8/19/2019
Today from Hiiraan Online:  _
Wararka Maanta- Axad, July 8 , 2012
Guddoomiyaha Gobolka Hiiraan oo sheegay in Ciidamada Jabuuti ay ka qayb-qaadan doonaan dib-u-hishiisiinta


Axad, July 08, 2012 (HOL) — Guddoomiyaha maamulka gobolka Hiiraan Cabdifataax Xasan Afrax oo wareysi siinayay laanta afka Soomaaliga ee BBC-da ayaa ka warbixiyay xaaladaha amaanka iyo siyaasada gobolka Hiiraan.

Waxaa uu sheegay in ciidamada maamulka gobollka oo kaashanaya kuwa Itoobiya ku guuleysteen in ay wax badan ka qabtaan amaanka magaalada Baladweyne oo hadda sida uu hadalka u dhigay ah mid leysku haleyn karo.

"Waxaan dib u habeyn ku sameynay laamahii nabad-galyada, waxaana magaalada ka hergalinay ilaa afar saldhig baliis, madaama markii hore magaaladu ay laheyd hal saldhig baliis, laakiin hadda waa ay balaaratay magaalada, sidaa daraadeed lagama maar-maan ayeey noqontay in aynu badino saldhigyada ciidamada si nabad-galyada wax badan looga qabto,’’ ayuu yiri guddoomiyaha gobollka Hiiraan.

Mar uu soo hadal qaaday howlgalka ciidamada Jabuuti ee ka tirsan kuwa midowgga Africa oo hadda tiro kooban oo hore dhac ah ka joogaan magaalada Baladweyne waxaa uu sheegay in ciidamadaasi aheyn oo kaliya kuwa qeyb ka qaadan doona howlgalada militari, laakiin gacan ka geysan doonaan nabadeynta iyo dib u hishiisiin laga dhax abuuro qeybaha bulshada ku wada dhaqan gobolka Hiiraan.

"Sida aad la soctaan ciidamada Jabuuti marka laga soo tago magaca AMISOM oo ay ku howlgalayaan waxaa jira magac madaxweynaha Jabuuti u bixiyay oo ah ‘’Hiil Walaal’’ sidaa daraadeed gacan ayeey ka geysan doonaan adeegyada bulshada sida dib u hishiisiinta,’’ ayuu yiri C/fitaax Xasan.

Waxaa uu sheegay in kulamo badan uu la qaatay mas’uuliyiinta dowladda Jabuuti iyo saraakiisha hogaamineysa ciidamada dhamaantoodna ay ka wada hadlleen shaqada ciidamada Jabuuti ee la filayo in ay ka howlgalaan gobollka Hiiraan.

Guddoomiyaha maamulka gobolka Hiiraan waxaa uu sidoo kale ka hadllay waxa maamulkiisa uga qorsheysan dhalinyarrada ka tirsan kooxda Al-shabaab ee wali ku harsan qeybo ka mid ah gobollka, isaga oo sheegay in ujeedada maamulkiisu aheyn oo kaliya in dagaal wax lagu xaliyo.

"Qorshaheenu ma’aha in aan dagaal oo kaliya wax ku xalino, dhinacyo badan oo looga wareegi karo dagaal ayaa jira, marar badan nabad ayaan ku baaqnay haddana wali waan ku baaqeynaa, walow ragga naga soo horjeeda ay dagaal go’aansadeen,’’ ayuu yiri guddoomiyaha gobolka Hiiraan.

Dhinaca gargaarka waxaa uu sheegay in hay’adihii samafalka dib shaqadoodii u bilaabeen, isaga oo tusaale u soo qaatay hay’’adda Save The Childaren oo uu sheegay in ka badan 10, 000 oo qoys in ay siiso bil walba lacago biil ah oo loogu badalay gargaarkii kale ee la siin jiray.

Sidoo kale waxaa uu sheegay in hay’addo ay ka mid yihiin ICRC, UNHCR, iyo UNICEF ka wadaan magaalada howlihii gargaarka, kuwa kalana la rajeynayo in ay sida ugu dhaqsiyaha badan shaqadooda u bilaabaan.

C/raxmaan Diini, Hiiraan Online
[email protected]
Baladweyne, Soomaaliya










Click here
7/8/2012 2:15 PM EST
Axad, July 08, 2012(HOL): Kulan balaadhan oo ay soo abaabuleen Ururka Ardayda Soomaaliyeed SYDRC aya ka dhacay magaaladan London, Shirkan oo ay kasoo qaybgaleen arday waxka barata jaamacadaha Qaaradan Yurub gaar ahaan dalka Ingiriiska,Kulankan waxa kasoo qaybgalay qaar ka mid ah madax sar sare oo wax ka dhiga jaamacada dalkan Ingiriiska,Haween ka socda dawlada Hoose iyo dhalinyaro Soomaali ah oo ka mid ah madaxda Dawlada hoose ee qayb ka mid ah xaafadaha London.

