Gudoomiyaha Gobalka Hiiraan Yuusuf Dabageed oo dib ugu soo laabtay Magaalada Beledweyne

Sabti, April 05, 2008(HOL): Guddoomiyaha Gobalka Hiiraan Yuusuf Axmed Hagar Dabageed ayaa dib ugu laabtay Magaalada Beledweyne kadib markii Maalmihii aynu soo dhaafnay uu ku sugaan Degmada Buulo-Burte ee Gobalka Hiiraan oo uu dagaal culus ku dhaxmaray Kooxaha ka soo horjeda Dowladda Federaalka iyo Ciidamo ka kala tirsan Goballada Hiiraan iyo Shabeelada dhexe.
 
Guddoomiyaha Gobalka oo uu wehliyo Ku-xigeenka Gudoomiyaha Gobalka Shabeelada dhexe Axmed Cumar Xabeeb Jaandhaay ayaan wax hadal ah u jeedin dadweyne isugu soo baxay Xarunta Maamulka Gobolka isagoo markiiba abaaray Guriga uu  ka degna yahay Magaalada.
 
Ciidamada Maamulka ee la socday Guddoomiyaha Gobalka Hiiraan ayaa bilaabay in ay xiraan is goosya soo gala Guriga Gudoomiyaha Gobalka Hiiraan, waxaana sidoo kale Ciidamo aad u hubeysan la dhigay qaar ka mid ah Xarunta Maamulka Gobalka iyo Sadhiga Booliska  oo markii hore lagu arki jiray Ciidamada Itoobiya.
 
Inkastoo Yuusuf Dabageed la oran karo si dhab ah uguma guuleysan howlihii uu u tegay Degmada Buulo-Burte iyo Deegaannada hoostaga, hadana waxaa  dhinaca kale  la oran karaa waxaa uu suurtagaliyay in ay gaaraan Degmada Buula-barde  Ciidamo ka tirsan kuwa Dowlada Itoobiya oo hadda firiisin cusub ka sameystay halka lagu magacaabo Bardaha oo dhinaca Waqooyi wax ka yar 3 km kaga beegan Degmada Buulo-Burte.
 
Lama oga waxa uu ka qaban doono Guddoomiyaha Gobalka Hiiraan xaalada Nabad-galyo ee Magaalada Beledweyne oo maalmihii aynu soo dhaafnay ay ka dhaceen Qaraxyo dhowr ah oo lala beegsaday Ciidamada Itoobiya ee Jooga Deegaanka Janta-kuundisho Xilli ay ku sugaayeen Gudaha Magaalada.
 
C/raxmaan Diini, Hiiraan Online
[email protected]
Beledweyn, Somalia