12/14/2019
Today from Hiiraan Online:  _
Wararka Maanta- Arbaco, Feb 27, 2013
Xaalad biyo la’aaneed oo ba’an oo kusoo fool leh shacabka ku nool Magaalada Laascaanood ee Gobolka Sool (SAWIRRO)



Arbaco, Feberaayo 27, 2013 (HOL) — Xaalad biyo la'aaneed oo baahsan ayaa soo food saartay dadweynaha ku dhaqan magaalada Laascaanood ee Gobolka Sool, kaddib markii ay ilo-biyoodyadii deegaanka oo dhami ay gabaabsi noqdeen.

Gaadiidka biyaha ganacsiga ah soo gaarsiiya magaalada ayaa sheegay inay adag tahay sida ay biyo ugu heli doonaan waqtiyada soo socda iyagoo xusay inay dhamaadeen baraagaihii biyaha laga soo dhaamin jiray gaar ahaan kuwa cabitaanka loo isticmaalo kaddib markii ay la waayay roobabkii di’I jiray labadii sanno ee lasoo dhaafay.

Isu-duwaha wasaaradda macdanta iyo biyaha gobolka Sool, Inj Axmed Xirsi Cartan "Calaacal" oo sharaxaad ka bixinaayay ilo-biyoodyada magaaladu ay ku tiirsanayd ayaa sheegay in ceelka gooja-cade oo muddo dheer uu xumaa, dururka Laascaanood oo biyihii ka gudheen iyo berkedaha magaaladu ay ka heli jirtay biiyaha ee Kalabaydh oo 30-km galbeed kaga beegan magaalada oo aan biyihii roobka dayreed gebi ahaanba gelin ay tahay sababaha oonka keentay.

Kulammo is-daba-joog ah ayaa lagu qabtay meelo kala duwan oo gobolka Sool ka mid ah; kuwaasoo dhamaantood lagu baaqayay in loo diyaar garoobo sidii waxqabad biyood loogu diyaarin lahaa dadka ku nool guud ahaan gobolka Sool, gaar ahaan kuwa ku nool magaalada Laascaanood oo xaaladdoodu aad u adag tahay.

Gudoomiyaha gobolka Sool oo ay weheliyaan mas’uuliyiinta heer gobol iyo heer degmo ah iyo waxgaradka deegaanka qaarkood ayaa baaq kama dambeys ah u diray maamulka Somaliland iyagoo ugu baaqay inay si deg-deg ah dadka deegaanka u soo gaarsiiyaan biyo ay cabaan.

Laga soo billaabo sanadkii 1993-kii waxaa la isku dayay illaa lix jeer  in biyo cabitaan ku haboon laga helo duleedyada magaalada Laascaanood, laakiinse dhamaantood waa lagu guul daraystay.

Sidoo kale, laba warshadood oo biyaha sifeeya ayaa laga sameeyay Laascaanood sanadihii sagaashamaadkii kuwaasoo muddo soo saari jiray biyo ay dadku isticmaalaan waqtiyada abaaruhu jiraan, walow ay qaali ahaayeen haddana waa lagu baraaray, inkastoo sida ay sheegeen ragga aqoonta u leh macdanaha iyo biyaha aanay is-bixin doonin taasoo noqotay sidii ay sheegayeen waxayna xirmeen horraantii qarnigan.

Biyaha haatan magaalada Laascaanood laga cabo ayaa laga keenaa meelo kale sida: Karin-dabay-weyn, Saaxdheer iyo Dharkayn oo dhamaantood ku dhawaad sideetan kiiloo-mitir kaga beegan magaalada jahooyinka Koonfur, Koonfur-galbeed iyo galbeed, waxayna ku iibiyaan qiime dhan shan doollar ama 100,000 oo shilin.

Maxamuud Ismaaciil Kaatun oo HOL ay wax ka weydiisay mar uu kasoo galay deegaanka Dharkayn oo uu biyo kasoo dhaamiyay ayaa sheegay in dhawaan loo talaabayo xadka kililka shanaad ee Itoobiya sida Domco iyo Wanaagsan.

Si kastaba ha ahaatee, waa xaalad aad u adag oo kusoo fool yeelatay dadka ku nool magaalada Laascaanood, waxayna intooda badan aaminsan yihiin in Illaahay oo raxmaadkiisa shuba keliya lagaga bixi karo biya la'aanta haatan taagan, halka qaar kalena ay leeyihiin weli waqtigii roobka waa dheer yahay waxaana loo baahan yahay gargaar bini'aadamnimo oo deg-deg ah.

Saynab Cabdi Warsame, Hiiraan Online
[email protected]
Laascaanood, Gobolka Sool










Click here
2/27/2013 12:50 PM EST
Arbaco, Feberaayo 27, 2013 (HOL) — Ururka dhallinyarada SYL II ayaa maanta xaflad qalin-jebin ah u sameeyay illaa 150 arday oo ahaa dufcaddii saddexaad oo ka qalin-jebiya machadka SYL II ee xirfadaha shaqo abuurka, kaasoo si lacag la’aan ah wax loogu barayay.

