3/29/2024
Today from Hiiraan Online:  _
Wararka Maanta- Talaado, Nov 5 , 2013
Shirka gobollada Jubbooyinka oo Maanta looga dooday amniga iyo shirka oo lasoo Gabag-abeynayo Gellinka Dambe ee Maanta

Talaado, November 05, 2013 (HOL) — Shirka gobollada Jubbooyinka maalintii saddexaad ka socda magaalada Muqdisho ayaa looga dooday maanta amniga iyo sidii loo qarameyn lahaa malleeshiyooyinka iyo ciidamada ku sugan gobollada Jubbooyinka.

Ergooyinka shirka ka qaybgalaya ayaa waxay doodo adag ka yeesheen sidii la isaga kaashan lahaa sugidda amniga gobollada Jubbooyika iyo Gedo oo ka mid ah deegaannada uu xukumi doono maamulka KMG ah ee Jubba.

Sidoo kale, shirka ayaa waxaa lagu soo qaaday sidii ciidamada iyo kooxaha kale ee malleeshiyooyinka ah ee ku sugan Kismaayo, deegaannada kale ee gobolka loo qarameyn lahaa, loogana dhigi lahaa kuwo si toos ah u hoos-yimaada dowladda Soomaaliya.

Wasiirka arrimaha gudaha ayaa shirka guddoominayay, iyadoo ergooyinka ay soo gabagabeeyeen doodaha shirka, iyadoo lagu wado in gellinka dambe ee maanta lasoo saaro war-murtiyeedkii shirka.

Inkastoo shirka uu saddex maalmood ka socday Muqdisho ayaa dhanka kale waxaa jiray xildhibaanno iyo waxgarad kasoo horjeeda kuwaasoo shirar kala duwan ku leh Muqdisho, waxayna ku tilmaameen shirka mid aysan dadka ka soo jeeda Jubbooyinka u dhameyn.

Xiritaanka shirka ayaa waxaa lagu wadaa inay kasoo qaybgalaan wufuud ka kala socda caalamka iyo ururka IGAD, iyadoo la sheegay in waxyaabaha aan shirkan looga hadli looga hadli doono shir kale oo ka dhici doona magaalada Kismaayo ee xarunta gobolka Jubbada Hoose, inkastoo aan la sheegin xilliga uu qabsoomayo.

Wufuudda kala duwan ee shirka ka qaybgalaya ayaa dhankooda muujiyay inay ku rajo-weyn yihiin in qodobbo wax ku ool ah ay kasoo baxaan shirka, waxaana hoggaamiyaha maamulka Jubba, Sheekh Axmed Madoobe oo ka hadlay aragtidiisa uu sheegay inay dib ugu laaban doonaan Jubbooyinka iyagoo gacmaha is-haysta.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
11/5/2013 11:24 AM EST
Talaado, November 05, 2013 (HOL) — Xilli doorashada madaxtinimo ee Puntland ay ka harsan tahay wax ka yar labo bilood waxaa deegaannada Puntland ka socda ololayaal iyo barnaamijyo siyaasadeed oo ay wadaan muraashaxiinta u tartamaya xilka madaxweynimo ee Puntland.

11/5/2013 11:02 AM EST
Talaado, November 05, 2013 (HOL) — Hay’adda African Development Solutions ADESO ayaa ka hadlay go’aankii ay maxkamadda sare ee dalka Britain ay ku gaartay maanta inay sii shaqeeyaan xawaaladaha Soomaalida ayaa ku tilmaamay tallaabo wanaagsan, balse loo baahan yahay in xal waara laga gaaro arrintan.

11/5/2013 10:08 AM EST
Talaado, November 05, 2013 (HOL) — Ra’iisul wasaaraha xukuumadda Somalia, Cabdi Faarax Shirdoon (Saacid) ayaa si weyn u soo dhaweeyay go’aankii ay gaartay maxkamadda sare ee dalka Britain, kaasoo lagu sii wadayo adeegyada xawaaladaha Soomaalida.

11/5/2013 9:43 AM EST
Talaado, November 05, 2013 (HOL) — Madaxweynaha iyo ra’iisul wasaaraha Soomaaliya Xasan Sheekh Maxamuud iyo Cabdi Faarax Shir-doon (Saacid) ayaa galabta si gooni-gooni ah ugu qaabilay Muqdisho wasiirka arrimaha dibadda ee Itoobiya, Tedros Adhanom iyo wafdi uu horkacayo, iyagoo kala hadlay arrimaha horumarinta xariirka labada dowladood iyo sidii nabad loogu soo dabaali lahaa geeska Afrika.

