Guddiga Maaliyadda Baarlamaanka Soomaaliya oo sheegay inay baqdin ka qabaan in la kala diro, maadaama uu Shariif Xasan guuleystay

Isniin, May 31, 2010 (HOL) − Guddoomiye ku xigeenka Guddiga Maaliyadda ee Baarlamaanka Soomaaliya Xildhibaan Maxamed Sheekh Cali (Woosh) oo saxaafadda kula hadlay Muqdisho ayaa sheegay inay baqdin ka qabaan in guddigooda la kala diro.

Mudanuhu wuxuu sheegay in guddigooda uu muddo dheer baaritaanno ku hayay Wasiirro ka tirsan Dowladda oo lunsaday Hanti Qaran, kuwaasoo uu ka mid ahaa Wasiirkii Maaliyadda Shariif Xasan oo haatan ah Guddoomiyaha Baarlamaanka.

"Guddoomiyaha Baarlamaanka Shariif Xasan wuxuu qorsheynayaa inuu kala diro guddigeena, maadaama uu ku guuleystay xilka ugu sarreeya Baarlamaanka, sidoo kalena waxaa burburay dacwaddii loo haystay" ayuu yiri Xildhibaan Max'ed Woosh.

Xildhibaankan wuxuu sheegay in guddoomiyahooda uu safar dibaddaha kasoo laabtay shalay uuna ku wareejiyay xilka, isagoo ku tilmaamay doorashadii uu kusoo baxay Shariif Xasan Sheekh Aadan inay ahayd mid aan sharciga waafaqsanayn.

Mudanayaasha ka tirsan guddiga Maaliyadda Baarlamaanka Soomaaliya ayaa waxay buuq ku kiciyeen Xildhibaan Shariif Xasan markii uu doonayay inuu jeediyo aragtidiisa ku aaddan wuxuu qabanayo markii uu xilka ku guuleysto.

Guddigan ayaa waxay sidoo kale dacwad ka dhan ah 10-wasiir oo uu ku jiray Wasiirkii hore ee Maaliyadda oo loo doortay Guddoomiyaha cusub ee Baarlamaanka Shariif Xasan Sheekh Aadan ay u gudbiyeen Xeer Ilaaliyaha guud ee Qaranka.

Maxamed Xaaji Xuseen, Hiiraan Online
[email protected]
Muqdisho, Soomaaliya