3/28/2024
Today from Hiiraan Online:  _
Wararka Maanta- Axad, May 13, 2012
Hay'adda Nabad-sugidda Dowladda KMG Soomaaliya oo sheegtay in la qabtay Miino Casri ah oo ay Al-shabaab Sameysatay

Axad, May 13, 2012 (HOL) — Hay'adda Nabadsugidda DKMG ah ee Soomaaliya ayaa sheegtay in la qabtay miino casri ah oo ay AL-shabaab sameysay taasoo lagu xiri karo gaadiidka yaryar si loo dilo qofka wata.

Agaasimaha hay'adda nabadsugidda DKMG ah, Axmed Macallin Fiqi ayaa sheegay in miinadan casriga ah lagu qabtay isgoyska ex-koontarool Afgooye laguna qabtay baaris ay sameeyeen ciidamada milateriga Soomaaliya.

"Miinadan waa mid casri ah oo loogu talogalay in lagu xiro gaadiidka yaryar ee la dhigto goobaha baakinnada ah, si ay u disho hal qof iyo wixii la mid ah," ayuu yiri Axmed Fiqi.

Sidoo kale, agaasimuhu wuxuu sheegay in miinadan aan weli lagu qarin Muqdisho ayna aad ugu faraxsan yihiin inay qabtaan iyadoo aan wax dhibaato ah geysan, isagoo ugu baaqay dadka wata gaadiidka yaryar inay ilaalo u yeelaan markii ay dhiganayaan goobaha baakinnada ah.

"Waxaa loogu talogalay miinadan in lagu xiro gaadiidka si ay u disho qofka wata iyo inta la socota, waana hab khatar ah oo ay Al-shabaab ku bedeleen miinooyinkii hore ee ay dhulka ku aasi jireen," ayuu yiri agaasimaha nabad-sugidda DKMG ah.

Ugu dambeyn, agaasimuhu wuxuu sheegay inay soo bandhigi doonaan miinadan casriga ah, inkastoo uusan sheegin xilli ay soo bandhigayaan iyo goob ay kusoo bandhigayaan.

Xarakada Al-shabaab ayaan ka hadlin hadalka kasoo baxay hay'adda nabadsugidda ee ku aaddan in la qabtay miino casri ah oo ay Al-shabaab sameysay si ay ugu adeegsato qaraxyada ay ka geysanayaan Muqdisho.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
5/13/2012 6:12 AM EST
Axad, May 13, 2012 (HOL) — Ra'iisul wasaaraha Soomaaliya, C/weli Maxamed Cali ayaa ku boorriyay maanta odayaasha dhaqanka ee ku shirsan Muqdisho inay soo dedejiyaan guddiga ansixinta dastuurka cusub ee Soomaaliya.

5/13/2012 5:20 AM EST
Axad, May 13, 2012 (HOL) — Wararka aynu ka heleyno deegaanka Hoosingoow ee gobolka Jubada Hoose ayaa sheegay in duleedka deegaankaasi maanta lagu arkay meydka haweeney kamid ahayd dadka deegaanka taasoo gowracan, waxaana ilaa imika aan cadeyn sababta ka danbeeysay dilka haweeneydaasi.

5/13/2012 3:41 AM EST
Axad, May 13, 2012 (HOL) — Guddoomiyaha maamulka gobollka Hiiraan C/fitaax Xassan Afrax oo wareysi siinayay laanta afka Soomaaliga ee BBC-da ayaa si kulul uga jawaabay eedeyn ugu timid guddoomiyaha degmada Beledweyne Cismaan Barre Max’ed oo sheegay in guddoomiyuhu caqabad ku yahay howlaha maamulka gobolka.

5/13/2012 3:41 AM EST
Axad, May 13, 2012 (HOL) — Tababarkan oo ay wadajir ah u soo qaban-qaabiyeen wasaaradda dhalinyarada, isboortiga, shaqada iyo shaqaalaha DKMG iyo urrurrada dhalinyarda SYL II iyo ururka dhalinyarada Qaranka Soomaliyeed loogana doodayo dastuurka iyo siyaasada dhallinyarada Soomaaliyeed ayaa ka furmay Muqdisho.

5/13/2012 3:22 AM EST
Axad, May 13, 2012 (HOL) — Ugu yaraan saddex qof oo isugu jira askar iyo shacab ayaa ku dhintay qaraxyo bambaano oo xalay ka dhacay Isgoyska Baar Ubax ee degmada Howlwadaag, waxaana ku dhaawacmay shan qof oo ay ku jirto haweeney labada lugood ka go'day.

5/13/2012 3:20 AM EST
Axad, May 13, 2012 (HOL) — Maxaabiistii ugu tirada badnaa ee laga sii daayo abdi xabsiyada dalka Tanzania ayaa lasii daayay kaddib iskaashi iyo isfahan dhex-maray safaarada Soomaaliya ee dalka Tanzania iyo wasaaradda arrimaha gudaha dalkaas.

5/13/2012 3:06 AM EST
Axad, May 13, 2012 (HOL) — Ciidamada maamulka gobolka Hiiraan isla markaana uu horkacayo guddoomiyaha degmada Maxaas Muumin Max’ed Xalane oo dhawaan la magacaabay ayaa shalay gallinkii dambe gudaha u galay degmada Maxaas oo ka tirsan gobolka Hiiraan.