xildhibaannada cusub ee baarlamaanka dalku yeelanayo.
  8. In 20-ka Juulaay la dhaariyo baarlamaanka cusub.
  9. In 04-ta bisha Ogoosto, 2012 la qabto doorashada guddoomiyaha baarlamaanka iyo ku xigeennadiisa.
  10. In 20-ka isla bisha Ogoosto, 2012 la qabto doorashada madaxweynaha dalka.
  11. In wadashaqeyn joogta ah ay yeeshaan saxiixayaasha Roadmap-ka illaa inta laga dhameystirayo howshan.

Madaxweynaha Soomaaliya, Shariif Sheekh Axmed oo gabgabadii kulanka ka hadlay ayaa sheegay in heshiiskan uu yahay mid cusub oo ay saxiixayaasha Roadmapa-ka ku dhameystirayaan xilliga KMG ah.

"Dhammaan saxiixayaasha khariidadda nabadda (Roadmap) waxay gaareen heshiis ay ku dhameystirayaan howlaha horyaalla muddada kooban ee ka harsan KMG-ka. Aad ayaana ugu niyad-sannahay inaan howshan ku dhameyno waqtigeeda," ayuu yiri Sheekh Shariif.

Heshiiskan ayaa wuxuu dhigayaa inuusan jirin baarlamaan Soomaaliyeed, iyadoo la isku raacay in dastuurka ay ansixiyaan odayaal lasoo xulay, waxaan sidoo kale ka mid ah heshiiska in Muqdisho laga furo xafiis isku xira saxiixayaasha Roadmap-ka.

Madaxdii kale ee ka hadlay saxiixa heshiiskan cusub ee ay gaareen madaxda Soomaalida ayaa waxay sheegeen inay ka heshiiyeen khilaafaadyadii u dhexeeyay ayna diyaar u yihiin inay howlaha harsan si wadajir ah ku dhameystiraan.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/24/2012 9:44 AM EST
Khamiis, May 24, 2012 (HOL) — Hay’adda nabad-sugidda DKMG ah ee Soomaaliya ayaa soo bandhigtay maanta wiil sheegay inuu dhalay guddoomiyaha Al-shabaab ee gobolka Shabeellada dhexe, Sheekh Yuusuf Ciise Axmed (Kabo-kutukade).

5/24/2012 8:27 AM EST
Khamiis, May 24, 2012 (HOL) — Wasiirka arrimaha gudaha iyo amniga Qaranka ee dowladda KMG Soomaaliya, C/samad Macallin Maxamuud Xasan oo saxaafadda kula hadlay Muqdisho kaddib shir ay yeesheen golaha wasiirrada ayaa sheegay inaysan jirin xiriir ka dhexeeya shirkadda Isgaarsiinta Hormuud iyo Xarakada Al-shabaab.

5/24/2012 7:57 AM EST
Khamiis, May 24, 2012 (HOL) — Taliyaha gaaska koowaad ee ciidamada DKMG ah ee Soomaaliya, Jen. C/llaahi Cali Caanood oo sheegay inuu ku sugan yahay baar Ismaaciil oo ah halka laga galo degmada Afgooye ee gobolka Shabeellada hoose ayaa sheegay inuu xiran yahay jidka xiriiriya degmooyinka Afgooye iyo Muqdisho.

5/24/2012 7:42 AM EST
Khamiis, May 24, 2012 (HOL) — Xoogagga Al-shabaab ay billaabay inay baneeyaan saldhigyo degmada Afgooye ku lahaayeen halkaas ahayd goobaha ay awoodda badan ku lahaayeen tan iyo markii ay ka baxeen Muqdisho sannadkii hore.

5/24/2012 7:19 AM EST
Khamiis, May 24, 2012 (HOL) — Kooxo hubeysan oo aan la garanayn ayaa ku dilay suuq-boocle oo ka tirsan degmada Dharkeynley wariye Axmed Caddoow Canshuur oo ka tirsanaa wariyeyaasha idaacadda Shabeelle.

5/24/2012 3:53 AM EST
Khamiis, May 24, 2012 (HOL) — Boqolaal qoys oo kasoo barakacaya deegaannada ka sameysay inta u dhexeysa Muqdisho iyo Afgooye ayaa kusoo qulqulaya maanta magaalada Muqdisho, kuwaasoo sheegay inay cabsi weyn soo wajahday.

5/24/2012 3:41 AM EST
Khamiis, May 24, 2012 (HOL) — Kooxo hubeysan ayaa xalay ku dilay gudaha hoteel ku yaalla suuqa weyn ee Bakaaraha ganacsade ajnabi ah oo la heegay inuu Turki ahaa, iyadoo la sheegay in kooxihii dilka ruuxan geytay ay ka qaateen lacago fara badan oo doollar ah.

5/24/2012 3:31 AM EST
Khamiis, May 24, 2012 (HOL) — Ciidamada DKMG Soomaaliya iyo kuwa AMISOM ayaa ku wajahan deegaanka ceelasha biyaha iyagoo saakay dhaafay deegaanka KM-13 ee duleedka Muqdisho, halkaasoo saldhig weyn ay kul lahaayeen xoogaggii Al-shabaab.