Talaado, July, 03, 2018 (HOL)–Dowladda Soomaaliya ayaa u direysa dalka Canada wafdi sare
oo la sheegay inay ka shaqeynayaan siddii loo xoojin lahaa xiriirka labada dal.
"Dowladda Soomaaliya waxay
xoojineysa xiriirka Canada.. halkan waxaa imaan doonna wafdi sare oo dowladda
ka socda." ayuu yiri Wasiirka Qorsheynta iyo Xiriirka Calaamiga ah ee
Soomaaliya, Amb Jamaal Maxamed Xasan oo ku sugan dalka Canada.
Soomaaliya kuma laha saafarad dalka
Canada, jaaliyadda Soomaalida ee ku nool dalka ayaa lugu tilmaama jaaliyadda
ugu badan ee Afrika,xiriir toos ah oo ay dowladda la yeelato Canada ama xataa
safaarad ay Soomaaliya dalka ku yeelato , waxaa laga dhaxlaya deeqaha ay Canada
siiso Soomaaliya si rasmi ah dowladda inay u gaarto, halka ay xilligan Canada
mariso hay'adaha Qaramada Midoobay.
Hoggaamiyayaasha jaaliyadda
Soomaalida ee dalka Canada ayaa markiiba soo dhaweeyay qorshaha dowladda ,waxaa
ay dowladda ku dhiirrigaliyeen si dhaqso ah in looga shaqeeyo siddii mar kale
dib loogu furi lahaa safaaradda Soomaaliya ee dalka Canada.
Iman Mohamed Jama, Hiiraan Online
Nairobi, Kenya