Wasiir Cawad ‘’ Wey-nu ku taageernay Sacuudiga in aan la soo fara-galin siyaasadeeda gudaha
Khamiis, August, 09, 2018 (HOL)–Wasiirka Wasaarrada arrimaha dibedda Soomaaliya Axmed Ciise Cawad ayaa markii
ugu horeysay ka hadlay go’aanka dowladda Soomaaliya ay ku garab istaagtay
dowladda Sacuudiga oo khilaaf dhinaca Diblomaasiyada ah uu soo kala
dhax-galay dalka Canada.
Wasiirka ayaa qiray in dowladda
Soomaaliya ku taageertay Sacuudiga in aan la fara-galin arimaheeda gudaha,
isaga oo intaa ku daray in si taa la mid ah ay Soomaaliya u taageeri laheyd
Canada haddii la soo fara-galiyo arrimaheeda gudaha.
Isaga oo la hadlay Laanta Afka
Soomaaliga ee BBC-da ayuu sheegay in dowladda Soomaaliya xaq u leedahay in ay
ka hadasho mowqifkeeda siyaasiga ah ee ku aadan waxa ka dhaca dunida inteeda kale
oo aysan iska fiirsan doonin oo kaliya.
“Dhab weeye waanu ku taageernay dowladda
Sacuudiga in aan la fara-gelin arrimahooda gudaha, si taa la mid ah ayeey-nu
Canada u taageeri laheyn haddii la soo fara-galiyo siyaasadeeda gudaha ayuu
yiri Wasiirka Cawad.
Dowladda Canada wali dhinaceeda wax war ah kama
soo saarin mowqifka dowladda Soomaaliya ay ka qaadatay khilaafka kala dhaxeeya
dalka Sacuudiga, hasse ahaatee go’aanka dowladda waxaa ka hor yimid oo diiday
qaar ka mid ah Jaaliyada Soomaalida ee ku dhaqan dalka Canada.
Waa markii ugu horeysay oo ay dowladda Soomaaliya
dhinac la safato marka la eego siyaasadeeda arrimaha dibadda ee ka dhanka ah
khilaafka soo kala dhax-gala dowladdaha, madaama horay go’aan dhax-dhaxaadnimo
uga qaadatay khilaafkii wadamada khilaafkii soo kala dhax-galay wadamada
Khaliijka oo is baheysi uu hogaaminayo Sacuudiga xiriirka ugu jireen dowladda
Qatar.
C/raxmaan Diini, Hiiraan
Online
[email protected]
