10/14/2019
Today from Hiiraan Online:  _
Wararka Maanta- Arbaco, May 29, 2013
MADAXWEYNAHA SOOMAALIYA: “Kalsooni Weyn ayaan ku Qabaa in Kooxda Al-shabaab laga cirib-tiro Soomaaliya oo dhan”


Arbaco, May 29, 2013 (HOL) — Madaxweynaha Soomaaliya, Xasan Sheekh Maxamuud ayaa sheegay in ayaa sheegay inuu ku kalsoon yahay in kooxda Al-shabaab oo dagaal kula jirta ciidamada dowladda Soomaaliya iyo kuwa taageera ee AMISOM.

Somali president
Soomaaliya ayaa xilligan wadda qorshayaal ay ku doonayso inay kaga baxdo colaado iyo dhibaatooyin soo taagnaa muddo 22-sano, iyadoo dowladda jirta ay isku dayayso inay dib u soo nooleyso dhaqaalaha dalka.

“Xukuumadda waxay ku howlan tahay dib u soo celinta dhaqaalaha si loogu abuuro shaqooyin dhallinyarada Soomaaliyeed, taasoo hoos u dhigaysa inay ku biiraan xoogagga Al-shabaab,” ayuu ku yiri madaxweynaha Soomaaliya, Xasan Sheekh wareysi uu siiyay wakaaladda wararka Japan ee KYODO.

Sidoo kale, madaxweynaha Soomaaliya wuxuu sheegay in xukuumaddu ay darsayso waxyaabihii sababay dagaallada, faqriga, fursad la’aanta haysata dhallinta Soomaaliyeed, rajo la’aanta ku habsatay shacabka iyo in dadku ay u qaybsanaan beelo-beelo.

“Dowladda Somalia oo kaashanaysa beesha caalamka ayaa qorsheynaysa in ay dib u dhiso ciidamadeeda xoogga dalka iyo inay besho wacyiga shacabka. Dowladduna waxay mar hore ku dhawaaqday inay dagaalyahannada aan u dhalan Soomaaliya (Ajnabiga ah) ee la safan Al-shabaab inay dalka isaga baxaan, kuwa Soomaalidana ah waxaan qorsheynaynaa inaan dhaqan-celin u sameyno,” ayuu hadalkiisa ku daray.

Madaxweynuhu wuxuu wareysiga ku sheegay in Soomaaliya ay ku wayday dagaalladii sokeeye waxba walba, balse ay billaabeen sidii ay meel hoose uga soo billaabi lahaayeen, isagoo intaas ku daray in Soomaaliya ay u kala jajabtay qaybo yar-yar sida Somaliland, Puntland iyo Jubbaland.

“Wadahadallo dib loogu mideynayo qaybahaas ayaa socda,” ayuu yiri Xasan Sheekh oo hadalkisa ku daray: “Waxaan adeegsanaynaa wadahadallo aan dib ugu soo celinayno Soomaaliya. Shaqsiyan waxaan booqday Puntland, haddana waxaan Kismaayo ka furaynaa wadahadallo aan la yeelanayno dadka Jubbooyinka kasoo jeeda.”

Toddobaadkan waxaa dalka Japan lagu qabanayaan shir looga hadlayo dib u dhiska Soomaaliya oo barbar socda shirka horumarinta Afrika ee (TICAD) loo yaqaan, kasoo Sabtida soo socota ka furmaya magaalada Yokohama isagoo socon doona saddex maalmood.

“Waxaan doonaynaa in dowladda Japan ay naga saaciddo arrimo ay ka mid yihiin tababarka dhinaca tiknolojiyadda iyo qalabka isgaarsiinta,” ayuu ku yiri Xasan Sheekh wareysiga uu siiyay wakaaladda wararka Japan.

Madaxweynuhu wuxuu sheegay in dadka Soomaaliyeed 60% ay yihiin dad aan aqoon lahayn, gaar ahaan dhallinyarada, isagoo xusay in Soomaaliya ay u baahan tahay garab-qabashada caalamka, lagana saacido kalluumeysiga, beeraha, wax-soo-saarka dhinaca cunnada iyo isgaarsiinta.

“Arrimahan oo dhan waa kuwa aan doonayno inay dowladda iyo shacabka Japan naga kaalmeeyaan, si Soomaaliya ay u noqoto dowlad la mid ah kuwa caalamka ka jira,” ayuu hadalkiisa kusoo gabgabeeyay.

Madaxweynaha Somalia ayaa wareysigan bixiyay intii uu ku sugnaa xarunta dalka Itoobiya ee Addis Ababa oo uu kaga qaybgalay shirkii Midowga Afrika, wuxuuna maanta oo Arbaco ah u dhoofay dalka Japan.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
5/29/2013 4:07 PM EST
Arbaco, May 29, 2013 (HOL) — Xildhibaan ka mid ah xildhibaanadad golaha deegaanka Hargeysa, ayaa la sheegay inuu xalay magaaladda Hargeysa ku toogtay nin shacab, kaas oo markiiba halkii ku geeriyooday.

