3/18/2024
Today from Hiiraan Online:  _
Wararka Maanta- Arbaco, Sept 19, 2012
Cuqaal iyo waxgarad ku shiray Boosaaso oo ku baaqay in dib u eegis lagu sameeyo xeerka doorashooyinka Puntland

Arbaco, September 19, 2012 (HOL) — Magaalada Boosaaso ee xarunta gobolka Bari waxaa maanta ka dhacay kulan balaaran oo ay isugu yimaadeen cuqaasha iyo waxgaradka 4 degmo oo ka kala tirsan gobolada Bari iyo Karkaar, kuwaas oo kala ah: Baargaal, Waaciye, Ufeyn iyo Rako.

Guddoomiyaha nabadoonada gobolka Bari Cabdiqaadir Axmed Ibraahim (Xarago) oo isagu kulankan shir gudoominayey, ugu horeynna madasha ka hadlay, ayaa sheegay in ujeedadiisa ugu weyni ay tahay sidii ay u muujin lahaayeen mowqifkooda ku aadan qodob ay ka biyo diidsan yihiin oo ku jira xeerka doorashooyinka ee uu dhowaan golaha Baarlamaanku meel mariyey.

Qodobkaas oo dhigaya in doorashada goleyaasha deegaanku aysan si isku mid ah uga qabsoomi doonin degmooyinkii jirey burburkii dowladdii Mileteriga kahor oo ah 21 degmo iyo kuwa la magacaabay intii u mamulka Puntland dhisnaa oo iyaguna ah 16, ayuu nabadoon Xarago tilmaamay in uu yahay mid aan cadaaladda ku saleysneyn.


Caaqil Axmed Xaaji Maxamuud oo isna qayb ka ahaa odayaashii goobta ka hadlay, ayaa xusay  in cid walba oo wax tebeysaa ay xaq u leedahay in ay cabashadeeda soo gudbiso si loo arko waxna looga qabto.

Wuxuuna intaas raaciyey in kulankan iyo kuwii ka horeeyeyba aysan ahayn kuwo siyaasadeed oo lagu durayo xukuumadda madaxweyne Cabdiraxmaan Maxamed (Faroole), balse ay yihiin kuwo ku aadan sidii loo shaacin lahaa in xeerka doorashooyinku uu yahay mid mudan in dib u eegis lagu sameeyo.

“Ujeedada baaqani waa mid ku saleysan xuquuq raadis, ee ma ahan mid siyaasadeed  oo cid gaar ah lagu durayo, waa baaq ka yimid dadka tebaya in ay wax ka maqan yihiin, wax intaas dhaafsiisani kuma jiraan” Caaqil Axmed Xaaji ayaa yiri.


Ugu  danbeyntii waxay cuqaashii iyo waxgaradkii kulankan kasoo qayb galay si wada jir ah usoo saareen baaq ka koobnaa dhowr qodob oo ay kamid ahaayeen.
  1. In laga run sheego dimuqraadiyadda, lana dhowro Dastuurka.
  2. In dib u eegis lagu sameeyo xeerka doorashooyinka.
  3. In la dhowro midnimada, meelna looga soo wada jeesto wax walba oo aan guud ahaan bulshada u adeegeyn.
Xeerka doorashooyinka Puntland oo isagu ahaa mid ansixintiisa uu Baarlamaanku caqabado dhowr ah kala kulmay, waxaa jira qaybo kamid ah bulshada oo sheki xoogan ka muujinaya, inkasta oo ay dowladu sheegtay in uu yahay mid aysan wax dhibaato ahi ka iman doonin.





Maxamed Salaad Xaaji Dirir, Hiiraan Online
[email protected]
Puntland, Soomaaliya











Click here
9/19/2012 12:40 PM EST
Arbaco, September 19, 2012(HOL):Waxaa magaalada Xaafuun ee dalka Gobolka Bari lagu xiray Fannaanka Khaalid Abuukar Cadaani (Super Khaalid) iyo Bashiir Mursal Ciise oo la dhashay Fannaanadda Maryan Mursal Ciise, iyagoo haatanna ku jira xabsi ku yaallada degmadaas.