2/27/2013 11:52 AM EST
Arbaco, Feberaayo 27, 2013 (HOL) — Kulan ballaaran oo ay isugu yimaadeen qaar kamid ah beelaha dega gobollada Jubooyinka islamarkaasina ka dhacay Hotel City Palace ee magaalada Muqdisho ayaa si kulul loogu cambaareeyay dowladda Kenya oo lagu eedeeyay in ay faraha kula jirto arimaha Jubooyinka.

2/27/2013 8:43 AM EST
Arbaco, Feberaayo 27, 2013 (HOL) — Munaasabad siweyn loo soo agaasimay islamarkaana ay ka qeyb-galeen mas’uuliyiinta maamulka gobollka, saraakiisha ciidamada Jabuuti AMISOM, odayaasha dhaqanka iyo xubno ka kala socday qeybaha bulshada rayidka oo lagu qabtay magaalada Baladweyne aya lagu soo bandhigay waxqabadka ururka midowgga dhalinyarrada gobollka Hiiraan [Hiran Youth Development Association].

2/27/2013 8:07 AM EST
Arbaco, Feberaayo 27, 2013 (HOL) — Ugu yaraan 35-qof ayaa ku dhintay shil gaari oo maanta ka dhacay magaalada Mwingi oo ku taalla duleedka magaalada Nairobi ee xarunta Kenya, iyadoo ay ku dhaawacmeen 70 qof oo kale.

2/27/2013 7:27 AM EST
Arbaco, Feberaayo 27, 2013 (HOL) — Maxkamadda ciidamada qalabka sida ee Puntland ayaa maanta xukun ku ridey dad ku eedeysnaa in ay ka danbeeyeen dilkii Sheekh/Dr. Axmed Xaaji Cabdiraxmaan oo kamid ahaa culimada waaweyn ee Soomaaliya.

2/27/2013 7:25 AM EST
Arbaco, Feberaayo 27, 2013 (HOL) — Ciidamada booliiska magaalada Baladweyne ayaa gacanta ku dhigay maanta oo Arbaco ah in ka badan 25 dhalinyarro ah oo sida ay sheegeen saraakiisha booliiska Baladweyne uga shakisan yihiin in ay ka tirsan yihiin Al-shabaab.

2/27/2013 2:55 AM EST
Arbaco, Feberaayo 27, 2013 (HOL) — Magaalada Jabuuti ee xarunta dalka Jabuuti ayaa waxaa labadii maalmood ee ugu dambeeyay ka socday isku-dhacyo u dhexeeyay ciidamada ammaanka Jabuuti iyo taageerayaasha xisbiga mucaaradka ah ee USN oo ka cabanaya natiijadii doorashooyinkii golaha baarlamaanka Jabuuti.

2/27/2013 2:21 AM EST
Arbaco, Feberaayo 27, 2013 (HOL) — Ugu yaraan shan qof oo labada dhinac ah ayaa ku dhintay tiro intaas ka badnna way ku dhaawcmeen dagaal culus oo ciidamada dowladda iyo xoogagga Al-shabaab ku dhexmaray gabal-dhicii shalay deegaanka Daynuunaay oo 18-km u jira degmada Baydhabo.

2/27/2013 2:03 AM EST
Arbaco, Feberaayo, 27, 2013 (HOL) -- Weerar loo adeegsaday Bam gacmeed ayaa fiidnimadii xalay waxaa ay kooxo hubeysan ku qaadeen guri ku yaalla xaafadda Howl-wadaag ee magaalada Baladweyne, sida ay HOL u xaqiijiyeen saraakiisha ciidamada booliiska.

2/27/2013 1:50 AM EST
Arbaco, Feberaayo 27, 2013 (HOL) — Hay’adda Bancroft iyo AMISOM ayaa shalay tababar uga furay Muqdisho saraakiil ka tirsan ciidamada Milateriga dowladda Soomaaliya, kaasoo socon doona muddo laba toddobaad ah.

2/27/2013 1:25 AM EST
Arbaco, Feberaayo 27, 2013 (HOL) — Dekedda weyn ee Muqdisho ayaa laga dhoofiyay markii ugu horreysay xalay xoolo nool oo ganacsi ah, kaddib sannado badan, iyadoo munaasabadda furitaanka ay ka qaybgaleen xubno ka socday dowladda Soomaaliya.

2/27/2013 12:50 AM EST
Arbaco, Feberaayo 27, 2013 (HOL) — Ciidamada dowladda Soomaaliya iyo kuwa AMISOM oo iskaashanaya ayaa 7:00 aroonimo saakay oo Arbaco ah si nabad ah kula wareegay degmada Buur-hakaba ee gobolka Bay, kaddib markii ciidamadu labaadii maalmood ee lasoo dhafay ku dhawaanayeen degmadaas.