11/16/2018
Today from Hiiraan Online:  _
Wararka Maanta- Talaado, May 1 , 2012
Dagaal degmada Xudur ee Gobolka Bakool ku dhexmaray Ciidamada DKMG ah, kuwa Itoobiya iyo Xoogagga Al-shabaab


Talaado, May 01, 2012 (HOL) — Ugu yaraan 11-qof oo dhinacyadii dagaalamay iyo shacab isugu jira ayaa ku dhintay dagaal xalay gudaha degmada Xudur ee xarunta gobolka Bakool ku dhexmaray ciidamada DKMG ah oo garabsanaya kuwa Itoobiya iyo xoogagga Al-shabaab.

Dagaalkan oo qarxay markii xoogagga Al-shabaab ay weerarro ku qaadeen saldhig ay ciidamada DKMG ah ku lahaayeen bariga degmada Xudur ayaa wuxuu socday in ka badan saacad, waxaana dagaalkaas ku dhaawacmay dad fara badan.

Goobjoogayaal ayaa sheegay in dagaalku uu ahaa mid culus oo hubka kala duwan la isku adeegsaday, iyadoo dadka dhintay ay ku jireen laba qof oo shacab ah, kuwaas oo middood ay ahayd haweeney, sidoo kale dad dhaawacmay ayaa waxaa iyagana ku jiray shacab.

"Dagaalku wuxuu ahaa mid soo qaadeen kooxda Al-shabaab waana iska difaacnay, waxaan ka dilnay 15 ka mid ah dagaalyahannadooda," ayuu yiri guddoomiyaha gobolka Bakool ee dowladda KMG ah, Maxamed Cabdi Tool.

Guddoomiyuhu wuxuu sheegay inaysan jirin wax khasaare ah oo dhankooda kasoo gaartay dagaalka, inkastoo uu xaqiijiyay in xoogagga Al-shabaab ay gudaha u soo galeen bariga degmada ayna isaga baxeen markii uu dagaalku dhammaaday.

Afhayeenno u hadlay Al-shabaab ayaa iyaguna sheegay inay weerar qorsheysan ku qaadeen degmada Xudur ayna ku dileen ciidammo fara badan oo kuwa DKMG ah ka tirsan inkastoo aanay sheegin tiro sugan, weerarkaas kaddibna ay dib xoogaggoodu kusoo laabteen goobihii ay ka duuleen.

Xaaladda degmada Xudur ayaa saakay daggan, waxaana gacanta ku haya ciidanka DKMG ah iyo kuwa Itoobiya, iyadoo dadka degmadaas ku nool uu cabsi weyn ku beeray dagaalkii xalay oo ahaa kii ugu xogganaa ee degmadaas ay Al-shabaab ku qaaddo tan iyo markii laga qabsaday.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/1/2012 4:14 PM EST
Talaado, May 01, 2012(HOL): Qaraxan oo ay ku dhinteen Xildhibaan Yuusuf Mire Maxamuud Seeraar iyo Xildhibaan C/weli Shiikh Maxamed Aw-MaxamuudMaxamuud oo Baarlamaanka Soomaaliya ka tirsan, waxaana qaraxaas ku dhaawacmay Siyaasiga Axmed C/salaam Xaaji Aadan oo horay uga soo noqday Ra’iisal Wasaare ku xigeen iyo Xildhibaanno ay ka mid yihiin Xildhibaan Xuseen Samatar iyo Xildhibaan C/risaaq Isaaq Biixi.

5/1/2012 4:11 PM EST
Talaado,May 1, 2012 (HOL)- Madaxweyne ku xigeenka Somaliland Md:Cabdiraxmaan Cabdilaahi Ismaaciil (Saylici) ayaa kulan la yeeshay madax dhaqameedka Somaliland, kuwaas oo ka kala yimid goboladda Somaliland.

5/1/2012 10:35 AM EST
Talaado, May 01, 2012 (HOL) — Ugu yaraan saddex oo uu ku jiro nin ganacsade ah oo gaadiidka iibiya iyo ayaa ku dhintay qarax gallinkii dambe ee maanta ka dhacay jidka isku xiragaroonka isgoyska KM4 iyo garoonka diyaaradaha Muqdisho.

