3/19/2019
Today from Hiiraan Online:  _
Wararka Maanta- Isniin, Apr 8 , 2013
Dib u dhac ku yimid Shir looga hadli lahaa Ammaanka Soomaaliya oo ka Furmi lahaa Xarunta Itoobiya ee Addis Ababa


Isniin, Abriil 08, 2013 (HOL) — Waxaa dib u dhac uu ku yimid shir looga hadli lahaa arrimaha Soomaaliya, kaasoo ay soo qabqaabisay IGAD, iyadoo dib u dhacan uu ku yimid codsi ka yimid dalka Kenya oo sheegtay inay ku jiraan xilli kala guur ah.

Shirkan ayaa waxaa looga hadli lahaa maamul u sameynta gobollada dalka ee laga saaray Al-shabaab inay hoggaanka u qabato Soomaaliya iyo sidii loo xoojin lahaa ammaanka deegaannadaas.

Wasiirrada arrimaha dibadda ee dalalka IGAD ayaa shalay is-arkay iyadoo dowladda Kenya ay sheegtay inuusan jirin mas’uul shirkan ku meteli kara xilliga maadaama ay ku jiraan xilli kala guur ah, waxayna codsatay in dib loo dhigo.

Inkastoo dowladda Soomaaliya ay kasoo horjeesatay dib u dhacaas ayaa haddana waxaa ugu dambeyn lagu heshiiyay in shirka dib loo dhigo, iyadoo laga yaabo in caleemo saarka iyo dhaarinta madaxweynaha cusub ee Kenya uu shirkan ka dhaco magaalada Nairobi ee dalka Kenya.

Sida ay sheegayaan wararka hoose waxaa lagu wadaa in shirkan oo markii hore ahaa heer wasiir uu isku bedelo heer madaxweyne ayna madaxda dalalka IGAD isugu tagaan magaalada Nairobi si ay ammaanka Soomaaliya uga hadlaan.

Madaxweynaha cusub ee Kenya, Uhuru Kenyatta ayaa lagu wadaa in berri oo Salaaso ah loo dhaariyo xilka madaxnimo ee dalkaas, kaddib markii uu ku guuleystay doorashooyinka dalkaas, iyadoo lagu wado inuu ka qaybgalo caloomo-saarkaas madaxweynaha dalka Suudaan, Cumar Xasan Al-Bashiir oo baadi-goob ay ku hayso maxkamadda dambiyada caalamiga ah ee ICC.

Arrimaha uu shirkan sida tooska ah u taaban doono ayaa waxaa ka mid ah maamul u sameynta Jubbooyinka oo muran xooggan uu ka taagan yahay, sidoo kalena waxaa looga hadli doonaa arrimaha ammaanka, gaar ahaan goobaha Al-shabaab laga saaray.

Madaxweynaha Soomaaliya, Xasan Sheekh ayaa lagu wadaa inuu Somalia uga qaybgalo shirkaas; iyadoo sidoo kalena la filayo inay ka qaybgelaan madaxweynayaasha Jabuuti, Kenya, Itoobiya iyo Uganda oo ay ciidammo ka joogaan Soomaaliya.

Ra’iisul wasaaraha Soomaaliya, Cabdi Faarax Shirdoon (Saacid) ayaa ku sugan magaalada Addis Ababa ee xarunta dalka Itoobiya, isagoo kulammo looga hadlayo ammaanka Soomaaliya la leh madaxda Itoobiya.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
4/8/2013 3:03 PM EST
Isniin, Abriil 08, 2013 (HOL) — Guddoomiyaha baarlamaanka Soomaaliya, Prof. Maxamed Sheekh Cismaan (Jawaari) oo wafdi uu hoggaaminayo ay ku sugan yihiin dalka Norway ayaa maanta kulammo kala duwan kula qaatay magaalada Oslo ee xarunta dalkaas mas’uuliyiin ka tirsan dowladda Norway.

4/8/2013 2:24 PM EST
Isniin, Abriil 08, 2013 (HOL) — Ra’iisul wasaaraha Soomaaliya, Cabdi Faarax Shir-doon (Saacid) oo safar shaqo ku jooga dalka Itoobiya ayaa kulan waqti dheer qaatay la yeeshay maanta ra’iisul wasaaraha Itoobiya, Hailamariam Desalegn.

4/8/2013 2:05 PM EST
Isniin, Abriil 08, 2013 (HOL) — Magaalada Baydhabo ee gobolka Bay ayaa waxaa maanta ka dhacday dhacdo aad u fool xun oo ay sameeyeen labo ka tirsan askarta ciidamada dowladda Somalia kaddib markii ay ku murmeen lacag gaaraysa 4,000 oo shillin Soomaali ah.

