9/23/2019
Today from Hiiraan Online:  _
Wararka Maanta- Arbaco, Jun 13, 2012
Odayaasha-dhaqanka oo Muqdisho loogu qabtay Tababar ku saabsan Isku-xirka iyo sidii Bulshadu u wada-noolaan lahayd



Arbaco, June 13, 2012 (HOL) — Tababar lagu baranayay sida dadku isugu xirmaan iyo sida ay bulsho caddaalad wax ugu qeybsato ayaa Muqdisho loogu soo gaba-gabeeyay odayaasha dhaqanka qaarkood.

Tababarkan oo socday muddo saddex maalmood ah ayaa waxaa qabashadiisa iska kaashaday haya'dda Swedish International Development Agency (SIDA), Forum SYD, Somali Development Foundation (SDF) iyo Bulal Self Help Organization (BULSHO) waxaana lagu qabtay hoolka midowga ardayda oo ku yaalla Muqdiho.

"Waxaa tababarkan lagu baranayay xuquuqda aadanuhu isku leeyahay iyo sida ay caddaalada ugu wada-noolaan karaan," ayuu yiri mas'uul ka mid ah haya'daha fuliyay siminaarkan.

Waxaa kaloo tababarkan lagu baranayay sida loo xalliyo khilaafaadyada ka dhaca bulshada dhexdeeda iyo sidii aysan u soo noqon lahayd is-tixgelinta bulshada iyo inay nabad ku wada noolaadaan.

Intii uu kulanku socday ayaa waxaa ka qaybgalayaashii dhexmaray doodo, iyadoo lagu booriyay odayaasha dhaqanka inaan la yasin haweenka isla markaana wax laga siiyo shaqooyinka intii suurogal ah.

Ugu dambeyn, hay'adaha siminaarka soo qabanqaabiyay ayaa waxay sheegeen inay tababar noocan oo kale ah qaban doonaan marka la gaaro bisha Ogoosto ee sannadkan haddii Alle idmo.




Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
6/13/2012 7:38 PM EST
Arbaco, June 13, 2012(HOL):-Ra’iisul Wasaaraha Soomaaliya Professor Cabdiweli Maxamed Cali oo booqasho rasmi ah ku jooga Kenya ayaa maanta kulamo la kala qaatay Madaxweynaha Dalka Kenya Mudane Mwai Kibaki iyo Ra’iisul Wasaaraha Kenya Raila Odenga. Kulanka Madaxweynaha Kibaki ayaa ahaa kii ugu horreeyey ee dhex mara Ra’iisul Wasaare Cabdiweli iyo Madaxweyne Kibaki.

6/13/2012 7:42 AM EST
Arbaco, June 13, 2012 (HOL) — Afhayeenkii baarlamaanka Soomaaliya ee sannadihii 1966-kii illaa 1969-kii, Sheekh Mukhtaar Maxamed Xuseen ayaa shalay ku geeriyooday magaalada Nairobi ee dalka Kenya, iyadoo dowladda KMG ah ay sheegtay in loo sameynayo aas Qaran iyo baroor-diiq.

6/13/2012 7:26 AM EST
Arbaco, June 13, 2012 (HOL) — Guddoomiyaha golaha fulinta ee Ururka Ahlusunna Waljamaaca, Sheekh Maxamed Yuusuf Xeefow ayaa sheegay kasoo bixitaankoodii degmada Ceelbuur iyo deegaanka Wabxo ee gobolka Galguudud ay ahayd mar ay bixiyeen saraakiisha ciidamadaas hoggaaminayay.

6/13/2012 6:42 AM EST
Arbaco, June 13, 2012 (HOL) — Ergayga xogyahaha guud ee Qaramada Midoobay u qaabilsan arrimaha Soomaaliya, Danjire Augustine Mahiga ayaa sheegay maanta in uu booqanayo degmada Afgooye ee gobolka Shabeellada hoose.

6/13/2012 6:27 AM EST
Arbaco, June 13, 2012 (HOL) — Madaxweynaha Soomaaliya, Shariif Sheekh Axmed oo ay wehliyaan saraakiisha ciidamada DKMG ah iyo kuwa AMISOM ayaa maanta ku tagay booqasho deegaanka Mareereey oo 15-km u jira degmada Afgooye e gobolka Shabeellada hoose.

6/13/2012 3:01 AM EST
Arbaco, June 13, 2012 (HOL) — Xukuumadda Washington ayaa toddobadkii hore ka qaadday jasiiradda Malta 20-ruux oo qoxooti ah kuwaasoo isuguna jira Soomaali iyo Eritrean, waxaana la dajiyay dalka Mareykanka.