9/23/2018
Today from Hiiraan Online:  _
Wararka Maanta- Talaado, Jun 5 , 2012
Xildhibaanno iyo Siyaasiyiin ka hadlay xukunkii lagu riday Saddexdii Mas'uul ee lagu Eedeeyay Leexsashadda Raashin Mucaawimo ah


Talaado, June 05, 2012 (HOL) — Xildhibaano iyo siyaasiyiin ka tirsan Somaliland, ayaa cambaareeyey xukunkii lagu xukumay masuuliyiintii lagu eedeeyey lunsiga raashinka mucaawimadda ah,kuwaas oo lagu xukumay saddex sanno iyo mid ka mid isna lagu xukumay hal sanno oo xadhig ah.

Xildhibaano iyo siyaasiyiin aanu xukunkaasi wax ka waydiinay ayaa siyaabo kala duwan uga hadlay, isla markaana sheegay inay ku faraxsan yihiin racfaanka laga qaatay, taas oo ahayn bay yidhaahdeen xukun si cadaalad ah u dhacay.

XIldhibaan Ibraahim Jaamac Cali (Rayte) oo ka mid ah golaha wakiiladda Somaliland oo sida uu u arko xukunkaasi ka hadlaya waxa uu yidhi "Maxkamadii dadkii la socday ilaa bilowgeedii ayaan ahaa ee dhagaysan jiray baan ahaa, cadaaladda waxa laga eegaa go’aanka dadku sameeyaan iyo ka xaakunku sameeyo, haddii ay aad u kala fogaadan sida ay dadku u arkeen xukunka iyo xukunka uu gaadhay garsooruhu cadaalad daro ayaa ka jirta", waxaanu intaas ku daray " waxaan u arkaa in lagu sadqeeyey cadaaladii Somaliland, sida ay dadku kalsooni ugu heli doonaan dadku anigu garan maayee, waa wax aad uga fog cadaaladda iyo aragtida guud ee dadweynaha, inay Somaliland maanta arrintan oo kale ka suurtogasho waa nasiib daro aad u weyn"ayuu yidhi xildhibaan Rayte.

Xildhibaan Cabdiqaadir Maxamed Xasan (Indho indho) oo ka tirsan golaha Guurtidda Somaliland oo isna aragtidiisa ka dhiibanayey go’aankii maxkamadda gobolka Hargeysi ku xukuntay rag masuuliyiin ah waxa uu yidhi " Ummadda ilaahay oo dhan markhaati ayey ka ahayd arrintaasi oo maxkamadda ayaa aroor walba la tagi jiray qof kaliya oo markhaati ku fura waa la waayey, maxkamadii waxay tidhi waxaas ayaan xukumay, wixiii ummadda oo dhan arkaysay in la yidhaa waa sidaas waa sharci daro, waxaan u mahadnaqayaa looyaradii degdega u qaatay racfaanka ayaan u mahadnaqayaa", waxaanu raaciyey "meeshaas aniga aragtidayda inay halkaasi cadaalad daro ka dhacday ayaan u arkaa ummadani maalin walba way joogtay, laba cisho ayaan tagoo kolay labaatan qof oo markhaati ah waan taagnaa, qof yidhaa saddexdaas nin baa wax lagu haystaa maan arag, maxkamadana waxaan ka filayey inay tidhaahdo waxbaa lagu waayey ayaan ka filayey, laakiin Aayad quraan ah maaha waxay tidhi maxkamadu ee racfaanka ay qaateen looyaradda ayaan taageerayaa"ayuu yidhi Xildhibaan Cabdiqaadir.

"Anigu lama yaabani xukunka maxkamadda cidii isbedelkan kulmiye sheegayo u haystay cadaalad oo dulmiga ka qaadayo cida aaminsan ayaa la yaaban, laakiin ninka sii garanayey ee sheegay in abaar laga guurayo oo abaar kale loo guurayo la yaabi maayo, maxkamadda si fiican ayaa loo dhagaystay in aanay bilaa dambi ahayn way cadayd"ayuu yidhi Afhayeenka xisbiga UDUB Cali Yuusuf (Cali Gurey) oo naqdiyayey xukunkii maxkamadda gobolka Hargeysa masuuliyiin ku xukuntay xukuno kala duwan.

