3/18/2024
Today from Hiiraan Online:  _
Wararka Maanta- Isniin, May 7 , 2012
Madaxweyne Ku xigeenka Somaliland oo xadhiga ka jaray dhisme loo dhisay Guddida Doorashooyinka Somaliland (SAWIRRO)


Isniin, May 07, 2012 (HOL)- Munaasibad balaadhan ayaa loo sameeyey dhisme cusub oo saddex dabaq ka kooban oo loo dhisay guddida doorashooyinka Somaliland, waxaana xadhiga ka jaray Madaxweyne ku-xigeeenka Somaliland Md. CabdiRaxmaan Cabdilaahi Ismaaciil (Saylici).

Xafladan waxa ka soo qaybgalay Madaxweyne Kuxigeenka Somaliland Md. Cabdiraxmaan Cabdilaahi Ismaaciil (Saylici), Guddoomiyaha Golaha Wakiillada Cabdiraxmaan Maxamed Cabdilaahi (Cabdiraxmaan Cirro), Wasiirka Maaliyada Cabdicasiis Maxamed Samaale, Wasiirka Warfaafinta Boobe Yuusuf Ducaale, Madaxa barriga iyo badhtamaha hay’ada Inter-peace Cabdiraxmaan Raage, xubno ka socday Guddida Somaliland ka taageera kobcinta dimuqraadiyadda iyo doorashooyinka iyo marti sharaf kale.

Ugu horeyn waxa halkaasi ka hadlay Guddoomiyaha Komishanka Doorashooyinka Qaranka Md. Ciise Yuusuf X. Maxamed (Xamari), waxaanu sheegay qaabka doorashadda dawladaha hoose inay ka duwan tahay qaabkii hore, iyadoo wakhtigii hore qofku Dooran jiray ururka, balse imika la dooranayo qofka musharaxa ah, taasina ay keenayso Kharash ka badan tii hore iyo in la fahansiiyo dadka codka bixinaya qaabkan cusub.


Guddoomiye Xamari waxa uu u mahad celiyay qaadhaan-bixiyeyaasha taageera dimuqraadiyadda Somaliland oo ay ka mid yihiin Maraykanka, SWEDEN, UK, SWIZERLAND, Midowga Yurub, Denmark iyo NORWAY. Waxa kale oo uu xusay inay kaalin ka qaateen dhismahan jaaliyadaha Somaliland ee ku dhaqan dalka dibadiisa.

Madaxweyne Ku xigeenka Somaliland Md. Cabdiraxmaan Cabdilaahi Ismaaciil (Saylici), oo isna munaasibadaasi ka hadlay, ayaa sheegay inay aad ugu faraxsan yihiin in dhisme weyn loo dhiso Gudida doorashooyinka qaranka oo uu tilmaamay inay shaqo xasaasi ah u hayaan dalka.

U qaybsamaha arrimaha Soomaaliya ee safaaradda Maraykanka Mr. Douglas Meurs,isla markaana ka mid ah gudidda deeqbixiyeyaasha Caalamiga ah ayaa sheegay in wax ka bedelka lagu sameeyey nidaamka doorashooyinka  golaha deegaanka Somaliland ay soo dhoweeyeen ururadda iyo xisbiyadda uu la kulmay, isla markaana nidaamkani ka balaadhan yahay kii hore, oo u baahan yahay sidii loo fahansiin lahaa dadka codaynaya iyo agab ka badan kii hore ee doorashaddii hore lagu galay.


Waxa kale oo xafladaasi ka hadlay Afhayeenka Komishanka doorashooyinka Md. Maxamed Axmed Xirsi (Geelle), Wasiirka warfaafinta Md. Boobe Yuusuf Ducaale iyo Guddoomiyaha Barriga iyo badhtamaha hay’ada Inter-peace Cabdiraxmaan Maxamuud Raagge.

Intaas ka dibna waxa uu madaxweyne Ku xigeenku uu shahaado sharafyo gudoon siiyay Guddida qaadhaan-bixiyeyaasha caalamka oo uu sheegay inay ku mutaysteen taageeridii doorashooyinkii kala duwanaa ee dalka ka qabsoomay.





Barkhad-Ladiif M. Cumar
[email protected]
Hargeysa, Somaliland













Click here
5/7/2012 5:08 PM EST
Isniin, May 07, 2012 (HOL): Xaflad si seer sare ah loo soo agaasimay oo markii ugu horreysay mideysay Soomaalida ku nool gobollada laysku yiraahdo New England ee dalka Maraykanka ayaa ka dhacday magaalada Boston ee Gobolka Massachusetts.

5/7/2012 4:24 PM EST
Isniin, May 07, 2012— Dowladda Japan ayaa maanta ku wareejisay Dowlada KMG deeq ay ugu tala gashay Ciidanka Booliska Soomaalyeed. Deeqdaan ayaa ka koobanayd 16 Land Cruiser, 2 Ambulance 2 gaari oo kuwa ciidanka lagu qaado ah iyo jaakadaha laga xirto xabadda ( Bullet proof Jackets ) iyo koofiyadaha aan xabaddu karin.