5/1/2012 10:17 AM EST
Talaado, May 01, 2012(HOL): Qarax is-miidaamin ah ayaa goor dhaweyd ka dhacay magaalada Dhuusamareeb ee bartamaha Soomaaliya.

5/1/2012 8:38 AM EST
Talaado, May 01, 2012 (HOL) — Ururka Midowga Afrika, Qaramada Midoobay iyo urur goboleedka IGAD ayaa warsaxaafadeed ay si wadajir ah u soo saareen maanta oo Talaado ah waxay digniin ugu jeediyeen kooxaha kasoo horjeeda dhameystirka Roadmap-ka iyo in laga gudbo xilliga KMG ah.

5/1/2012 8:11 AM EST
Talaado, May 01, 2012 (HOL) — Diyaarad maanta kasoo qaadi lahayd Degmada Doolow ee gGedo odayaal ka qayb-geli lahaa shirka lagu ansixinayo dastuurka cusub ee Soomaaliya oo Muqdisho ka dhici doona ayaa lagu rasaaseeyay, sida ay sheegeen mas'uuliyiinta dowladda ee gobolka Gedo.

5/1/2012 7:58 AM EST
Talaado, May 01, 2012 (HOL) — Samiira Xaashi oo ah gabar Soomaaliyeed oo 21-jir ah kuna noo dalka Britain oo ay dharka ka xayeysiiso ayaa Muqdisho dhawaan soo booqatay iyadoo ka sheekeysay dhibaatooyinkii ay ku aragtay, gaar ahaan dhibka haysta haweenka Soomaaliyeed ee barakacayaasha ah.

5/1/2012 7:10 AM EST
Talaado, May 01, 2012 (HOL) — Ururaddii siyaasaddda Somaliland ee qiimeyntii ku hadhay oo maanta qorshaynayey inay mudaharaad balaadhan ka dhigaan magaalooyinka ayaanay u dhicin siday rabeen, maadaama oo awood ciidan loo adeegsaday, isla markaana goobihii ay filayeen in ay iskugu yimaadaan ciidamo badan la dhigay.

5/1/2012 3:59 AM EST
Talaado, May 01, 2012 (HOL) — Xildhibaan Muuse Suudi Yalaxoow oo ka mid ah waxgaradka iyo xildhibaanno ku shiray Muqdisho kana soo horjeestay dastuurka cusub ee Soomaaliya ayaa sheegay inaysan aqbalayn dastuurka.

5/1/2012 3:39 AM EST
Talaado, May 01, 2012 (HOL) — Ururka dhalinyarada SYL II ayaa siminaar bileedkii koowaad u qabtay illaa iyo 500 oo arday ah oo ka kala tirsan qaybaha kala duwan ee ururku uu baro xirfadaha kala duwan, waxaana goobjoog ka ahaa macalimiinta, marti sharaf kale iyo masuuliyiinta SYL II.

5/1/2012 3:19 AM EST
Talaado, May 01, 2012 (HOL) — Afhayeenka xukuumadda KMG ah ee Soomaaliya ahna la-taliyaha ra’iisul wasaaraha Soomaaliya, Inj. C/ramxaan Cumar Cismaan (Yariisow) oo si kulul uga jawaabay hadallo kasoo yeeray kooxo uu ku tilmaamay qaswadayaal kuwasoo uu sheegay inay maalmahan bulshada Muqdishu ku kiciyaan hab beel iyagoo si khalad ah ugu fasiraya qabyo-qoraalka-dastuurka.

5/1/2012 3:03 AM EST
Talaado, May 01, 2012 (HOL) — Danjirihii Soomaaliya u fadhiyay dalka Yemen Allaha u naxariisteen, Axmed Aadan Cismaan ayaa xalay ku geeriyooday isbitaal ku yaalla magaalada Sanca ee xarunta dalka Yemen, isagoo u geeriyooday xanuun ka asiibay beerka.