4/8/2013 10:30 AM EST
Isniin, 08 April, 2013(HOL) :-Maamulka KMG ee magaalada Kismaayo ayaa sheegay in laga bilaabo maanta aan la arki karin askari hub ku dhexwata magaalada, waxayna arintani ka danbeeysay kadib markii maalmihii u danbeeyay ay soo baxayeen kooxo hubeysan oo dhac u geysta dadka rayidka ah.

4/8/2013 9:30 AM EST
Isniin, Abriil 08, 2013 (HOL) — Wafdiga ka socda dowladda federaalka Soomaaliya ee maalintii shalay gaaray magaalada Baladweyne ayaa kulamo gargaar ah la yeellanaya mas’uuliyiinta maamulka gobollka Hiiraan iyo qeybaha kala duwan ee bulshada, xilli maanta la fillayay in xilka lagu wareejiyo mas’’uuliyiinta cusub ee maamulka gobollka Hiiraan.

4/8/2013 9:07 AM EST
Isniin, Abriil 08, 2013 (HOL) — Madaxweynaha Somaliand Mudane Axmed Maxamed Maxamuud Siillaanyo, ayaa maanta soo saaray wareegtu uu ku magaaabay guddi heer qaran oo qabanqaabisa xuska 18 May oo ah maalintii ay Somaliland ku dhowaaqday inay ka madax banaantahay soomaaliya inteedda kale 18. May, 1991.

4/8/2013 8:58 AM EST
Isniin, Abriil 08, 2013 (HOL) — Golaha wasiirada xukuumada Soomaaliya ayaa maanta yeeshay kulan deg-deg ah oo uu shir-gudoominayay ku simaha ra’iisul wasaaraha ahna wasiirka garsoorka, cadaalada iyo arrimaha diinta, C/llaahi Abyan Nuur, iyadoo kulanka looga hadlay digniintii Britain ay kasoo saartay amaanka Muqdisho, iyagoo sheegay inaysan khatari ka jirin xarunta Soomaaliya ee Muqdisho.

4/8/2013 8:24 AM EST
Isniin, Abriil 08, 2013 (HOL) — Madaxweynaha Somaliland, Axmed Maxamed Maxamuud (Siillaanyo) oo maanta u ambabaxay dalka Turkiga oo uu ka furmayo shir lagu wada-hadalsiinayo Somaliland iyo Soomaaliya ayaa sheegay inay soomaaliya ku qancinayaan sidii ay u aqoonsan lahaayeen madax banaanidda Somaliland, inkastoo ay laba mawqif oo kala durugsan la kala taagan yahay, haseyeeshee albaabadda wada hadalka aanay xidheyn ee ay soo dhoweynayaan in la wada hadlo.

4/8/2013 8:20 AM EST
Isniin, Abriil 08, 2013 (HOL) — Agaasimihii hay’adda nabad-sugidda Qaranka, Axmed Macallin Fiqi ayaa ka digay weerarro argagixiso oo ka dhaca magaalada Muqdisho, isagoo hadalkan kusoo beegay iyadoo dowaldda Ingiriisku ay maalmo ka hor soo saartay digniin ku saasan in Muqdisho ay ka dhici karaan weerarro argagaxiso.

4/8/2013 8:05 AM EST
Isniin, Abriil 08, 2013 (HOL) — Madaxweynaha Soomaaliya, Xasan Sheekh Maxamuud ayaa maanta tababar ugu soo xiray xerada Xalane ee duleedka Muqdisho boqolaal ka tirsan ciidamada dowladda Soomaaliya oo bilooyin halkaas tababar ku qaadanayay.

4/8/2013 7:27 AM EST
Isniin, Abriil 08, 2013 (HOL) — Soomaaliya ayaa ka qaybgalaysa markii ugu horreysay tababarka da’yarta dublamaasiyiinta adduunka oo ka furmay magaalada Ankara ee xarunta dalka Turkiga.

4/8/2013 7:18 AM EST
Isniin, Abriil 08, 2013 (HOL) — Xarakada Al-shabaab ayaa bartamaha degmada Buulo-burte ee gobolka Hiiraan ku toogtay gabar dhalinyaro ah oo lagu eedeeyay inay ahayd jaajuusad u shaqeysa dowladda federaalka ayna qabteen iyadoo falal shirqool ah gacanta kula jirta.