Caruur u dhimatay Caano sumeysan oo ay ku cabeen duleedka Magaalada Beledweyne

Arbaco, March 04, 2009(HOL): Inta la og-yahay saddax caruur ah ayaa ku geeriyoootay Tuulo lagu magacaabo Jacfoor oo 65-km dhinaca Galbeed kaga beegan Magaalada Beledweyne kadib markii sida wararku sheegayaan caruurtaasi ay cabeen Caano loo maleynayo in ay sumeysnaayeen.
 
Sida uu sheegay Waxgarad ka tirsan dadka deegaanka dhibaatadu ka dhacday sidoo kale waxaa iyaguna jira Caruur kale oo ku miyir-doorsoontay Caanaha kuwaasoo lala tacaalayo xaaladdooda Caafimaad, isagoo intaas ku daray in ay tahay markii ugu horreysay oo sidan oo kale ay ka dhacdo deegaanka uu ku nool yahay.
 
Lama oga sababta keentay in Caanahaasi ku sumoobaan Caruurta hase ahaatee waa suurtagal ah in dhibaatadu ka timid daawada inta badan Reer-Miyigu mariyo Jirka Xoolaha oo idil taasoo marka Neefka la lisayo saameyn ku yeelatay Caanaha.
 
Dadka iyagu ka Ganacsada Daawada Xoolaha iyo Dhaqaatiirtuba waxaa ay ku booriyaan dadka reer Miyiga ah in aan Daawada la taabsiin Naasaha Xoolaha, islamarkaana Neefka uusan lisin qofka isagoo aan si wanaagsan isaga dhaqin gacmaha maadaama daawadu tahay Sun waxyeello gaarsiin karta dadka Bani'aadaamka ah, laakiin hadana waxaa muuqaneysa in inta badan reer Miyigu aaney arintaas ku baraarugsaneyn.
 
C/raxmaan Diini, Hiiraan Online
[email protected]
Beledweyn, Somalia