Saraakiil dhalinyaro ah oo markii ugu horeysay loo dhiibay hogaanka qaar ka mid ah saldhigyada gobolka Banaadir
Isniin, Janaayo, 15, 2018 (HOL) – Arrintan ayaa u muuqatay tallaabo sare loogu
qaadayo Tayada ciidamada Booliiska Soomaaliyeed oo markii ugu horeysay
taliyayaal u qaadanaya saraakiil dhalinyaro ah oo ka baxday Jaamacadaha dalka.
Madaxweynaha dowladda Soomaaliya Maxamed Cabdullaahi Farmaajo ayaa ugu
baaqay taliska Booliiska in taliyayaasha
ciidamada loo magacaabo dhalinyarada wax baratay ee da’yarta ah.
Labo ka mid ah dhalinyaradii ka baxday jaamacadaha ee ku biiray Taliska
Booliska, oo dhawaan darajooyin loo xiray ayaa loo magacaabay Taliyeyaasha
Saldhigyada Booliska degmooyinka Shibis iyo Boondheere.
Cali Xasan Axmed ayaa loo magacaabay Taliyaha Saldhigga Booliska degmada
Shibis, halka Cabdi Wakiil C/llaahi loo magacaabay taliyaha Booliska saldhiga
degmada Boondheere, waxaa xilalka laga qaaday taliyeyaashii hayay oo ahaa kuwo
aad uga da’ weynaa dhalinyaradan la magacaabay.
Waa dhiiri-galin taliska Booliisku u sameynayo dhalinyarada Soomaaliyeed ee
dalka wax ku baratay si ay qab uga noqdaan sugida Amniga dalka.
C/raxmaan Diini,
Hiiraan Online
[email protected]