5/7/2012 9:28 AM EST
Isniin, May 07, 2012 (HOL) — Kulan ay ka soo qeyb-galeen mas’uuliyiinta maamulka gobollka Hiiraan ayaa waxaa maanta ku yeeshay magaalada Beledweyne gollaha deegaannka, kuwaasoo markii ugu horeysay doortay Duqa magaalada Beledweyne.

5/7/2012 9:05 AM EST
Isniin, May 07, 2012 (HOL) — Madaxweynihii hore ee dalka Ruushka Vladimir Putin ayaa markii saddexaad loo dhaariyay xilka madaxnimo ee dalkaas, kaddib markii uu ku guuleystay doorashooyinkii madaxweynenimo ee Ruushka.

5/7/2012 8:36 AM EST
Isniin, May 07, 2012 (HOL) — Kulankan ayaa waxaa looga hadlay sidii odayaasha dhaqanka ay qayb uga qaadan lahaayeen ansixinta dastuurka cusub ee dalka oo ay dowladdu doonayso in la meel mariyo si looga gudbo xilliga KMG ah ee lagu jiro.

5/7/2012 8:17 AM EST
Isniin, May 07, 2012 (HOL) — Arday tiradoodu ahayd 29-ruux oo ka bogsaday xanuunka dhimirka ayaa waxbarasho ka dhamaystay xarunta lagu xanaaneeyo xanuunka maskaxda ee SAHAN, kuwaas oo ka qalinjabiyey waxbarashadda farsamooyinka Dawaarka iyo Laydhka,waxaana shahadooyinkii waxbarashadda lagu gudoonsiiyey xaruntoodda SAHAN oo ku taalla duleedka galbeed ee magaaladda Hargeysa.

5/7/2012 8:13 AM EST
Isniin, May 07, 2012 (HOL) — Dajiraha Soomaaliya ee dalka Zambia Shirwac C/llaahi Ibraahim oo la hadlay wargeys lagu magacaabo The Post Zambia ayaa iska diiday eedeymo kaga yimid wasaaradda arrimaha dibadda dalkaas, taasoo ku saabsanayd inuu mas'uul ka ahaa rabshad ka dhacday safaaradda Soomaaliya ee dalka Zambia taasoo keentay in la xiro safaaradda.

5/7/2012 7:18 AM EST
Isniin, May 07, 2012 (HOL) — Shir ay soo abaabuleen ururka Hiilqaran oo ah urur waddani ah oo ka mid ah xisbiyadda isbedeldoonka ah ee u tartamaya qabashada hogaanka dalka Soomaaliya, oo ay horkacyaaan shaqsiyaad qurba-joog ah ayaa maanta lagu qabtay Magaalada Apeldoorn ee dalka Holland, waxaana kulankan oo ay ka soo qeybgaleen bulshadda Soomaalida ee ku dhaqan magaaladaas, & gobolo kale ayaa waxaa khudbado kala duwan ka jeediyey Guddoomiyaha Guud ee Xisbiga Qaran Ibraahim Macalin Mursal, Prof Axmed Ismaaciil Samatar oo ka mid ah xubnaha ugu firfircoon ee xabsiga, Guddoomiyaha KMG ah ee faraca Holland Cali Cabdi Waare, Avv. Muuse Xersi & xubno kale oo fara badan.

5/7/2012 6:33 AM EST
Isniin, May 07, 2012 (HOL) — Waxaa Isbitalka magaalada Kismaayo ee xarunta gobolka Jubada Hoose la gaarsiiyay dad gaaraya ilaa 20 qof kuwaa oo la ildarnaa xanuuno kala duwan, waxaana dadkani kamid ah dad ay aad u liidato xaaladooda caafimaad.

5/7/2012 6:30 AM EST
Isniin, May 07, 2012 (HOL) — Maamulka Dowladda KMG Soomaaliya ee gobolka Gedo ayaa maanta fuliyay xukun dil ah, kaasoo lagu fuliyay askari ka tirsan ciidamada dowladda oo ku eedeysnaa in uu dil u geystay askari kale.

5/7/2012 3:37 AM EST
Isniin, May 07, 2012 (HOL) — Dood-cilmiyeed looga hadlayay xiriirka ka dhaxeeya hooyada iyo gabadheeda ayaa lagu qabtay Muqdisho, kaasoo ay ka qeyb-galeen in ka badan 150-haween, saraakiil ciidan iyo arday dhigta iskuulladai yo jaamacadaha Muqdisho.

5/7/2012 3:09 AM EST
Isniin, May 07, 2012 (HOL) — Dadka ku dhaqan magaalada Beledweyne ayaa xalay saqdii dhexe mar kaliya ku soo toosay dhawaaqa hubka noocyadiisa kala duwan oo ay is weydaarsanayaan ciidamada maamulka gobollka Hiiraan iyo xoogagga Xarrakada Al-shabaab kadib dagaal culus oo labada dhinac ku dhaxmaray xaafadda howl-wadaag ee magaalada Beledweyne.