7/8/2012 11:33 AM EST
Axad, July 08, 2012(HOL): Siyaasiga Yaasiin Maaxi Macallin ayaa musharaxnimadiisa madaxweynenimada Soomaaliya kaga dhawaaqay Magaalada Katrinholm ee dalka Sweden, isagoo xafladdii musharaxnimadiisa ka sheegay in haddii la doorto uu isbedel ku sameyn doono Soomaaliya.

7/8/2012 9:29 AM EST
Axad, July 08, 2012 (HOL) — Guddiga ammaanka Qaranka ayaa sheegay in jidadka Muqdisho qaarkood si KMG ah loo xirayo laga bilaabo 10-ka bishan oo ku beegan maalinta Talaadada ah ee soo socota, iyagoo sheegay in wadooyinka ay xirnaan doonaan muddo laba todobaad ah.

7/8/2012 9:03 AM EST
Axad, July 08, 2012 (HOL) — Boqor Cismaan Aw Maxamuud Buur Madow oo muddo ka badan boqol cisho u xidhnaa dambiyo lagu soo Oogay ayaa maanta lagu xukumay hal sanno oo xadhig ah, ka dib markii la sheegay in lagu helay eeddo ah ceebeen iyo kicin dadweyne.

7/8/2012 8:47 AM EST
Axad, July 08, 2012 (HOL) — Ugu yaraan hal qof ayaa ku dhintay, ruux kalena wuu ku dhaawacmay dagaal kooxo hubeysan ku dhexmaray deegaanka Balli-Howd oo ka tirsan gobolka Galguduud ee bartamaha Soomaaliya.

7/8/2012 8:17 AM EST
Axad, July 08, 2012 (HOL) — Wasiirka arrimaha gudaha DKMG ah ee Soomaaliya, C/samad Macallin Maxamuud ayaa sheegay maanta oo Axad ah in hay'adaha iyo shirkaha aan diiwaan-gashanayn aysan ka shaqeyn karin gudaha dalka, sidoo kalena wuxuu ka digay in magaalada Muqdisho lagu qaato hub aan sharci loo haysan.

7/8/2012 8:02 AM EST
Axad, July 08, 2012 (HOL) — Golaha wakiilada Puntland oo labadii maalmood ee ugu dambeeyay ka doodayay xaaladda gobolka Sool, gaar ahaan magaalada Laas-Caanood oo muddo ka maqan gacanta dowlada Puntland ayaa maanta isku raacay in dowladda ay go'aan cad ka qaadato arrinta magaalada Laascaanood.

7/8/2012 7:48 AM EST
Axad, July 08, 2012 (HOL) — Alla ha u naxariistee waxa shalay galab geeri naxdin lihi ka dhacday jidka u dhexeeye Berbera iyo Hargeysa, kaas oo galaaftay saddex qof oo isku qoys ah iyo nin kale oo la socday, halkaas oo ay afartooduba ku geeriyoodeen.

7/8/2012 7:29 AM EST
Axad, July 08, 2012 (HOL) — Xukuumadda Eritrea ayaa eedeymo aan sal iyo raad lahayn ku tilmaantay eedeymo uu Mareykanku u jeediyay laba sarkaal oo ka tirsan ciidamadeeda kuwaasoo lagu soo rogay cunno-qabteyn dhinaca maaliyadda ah.

7/8/2012 2:01 AM EST
Axad, July 08, 2012 (HOL) — Ciidamada Midowga Afrika ee AMISOM ayaa yeeshay afhayeen cusub oo ka mid ah saraakiisha ciidamada Jabuuti ee ku sugan Soomaaliya, isagoo howsha kala wareegi doona afhayeenkii hore ee AMISOM Col. Paddy Ankunda oo u dhashay dalka Uganda.

7/8/2012 1:45 AM EST
Axad, July 08, 2012 (HOL) — Kooxo hubeysan ayaa xalay ku dhaawacay degmada Wadajir ee gobolka Banaadir, wariye C/qaadir Cumar Cabdulle (Kuwaral) oo ka mid ahaa wariyeyaasha telefishinka Universal, iyadoo dhaawaca wariyaha la dhigay isbitaalka Madiina.