"waxaan cadaynayaa anigu cadaalad daro aanu tolnahay ma jirto, mid aanu ilmaadeer nahay oo cadaalad daro samaynayaa oo aan ogolnahay ma jirto "ayuu Raaciyey afhayeenka xisbiga UDUB Cali Gurey.

Si kastaba ha ahaatee, dadweynaha magaaladda Hargeysa ayaa aragtiyo kala duwan ka bixiyey xukunkaasi ku dhacay saddexda masuul, iyadoo qaar taageersan iyo kuwa ka soo horjeedaaba ay jiraan xukunkaasi.

Barkhad-Ladiif M. Cumar
[email protected]
Hargeysa, Somaliland







Click here
6/5/2012 12:16 PM EST
Talaado, June 05, 2012(HOL): Seminaar uu soo qabanqaabiyay ururka xirfadleyda dhaqaaatiirta xoolaha ee Gobolka Banaadir (BENALPA) loogana hadlayo caafimaadka bulshada ayaa maanta lagu furay magaalada Muqdisho iyadoo ay ka qeybgaleen in ka badan 30 ruux oo ka kala socday wasaaradaha caafimaadka, xanaanada xoolaha iyo beeraha, ururada bulshada iyo hal-abuurayaal.

6/5/2012 8:55 AM EST
Talaado, June 05, 2012 (HOL) — Dr. C/raxmaan Macallin C/llaahi (Baadiyoow) oo ka mid ah aqoonyahannada Soomaaliyeed ayaa maanta sheegay inuu ka qaybgalayo doorashada madaxweynimo ee Soomaaliya oo lagu wado inay dhacdo bisha Ogoosto ee sannadkan.

6/5/2012 8:17 AM EST
Talaado, June 05, 2012 (HOL) — Madaxweynihii Somaliland, ahna Guddoomiyaha xisiga UDUB, Daahir Rayaale Kaahin ayaa markii ugu horreysay sheegay in lasoo afjaray khilaafkii xisbiga ka jiray, isla markaana hadda la billaabay dardarp-gelinta howlaha xisbiga.

6/5/2012 8:07 AM EST
Talaado, June 05, 2012 (HOL) — Maamulka Ahlu Sunna Waljameeca ee bartamaha dalka Soomaaliya ayaa sheegay in ay cafis u fidiyeen dhalinyarro ah oo horay uga tisaneyd sida ay sheegeen Xarrakada Mujaahidiinta Al-shabaab.

6/5/2012 8:04 AM EST
Talaado, June 05, 2012 (HOL) — Hay'adda UNHCR ayaa warbixin ay maanta oo Talaado ah soo saartay ku sheegtay in weli Soomaaliya ay ka jiraan caqabado ku qabsanaya dadka inay ka cararaan deegaannadooda.

6/5/2012 7:34 AM EST
Talaado, June 05, 2012 (HOL) — Ugu yaraan lix qof ayaa ku dhintay dagaal culus oo saakay xoogagga Al-shabaab iyo kuwa Ahlusuna ku dhexmaray deegaanno u dhexeeya degmooyinka Guriceel iyo Ceelbuur oo kawada tirsan gobolka Galguduud.

6/5/2012 7:15 AM EST
Talaado, June 05, 2012 (HOL) — Maxkamadda gobolka Banaadir ayaa maanta xukun 15-sano ah ku ridday ku-xigeenka xeer ilaaliyaha guud ee Qaranka, Cali Maxamed Yuusuf kaasoo lagu eedeeyay inuu galay dambiyo ay ka mid yihiin inuu isticmaalay awood uusan lahayn.

6/5/2012 6:46 AM EST
Talaado, June 05, 2012 (HOL) — Ugu yaraan afar askari oo kawada tirsan ciidanka dowladda KMG ah ayaa ku dhintay tiro intaas ka badanna way ku dhaawacmeen dagaal xalay saqdii dhexe ciidammo ka kala tirsan booliiska iyo milateriga DKMG ah ku dhexmaray degmada Afgooye ee gobolka shabeellada hoose.

6/5/2012 4:10 AM EST
Talaado, June 05, 2012 (HOL) — Madaxweynaha dalka Uganda, Yoweri Museveni ayaa uga baaqay madaxda Soomaalida inay ka fogaadaan khiaafyada siyaasadeed ee soo laalaabtay muddada yar ee ka harsan ka bixitaanka xilliga KMG ah.