9/20/2018
Today from Hiiraan Online:  _
Wararka Maanta- Talaado, Jun 5 , 2012
Madaxweynaha Dalka Uganda oo Madaxda Soomaalida ugu baaqay inay ka fogaadaan khilaafyada Siyaasadeed


Talaado, June 05, 2012 (HOL) — Madaxweynaha dalka Uganda, Yoweri Museveni ayaa uga baaqay madaxda Soomaalida inay ka fogaadaan khiaafyada siyaasadeed ee soo laalaabtay muddada yar ee ka harsan ka bixitaanka xilliga KMG ah.

Museveni ayaa kulan looga hadlay arrimaha Soomaaliya kula yeeshay dalka Turkiga madaxweynaha Soomaaliya, Shariif Sheekh Axmed iyo ra'iisul wasaaraha, Cabdiweli Maxamed Cali, kaddib markii uu dhammaaday shirkii Istanbuul II.

"Ammaanka Soomaliya oo la adkeeyo iyo in dadku ay helaan nabad ay ku doortaan hoggaamiyeyaashooda waxay ku xiran tahay hadba horumarka laga sameeyo isku xirka bulshada," ayuu yiri Museveni.

Madaxweynaha Uganda wuxuu sheegay in Soomaalida aysan xilligan ku habboonayn inay go'aansadaan inay odayaasha-dhaqanka beelaha u wakiishaan inay soo xulaan xubnihii bedeli lahaa kuwa hadda shaqeynaya marka la gaaro bisha Ogoosto.

Sidoo kale, Museveni wuxuu ku adkeeyay madaxda Somalida in odayaasha beelaha ay soo xulaan xubno lagu kalsoon yahay, kuwaasoo uu sheegay inay xal ka gaari karaan murannada taagan.

"Waxaan idin kaga digayaa inuu idin soo dhexgalo khaladaad siyaasadeed, kuwaas oo waxyeeleyn kara howlaha Roadmap-ka ee lagu dhameystirayo xilliga KMG ah," ayuu Museveni kula taliyay madaxda Soomaalida.

Madaxweynaha Soomaaliya ayaa uga mahadceliyay Museveni talooyinka uu siiyay, isagoo sheegay in khaladaad ay imaan karaan, balse ay ku dadaali doonaan sidii ay ku sixi lahaayeen. Isagoo intaas ku daray in odayaasha-beelaha ay dhisi doonaan guddi xaliya khilaafaadyada.

Sidoo kale, ra'iisul wasaaraha Soomaaliya ayaa isaguna ka mahadceliyay fikirka ku aaddan in doorashada madaxda ay noqoto mid ka timaadda dadweynaha, wuxuuse intaas ku daray in dalka uusan xilligan u diyaarsanayn arrintaas.

Cabdiweli Gaas, wuxuu dhinaca kale soo dhaweeyay taageerada dowladda Uganda ee dhinaca ciidamada ah, isagoo u sheegay Museveni in shacabku ay si rasmi ah u soo dooran doonaan hoggaamiyeyaashooda, balse la joogo xilligii ay odayaasha beeluhu shaqeyn lahaayeen.

Ugu dambeyn, madaxweynaha Uganda ayaa sheegay in joogitaankooda Soomaaliya uu caddeyn u yahay sida ay uga go'an tahay inay shacabka Soomaaliyeed ka caawiyaan sidii ay u xaqiijin lahaayeen lasoo laabashada xorriyadooda, ayna ku gaari lahaayeen xilli ay hoggaamiyeyaashooda soo doortaan.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
6/5/2012 12:16 PM EST
Talaado, June 05, 2012(HOL): Seminaar uu soo qabanqaabiyay ururka xirfadleyda dhaqaaatiirta xoolaha ee Gobolka Banaadir (BENALPA) loogana hadlayo caafimaadka bulshada ayaa maanta lagu furay magaalada Muqdisho iyadoo ay ka qeybgaleen in ka badan 30 ruux oo ka kala socday wasaaradaha caafimaadka, xanaanada xoolaha iyo beeraha, ururada bulshada iyo hal-abuurayaal.

6/5/2012 8:55 AM EST
Talaado, June 05, 2012 (HOL) — Dr. C/raxmaan Macallin C/llaahi (Baadiyoow) oo ka mid ah aqoonyahannada Soomaaliyeed ayaa maanta sheegay inuu ka qaybgalayo doorashada madaxweynimo ee Soomaaliya oo lagu wado inay dhacdo bisha Ogoosto ee sannadkan.

6/5/2012 8:17 AM EST
Talaado, June 05, 2012 (HOL) — Madaxweynihii Somaliland, ahna Guddoomiyaha xisiga UDUB, Daahir Rayaale Kaahin ayaa markii ugu horreysay sheegay in lasoo afjaray khilaafkii xisbiga ka jiray, isla markaana hadda la billaabay dardarp-gelinta howlaha xisbiga.

6/5/2012 8:07 AM EST
Talaado, June 05, 2012 (HOL) — Maamulka Ahlu Sunna Waljameeca ee bartamaha dalka Soomaaliya ayaa sheegay in ay cafis u fidiyeen dhalinyarro ah oo horay uga tisaneyd sida ay sheegeen Xarrakada Mujaahidiinta Al-shabaab.

6/5/2012 8:04 AM EST
Talaado, June 05, 2012 (HOL) — Hay'adda UNHCR ayaa warbixin ay maanta oo Talaado ah soo saartay ku sheegtay in weli Soomaaliya ay ka jiraan caqabado ku qabsanaya dadka inay ka cararaan deegaannadooda.

6/5/2012 7:34 AM EST
Talaado, June 05, 2012 (HOL) — Ugu yaraan lix qof ayaa ku dhintay dagaal culus oo saakay xoogagga Al-shabaab iyo kuwa Ahlusuna ku dhexmaray deegaanno u dhexeeya degmooyinka Guriceel iyo Ceelbuur oo kawada tirsan gobolka Galguduud.

6/5/2012 7:15 AM EST
Talaado, June 05, 2012 (HOL) — Maxkamadda gobolka Banaadir ayaa maanta xukun 15-sano ah ku ridday ku-xigeenka xeer ilaaliyaha guud ee Qaranka, Cali Maxamed Yuusuf kaasoo lagu eedeeyay inuu galay dambiyo ay ka mid yihiin inuu isticmaalay awood uusan lahayn.

6/5/2012 6:46 AM EST
Talaado, June 05, 2012 (HOL) — Ugu yaraan afar askari oo kawada tirsan ciidanka dowladda KMG ah ayaa ku dhintay tiro intaas ka badanna way ku dhaawacmeen dagaal xalay saqdii dhexe ciidammo ka kala tirsan booliiska iyo milateriga DKMG ah ku dhexmaray degmada Afgooye ee gobolka shabeellada hoose.

6/5/2012 3:44 AM EST
Talaado, June 05, 2012 (HOL) — Xildhibaano iyo siyaasiyiin ka tirsan Somaliland, ayaa cambaareeyey xukunkii lagu xukumay masuuliyiintii lagu eedeeyey lunsiga raashinka mucaawimadda ah,kuwaas oo lagu xukumay saddex sanno iyo mid ka mid isna lagu xukumay hal sanno oo xadhig ah.