3/29/2024
Today from Hiiraan Online:  _
Wararka Maanta- Axad, May 5 , 2013
Hoggaamiyaha Guud ee Al-shabaab oo fariin maqal ah oo uu soo diray kaga hadlay Arrimo ay ka mid yihiin Shirka London

Axad, May 05, 2013 (HOL) — Hoggaamiyaha guud ee Al-shabaab, Sheekh Mukhtaar C/raxmaan Abuu-Zubeyr ayaa warbixin maqal ah oo uu soo saaray kaga hadlay dhowr arrimood oo ay ka mid yihiin, weerarkii Muqdisho ee lala beegsaday maxkamadda, dastuurka, howgallada ka socda dalka, dastuurka iyo shirka London.

Abuu-Zubeyr ayaa dagaalyahannada Al-shabaab ay dhiiiggooda ku bixiyeen inay fashiliyeen duullaanno uu sheegay in Mareykanka iyo Itoobiya ay kusoo qaadeen dalka, wuxuuna u duceeyay sagaalkii qof ee ku dhintay weerarkii ka dhacay xarunta maxkamadda gobolka banaadir, isagoo ku sheegay inay ahaayeen geesiyaal naftooda u huray difaaca diinta iyo dadka Soomaaliyeed.

"Dhiigga shuhaddada waxaa lagu fashiliyay duullaankii Mareykanku kusoo qaaday dalkeenna, waa midkii u diiday Itoobiya inay qabsadaan dalkeenna, waa midkii dumiyay shirqoolladii ay maleegeen, C/llaahi Yuusuf iyo Sheekh Shariif, waa midka burburin doona dabinnada Yugaandheyska iyo kuwa la safan ay la damacsan yihiin dalkan," ayuu yiri Abuu-Zubeyr.

Amiirka Al-shabaab ayaa ku eedeeyay madaxda dowladda Soomaaliya inay ka sii dareen dhibaatooyinkii ay ummadda u geysteen mas’uuliyiintii iyaga ka horeeyay, isagoo dhibaatooyinkaas ku sheegay:

1. Inay soo waarideen ama keeneen dastuur ka dhan ah ummadda diinteed, dhaqankeeda iyo danaheeda, laguna saleeyay rabitaanka dad shisheeye ah oo aynaan diin iyo dhaqan midna wadaagin.

2. Waxay jideeyeen gabbaadna u noqdeen qabsahsada dalka iyo kala qaybtiisa iyagoo ciidamada gumeystaha ee soo duulay inay yihiin kuwo ay saaxiibbo yihiin ama kuwo nabad ilaalin ah, waana tan keentay in dalka ay qabsadaan ciidammo shisheeye oo cadow ah iyo shirkado amni oo dano gaar ah leh. Waana tan keentay in Baydhabo iyo Garbahaarey ay maamulaan ciidammo Itoobiyaan ah, Kismaayana uu xukummo Keenyaati oo aan waxba looga ogoleyn talada iyo inay dekedda iyo garoonka Muqdisho maamulaan ciidammo Yugaandhiis ah.

3. Waxaa la boobay khayraadkii dalka oo lagu fasaxay ciidammo shisheeye oo soo duulay iyo shirkado ajnabi ah iyadoo lagu daboolayo heshiisyo iskaasho oo dhalan-teed ah iyo maal-gashi muqmuqmaasuq ah, ujeeddaduna ay tahay si dareen la’aan ah in khayraadka ummadda loo dhaxal-wareejiyo, waxayna sidoo kale qalqal-geliyeen dhaqaalaha gudaha iyagoo horseeday sicir-barar iyo qalalaase sarif.

4. Waxay horseedeen faafhinta anshax-xumada iyo duminta akhlaaqda

5. barakicinta deegaannada nabadda, amniga ay sugayaan iyo nabadda ay wadaanna waxay kusoo ururtay inay ciidammo shisheeye ku hoggaamiyaan deegaanno nabad ah oo sharciga Alle hoos-harsanaya, dadka ay ka dhigaan kuwo barakaca, wax la laayo, wax la xirxiro iyo wax cabsada.