11/5/2013 9:27 AM EST
Talaado, November 05, 2013 (HOL) — Shirka dib u heshiinta oo lagu waday in maanta uu soo xirmo kaddib saddex maalmood oo uu socday ayaa dib loo dhigay illaa maalinta berry ah, kaddib markii la sheegay in ergooyin caalami ah oo ka qaybgeli lahaa xafladda xirtaanka aysan weli soo gaarin Muqdisho.

11/5/2013 7:53 AM EST
Talaado, November 05, 2013 (HOL) — Maxkamadda sare ee dalka Britain ayaa maanta go’aan ka gaartay dacwad u dhexeysay shirkadda xawaalada ee Dahabshiil iyo Barclays Bank, taasoo ku saabsanayd xirtaanka xisaabaadyo ay shirkaddaas ku lahayd bankiga.

11/5/2013 7:19 AM EST
Talaado, November 05, 2013 (HOL) — Xisbiyada mucaaradka ah ee WADANI iyo UCID ayaa si wadajir ah ugu dhawaaqay inay magacaabeen guddigii labada xisbi ee soo qaban-qaabin lahaa shirweyne Qaran oo lagaga hadlayo aayaha mustaqbal ee Somaliland.

11/5/2013 7:12 AM EST
Talaado, November 05, 2013 (HOL) — Jabhadda M-23 ee ka dagaallanta dalka Koongo ayaa sheegay inay joojiyaan fallaagonimada saacado kaddib markii ay dowladdu ku dhawaaqday guulo ay ka gaartay dagaallada ay kula jirto kooxdaas.

11/5/2013 7:06 AM EST
Talaado, November 05, 2013 (HOL) — Kaddib kulan ay maanta ku yeesheen magaalada Beledweyne ee gobolka Hiiraan golaha odayaasha dhaqanka ee gobolka Hiiraan ayay ugu baaqeen dowladda Soomaaliya in laga gacan siiyo maamulka gobolka dagaalka ka dhanka ah Al-shabaab.

11/5/2013 7:01 AM EST
Talaado, November 05, 2013 (HOL) — Salaad Maxamed Cismaan oo ka mid ah ergada ka qaybgalaya shirka Jubbooyinka Kismaayo ee Muqdisho ka socda ayaa u sheegay HOL in dhammaan qodobbadii shirka looga hadlay saddexdii casho ee uu socday si wanaagsan la isugu afgartay.

11/5/2013 6:06 AM EST
Talaado, November 05, 2013 (HOL) — Guddoomiyaha golaha Baarlamaanka Soomaaliya, Prof. Maxamed Sheekh Cusmaan Jawaari ayaa shaaciyay inay imaan doonaan Soomaaliya quburo ka socota Qaramada Midoobay oo ka caawin doona doorashooyinka dalka ka dhici doona sannadka 2016-ka.

11/5/2013 1:44 AM EST
Talaado, November 05, 2013 (HOL) — Maanta oo Talaado ah ayaa looga dareeray magaalada Minnapolis ee gobolka Minnesota doorashada dowladda hoose, iyadoo sidoo kale looga dareeray guud ahaan gobollada dalka Maraykanka.

11/5/2013 1:06 AM EST
Talaado, November 05, 2013 (HOL) — Xildhibaan Cali Khaliif Galery ayaa rajo ka muujiyay shirka Jubbooyinka ee Muqdisho ka socda, balse wuxuu sheegay inuu jiro walwal uu qabo, kaasoo ah in is-qabqabsi uu ka yimaado xulidda mas’uuliyiinta maamulka.

11/5/2013 12:56 AM EST
Talaado, November 05, 2013 (HOL) — Hal qof ayaa ku geeriyooday shalay magaalada Burco kaddib markii uu gaari uu watay miino kula qaraxday xaafada Oktoobar ee magaalada Burco ee Somaliland.

11/5/2013 12:42 AM EST
Talaado, November 05, 2013 (HOL) — Hoggaamiyaha maamulka KMG-ka ah ee Jubba oo ku sugan Muqdisho ayaa ka sheegay xaflad soo dhaweyn ah oo xalay loogu sameeyay magaalada Muqdisho inuu cafiyay cid walba isaguna uu ka doonayo shacabka inay cafiyaan.