9/19/2012 9:20 AM EST
Arbaco, September 19, 2012 (HOL) — Golaha ammaanka ee Qaramada Midoobay ayaa sheegay inay si dhow ula shaqeynayaan hay'adaha cusub ee dowladda Soomaaliya iyo xafiisyada xukuumadda, waxayna ku dhiirrigeliyeen madaxweynaha cusub, Xasan Sheekh Maxamuud inuu soo dhiso xukuumad loo dhan yahay lalana xisaabtami karo.

9/19/2012 9:19 AM EST
Arbaco, September 19, 2012 (HOL) — Tartan kubada cagta ah oo lagu maamuusayo wax qabadkii Alle ha u naxariistee Eng Cali Xaaji Shirwac ayaa si rasmi ah uga furmay garoonka kubada cagta Cawaale ee degmada Gaalkacyo.

9/19/2012 9:12 AM EST
Arbaco, September 19, 2012 (HOL) — Qunsulkii safaaradda Soomaaliya ee dalka Kenya, Maxamed Cismaan Adan (Edson) ayaa maanta lagu aasay magaalada Nairobi ee dalka Kenya, kaddib markii uu xalay ku geeriyooday isbitaal ku yaalla magaalada Nairobi.

9/19/2012 8:17 AM EST
Arbaco, September 19, 2012 (HOL) — Qurbo-joogta beesha Xawaadle ayaa gef ku tilmaamay hadallo ay warbaahinta siiyeen shaqsiyaad beesha ka tirsan, kuwaasoo eedeyn ugu soo jeediyeen Ugaaska beesha, Ugaas C/raxmaan Ugaas Khaliif Ugaas Rooble.

9/19/2012 6:30 AM EST
Arbaco, September 19, 2012 (HOL) — Dadka ku dhaqan magaalada Kismaayo ayaa saaka ku waabariistay ciidamo aad u tiro badan iyo gaadiidka nooca dagaalka oo soo oo gaafwareegaya wadooyinka magaalada, waxaana sidoo kale magaalada soo gaaray masuuliyiin sar sare oo katirsan xarakada Al-shabaab.

9/19/2012 6:28 AM EST
Arbaco, September 19, 2012 (HOL) — Mas’uuliyiin ka tirsan maamulka gobolka Galguduud, odayaal iyo waxgarad ka soo jeeda gobollka ayaa siweyn ugu howlan joojinta colaad u dhaxeeya labo beelood oo wada-dega gobolkaas.

9/19/2012 4:16 AM EST
Arbaco, September 19, 2012 (HOL) — Madaxweynaha Soomaaliya, Xasan Sheekh Maxamuud ayaa xalay kulan kula yeeshay xarunta madaxtooyada xildhibaannada baarlamanka federalka Soomaaliya iyo murashaxiintii xilka madaxweynenimo kula tartamay.

9/19/2012 3:56 AM EST
Arbaco, September 19, 2012 (HOL) — Afhayeenka Xarakada Al-Shabaab, Sheekh Cali Maxamuud Raage (Sheekh Cali Dheere) oo shir jaraa'id qabtay ayaa sheegay in ka bixitaanka magaalada Kismaayo uu ka horreeyo dhiig badan oo daata, xilli ay ka jirto magaaladaas cabsi weyn dadkuna ay ka barakacayaan.

9/19/2012 3:35 AM EST
Arbaco, September 19, 2012 (HOL) — Kooxo hubeysan ayaa xalay degmada Afgooye ee gobolka Shabeellada hoose ku toogtay mid ka mid ah askarta ciidamada dowladda Soomaaliya ee halkaas ku sugan, iyadoo saakayna laga maqlay qaraxyo waaweyn.

9/19/2012 3:11 AM EST
Arbaco, September 19, 2012 (HOL) — Wasiirka arrimaha dibadda ee Kenya, Sam Ongeri ayaa iska diiday in qaraxii ismiidaaminta ahaa ee toddobaadkii hore lagu weeraray hoteel uu deggenaa madaxweynaha cusub ee Soomaaliya uu ku eedeeyay madaxweynihii hore ee Soomaaliya, Shariif Sheekh Axmed.