6. Xabsi wadareedyo aan kala sooc lahayn oo si joogto ah uga dhaca deegaannada ay ka taliyaan, siiba Muqdisho, Kismaayo iyo Baydhabo, qaarna madaxfurasho laga qaato, kuwo kalena inta xabsiyada lagala baxo maydadkooda jidadka lasoo dhigo.

Arrimahan ayuu ku sheegay Abuu-Zubeyr inay tahay sababta keentay in Mareykanka uu aqoonsi ku siiyo dowladda Soomaaliya, isagoo xusay inay dowladdu fulisay hadafyadii ay Mareykanka iyo reer galbeedku dalkan ka leeyihiin.

Isagoo la hadlayay shacabka Soomaaliyeed ayuu wuxuu uu ku booriyay inay garab u noqdaan dadka difaacaya diinta Alle oo aysan ku kadsoomin ballan-qaadyada gaalada.

Waxaa sidoo kale uu ku boorriyay dagaalyahannada Al-shabaab qaybahooda kala duwan ee ka howlgala dalka inay duullaanno joogto ah ku goobaha ay ku sugan yihiin ciidamada dowladda Soomaaliya iyo kuwa gacanta siinaya.

"Mujaahidiinta waxaan leeyahay hadafkiinnu waa inaad gaalada dhabarka ka jabisaan, si ummaddu ay isugu xukunto sharciga Alle, weerarrada joogteeya, duullaanka darran-dooriya, cadowga nasasho u diida, xarumahooda ugu daata, jidadkana ku beegsada, qaraxyada ku naafeeya, ismiidaamintana ku argagax-geliya, hana u aabbo-yeelina tirada cadowga," ayuu Abuu-Zubeyr ku boorriyay dagaalyahannada Al-shabaab.

Sidoo kale; Sheekh Abuu-Zubeyr wuxuu soo hadal-qaada shirka lagu wado 07-da bishan inuu ka furmo magaalada London ee dalka Britain, kaasoo uu ku sheegay inuu dhameystir u yahay shirqoolladii shirkii sannadkii hore lagu qabtay isla magaalada London.

“Qorshayaasha la doonayo in shirkan lagu meel-mariyo waxaa ka mid ah: In ilaha dhaqaalaha iyo khayraadka dalka in lala wareego wixii ka baaqi ahaa iyadoo gabbaad laga dhiganayo heshiisyo caalami ah iyo maamul-waanag iyo la dagaalanka musuqmaasuqa. Kala qaybinta dalka iyadoo saldhig laga dhiganayo waxa loogu yeero federaal oo dhab ahaan ah kala qaybin mal-dahan. Kala qaybsanaanta ummadda Soomaaliyeed illaa hadda dhextaalla waxaa dhigay Ingiriis inaan gargaar ka sugnaha waa ayaan-darro, waayo isagaa siiyay Kenya gobollada waqooyi-galbeed, Itoobiyana siiyay Galbeed,” ayuu yiri Abuu-Zubeyr.

Ugu dambeyn, wuxuu sheegay in shirka London uu saldhig u yahay in laga tago diinta Alle laguna bedelo sharciyada Mareykanka iyo Ingiriiska, isagoo ugu baaqay shacabka Soomaaliyeed inay ka digtoonaadaan shirkaas.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
5/5/2013 1:25 PM EST
Axad, May 05, 2013 (HOL) — Shir ay yeesheen saraakiishii hore ee RRA oo dib loogu soo nooleynayay jabhaddan ayaa muddo toddobaad ah ka socday duleedka magaalada Baydhabo ee xarunta gobolka Bay, iyadoo shirakas looga hadlay arrimo fara badan.

