Talaado, July, 03, 2018 (HOL) - Madaxweynaha
Somaliland Muuse Biixi Cabdi ayaa qasriga madaxtooyada ku casuumay qaar kamid
ah ardaydii ka qalin-jabisay dugsiga ABAARSO, macallimiinta iyo xubnaha guddida
waalidiinta dugsigaas.
Maamulka iyo gudida waalidiinta dugsiga Abaarso
ayaa madaxweynaha uga warbixiyey kaalinta uu dugsigoodu kaga jiro
waxbarashadda, iyo in arday ka baxda waxbarasho dibadeed ka helaan jaamacado
badan oo dibadda, kuwaas oo darajooyin sarsare ka galla jaamacadaha la geeyo.
Xamse Faysal Caabbi iyo Ubax Cabdi Cali oo kamid
ah ardaydii hore ugu baxday Dugsiga Abaarso oo waqtigan waxbarasho ugu jira
jaamacadaha dibadda, ayaa sheegay inay aqoon iyo cilmi noloshooda saamayn ku
yeeshay ka barteen dugsigaas, iyaga oo arday kasta oo waxbarasho dibadeeda u
baxana ka codsaday in wixii uu soo bartay uu dadkiisa iyo dalkiisa dib ugula
soo noqdo.
Madaxweyne Biixi ayaa si weyn ugu mahadceliyey
maamulka, ardayda, waalidiinta iyo guddida dugsiga Abaarso, waxana uu sheegay
in xukuumad ahaan ay diyaar u yihiin inay si buuxda u garab taagan yihiin
dugsigaas, maadaama uu soo saarayo arday aqooddooda aqooneed ku muujiyey
jaamacadaha dibadda ay ay tagaan, waxana isaga oo arrimahaas ka hadlaya uu
yidhi, “Ardayda waxan ku hambalyeynayaa dhibcaha wanaagsan ee ay keenaan marka
ay jaamacadaha dibadda tagaan iyo sharafta ay soo hooyaan, waddada ay guusha u
marayaan, sida ay u dedaaleen, dhibaatooyinka ay arday ahaan marayaan iyo halka
ay ka gaadheen ee ah jaamacadaha ugu waaweyn adduunkana aad iyo aad baan ugu
bogaadinayaa, Dugsiga Abaarso iyo maamulkooda si mug leh baanu ula shaqaynaynaa
dhinac walba.”
Dugsiga Abaarso oo ku yaalla duleedka magaalada
Abaarso oo dhinaca galbeedka kaga beegan caasimadda Somaliland ee Hargeysa,
ayaa waxaa wax ka barta Arday tiro badan oo reer Somaliland ah, kuwaas oo marka
ay dhammaystaan waxbarasho ka hela jaamacadaha ugu magaca weyn dunida ee ay
kamidka yihiin YALE, Connecticut Massachusetts( MA), HARDVARD, COLOMBIA New
York(NY), BROWN, Rhode Island iyo Amherst, waxana ardaydan uu madaxweynuhu la
kulmay ay isugu jiraan kuwo soo qalin jabiyey oo dalka kusoo laabtay, qaar
waxbarashadoodii ku dhex jira iyo kuwo haatan tegaya.
Barkhad-ladiif M. Cumar,
Hiiraan Online
[email protected]
Hargeysa, Somaliland.