5/29/2013 4:00 PM EST
Arbaco, May 29, 2013 (HOL) — Xukuumadda Soomaaliya ayaa maanta u gudbisay golaha baarlamaanka Soomaalia, hidsayaal sharciyeedyo ku saabsan, habka dhismaha maamul goboleedyada, la dagaalanka argagaxisada iyo xuduudaha.

5/29/2013 10:56 AM EST
Arbaco, May 29, 2013 (HOL) — Kulan xasaasi ah oo maanta ay ku yeesheen magaalada Baladweyne ee xarunta gobolka Hiiraan, siyaasiyiinta, aqoonyahannada, saraakiisha ciidamada, waxgaradka iyo odayaasha dhaqanka ka soo jeeda beesha Xawaadle ayaa laga sheegay in beesha kalsoonidii kala noqtay dowladda federaalka Soomaaliya, iyaga oo eedeyn balaaran u jeediyay wasiirrka wasaarrada arrimaha gudaha iyo amniga Qaranka xukuumada Soomaaliya C/kariiin Xusseen Guuleed.

5/29/2013 8:28 AM EST
Arbaco, May 29, 2013 (HOL) — Hay’adda xuquuqda aadanaha ee Human Rights Watch ayaa warbixin ay maanta soo saartay ku sheegtay in ciidanka Kenya ay tacdiyo isugu jira kufsi, jirdil iyo xarig aan xad lahayn ay kula kaceen 1,000 ruux oo qoxootiga Soomaaliyeed ee ku nool magaalada Nairobi ee xarunta dalka Kenya intii u dhexeysay bilaha November 2012 illaa Jannaayo 2013.

5/29/2013 7:56 AM EST
Arbaco, May 29, 2013 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo ayaa maanta u dhoofay dalka Jabaan halkaasoo uu kaga qaybgalayo shir looga hadlayo arrimaha Soomaaliya iyo shir looga hadlayo horumarinta Qaaradda Afrika.

5/29/2013 7:34 AM EST
Arbaco, May 29, 2013 (HOL) — Kooxo hubeysan oo aan la garanayn ayaa ku dilay maanta xaafadda Suuq Bacaad ee degmada Yaaqshiid guddoomiye waaxeed ka tirsan degmadaas, sida uu saxaafadda u sheegay guddoomiyaha degmada Yaaqshiid, Muxyadiin Xasan Jurrus.

5/29/2013 7:30 AM EST
Arbaco, May 29, 2013(HOL) :- Wafdigii ka socday dowladda Soomaaliya ee maalmihii u danbeeyay ku sugnaa garoonka diyaaradaha Kismaayo ayaa maanta gudaha usoo galay magaalada, iyadoona wafdiga ay dageen Hotel Cascaseey oo ay hore ugu sugnaayeen xubno ka tirsan baarlamanka Soomaaliya.

5/29/2013 7:04 AM EST
Arbaco, May 29, 2013(HOL):Magaalada Addis Ababa ee dalka Itoobiya ayaa waxaa lagu qabtay shirweynaha suxufiyiinta Bariga Afrika halkaas oo ay isugu yimaadeen 11-ka dal ee la isku yiraahdo Bariga Afrika.

5/29/2013 6:55 AM EST
Arbaco, May 29, 2013 (HOL) — Madaxweynaha Kenya ayaa walaac xooggan ka muujiyay dilalka ay Al-shabaab ka geysanayso gudaha dalkiisa ugu geysanayana dadka Kenyanka ah, isagoo sheegay in dowladdiisu ay qaadi doonto taallaabooyin ay dadkeeda ku difaacayso.

5/29/2013 6:35 AM EST
Arbaco, May 29, 2013 (HOL) — Dagaal u dhexeeya ciidamada dowladda Soomaaliya iyo kuwa AMISOM iyo Al-shabaab ayaa xalay siyaabo kala duwan uga dhacay degmada Baydhabo iyo deegaanka Goof-guduud oo ku yaalla duleedka Baydhabo ee xarunta gobolka Bay.

5/29/2013 6:08 AM EST
Arbaco, May 29, 2013 (HOL) — Dhab ahaan looma oga waqtiga rasmiga ah ee la dhisay ama dhidibada loo taagay Masjidul-Jaamacada magaalada Baladweyne, laakiiin waxaa leysku raacsan yahay in uu dhisan yahay in ka badan 107 sano, sida ay qiyaas ku sheegeen waayo joogii magaalada Baladweyne ee Diinta ka bartay ama ka raacday Masjidka oo ku caan-baxay magaca {Masjidka Bardaha}.