5/5/2013 1:12 PM EST
Axad, May 05, 2013 (HOL) — Deeq lacageed oo ka badan 3,000 oo doolarka Maraykanka ah ayaa la gaarsiiyey qoysas danab ama biriqi ay dhawaan ku waxyeellaysay duleedka magaalada Laascaanood ee xarunta Gobolka Sool.

5/5/2013 12:09 PM EST
Axad, May 05, 2013 (HOL) — Xarunta madaxtooyada Soomaaliya ayaa lagu dhaariyay maanta taliyaha cusub ee hay’adda nabadsugidda Qaranka iyo taliyaha cusub ee ciidanka Booliiska Soomaaliya, waxaana dhaarinta goob-joog ka ahaa madaxweynaha Soomaaliya, Xasan Sheekh Maxamuud.

5/5/2013 11:49 AM EST
Axad, May 05, 2013 (HOL) — Madaxweynaha dalka Jabuuti, Ismaaciil Cumar Geelle iyo wafdi heer sare ah oo uu hoggaaminayo ayaa ka qaybgalay shirka Soomaaliya loogu qabanayo magaalada London ee xarunta Britain oo lagu wado inuu furmo maalinta Talaadada ah ee soo socota.

5/5/2013 9:30 AM EST
Xaflad lagu soo bandhigay buug cusub oo ay qortay Dahabo Cumar Maxamed oo ahaan jirtay dublamaasiyad kasoo shaqaysay xiriirka dibadda ee Soomaaliya xilligii dawladii kacaanka, gaar ahaanna safaaradihii ay Soomaaliya ku lahayd qaar kamid wadamada afrika ayaa lagu qabtay magaalada Nairobi, ee xarunta dalka Kenya.

5/5/2013 9:03 AM EST
Axad, May 05, 2013 (HOL) — Madaxweynaha Soomaaliya, Xasan Sheekh Maxmauud oo dadweyne fara badan kula hadlayay degmada Dayniile ee gobolka Banaadir ayaa sheegay in dowladda Soomaaliya oo kaashanaysa shacabigeed ay fashilisay qorshayaal badan oo Al-shabaab ay doonaysay inay ka fuliso Muqdisho.

5/5/2013 8:31 AM EST
Axad, May 05, 2013 (HOL) — Madaxweynaha Somaliland iyo Weftigiisi oo dalka dib ugu soo laabtay, ayaa sheegay inay guul u ahayd safarkan uu dhawrka todobaad ku tagay dalal badan oo caalamka, isla markaana ka soo dhaadhiciyey qadiyada madax bananidda Somaliland.

5/5/2013 8:17 AM EST
Axad, May 05, 2013 (HOL) — Xarakada Al-shabaab ayaa sheegtay inay ka dambeysay weerarkii ismiidaaminta ahaa ee ka dhacay Isgoyska KM-4 ee magaalada Muqdisho, iyagoo ku hanjabay inay weerarro kale oo cusub ka gysan doonaan caasimadda Soomaaliya.

5/5/2013 4:29 AM EST
Axad, May 05, 2013 (HOL) — Ugu yaraan 12-qof oo uu ku jiro qofkii qaraxa fuliyay, askari ka tirsan ciidamada nabadsugidda Qaranka, haweeney iyo cunug yar oo ay wadatay ayaa ku dhintay qarax is-miidaamin ah oo maanta ka dhacay Isgoyska KM-4 ee magaalada Muqdisho, sidoo kale 25-qof ayaa ku dhaawacmay weerarkaas.

5/5/2013 1:38 AM EST
Axad, May 05, 2013 (HOL) — Madaxweynaha Soomaaliya, Xasan Sheekh Maxamuud iyo iyo wafdi uu hoggaaminayo ayaa lagu wadaa inay u dhoofaan maanta magaalada London ee dalka Britain halkaasoo uu ka furmi doono shir looga hadlayo Soomaaliya maalinta Salaasadaha ah ee soo socota.