3/29/2024
Today from Hiiraan Online:  _
Wararka Maanta- Talaado, July 3 , 2012
SHEEKH AXMED MADOOBE: "Ciidamadeennu waxay Kismaayo kula wareegi doonaan howlgal uusan dhiig badan ku daadan"
Talaado, July 03, 2012 (HOL) — Hoggaamiyaha Raas-kambooni oo ka dagaalanta gobollada Jubbooyinka, Sheekh Axmed Maxamed Islaam (Sheekh Axmed Madoobe) ayaa sheegay in ciidamada dowladda KMG, kuwa Raas-kambooni iyo militariga Kenya ay hadda ku jiraan diyaar-garow ballaaran oo ay ku doonayaan inay ku weeraraan goobaha ay ka taliso Xarakada Al-shabaab ee gobollada Jubbooyinka.

Sheekh Axmed Madoobe ayaa sheegay in duullaankooda uu ku wajahan yahay magaalooyinka Kismaayo, Bu'aale iyo Jilib, wuxuuna xusay inay rajeynayaan in  magaalooyinkaasi ay la wareegaan iyadoo uusan dhiig badan ku daadan.

Masuulkani ayaa intaa ku daray in ciidamada dowladda KMG, Raaskaambooni iyo kuwa Kenya ay haatan ku suganyihiin meel qiyaastii 100 KM u jirta magaalada Kismaayo ee xarunta gobolka Jubada Hoose, dhawaanna ay u dhaqaaqi doonaan dhanka magaalada Kismaayo.

"Dagaalka ka dhanka ah Al-shabaab ee gobollada Jubooyinka hadda meel wanaagsan ayuu noo marayaa, ciidamadu waxa ay u diyaar garoobeen weerarro saf ballaaran ah oo ku aadan magaalada Kismaayo, waxaana ku hanweynahay in wax dhiig ah uusan ku daadan doonin qabshada magaalada Kismaayo," ayuu yiri Axmed Madoobe.

Sidoo kale Hogaamiyaha kooxda Raaskaambooni oo ka jawaabayay su'aal ahayd sida uu u arko shir ay soo qabanqaabiyeen wadamada ku bahoobay urur goboleedka IGAD oo ka dhacay magaalada Nairobi, kaasoo looga hadlayay maamul u sameynta gobollada Jubooyinka iyo Gedo, ayuu sheegay in shirkaasi uu yahay mid haatan bilow ah oo dadka isla dhashay ee gobollada Jubooyinka iyo Gedo ay ku dhisanayaan maamul ay ku mideysanyihiin, wuxuuna xusay in lagama maarmaan ay tahay in maamul loo dhiso gobolladaasi marka laga saaro Al-shabaab.

Hadalkan kasoo yeeray hogaamiyaha kooxda Raaskaambooni ayaa kusoo beegmaya xilli masuuliyiin u hadashay dowladda Kenya ay shaaca ka qaadeen in ay dardar gelin doonaan dagaallada ka dhanka ah Al-shabaab ee ay ka wadaan gudaha dalka Soomaaliya.

Xasan Nuur, Hiiraan Online
[email protected]
Kismaayo, Soomaaliya











Click here
7/3/2012 9:38 AM EST
Danjiraha Soomaaliya u jooga dalka Kenya Maxamed Cali Nuur (Ameeriko) ayaa si kulul u cambaareeyay weeraradii lagu qaaday magaalada Gaarissa ee xarunta gobolka waqooyi bari ee Soomaalida.

7/3/2012 9:25 AM EST
Waxaa lagu soo gaba gabeeyay Xabsiga Dhexe ee Xamar Tartan loogu magac daray Todobaadka iyo Xornimada Soomaaliya, kaasoo ay ka qeyb galeen ilaa lix kooxood oo wada ciyaaray ciyaaro is arag ah.

7/3/2012 8:58 AM EST
Talaado, July 03, 2012 (HOL) — Maamulka degmada Yaaqshiid ee gobolka Banaadir ayaa soo bandhigay maanta oo Talaado ah saddex dhallinyaro rag ah oo laba ka mid ah ay xirnaayeen dharka dumarka dhacna u geysanayay dukaan ku yaalla suuqa labaad ee Muqdisho ugu weyn (Suuq Bacaad).

7/3/2012 8:37 AM EST
Talaado, July 03, 2012 (HOL) — Munaasabado si heer sare loosoo agaasimay ayaa si gooni-gooni ah uga kala dhacday degmooyinka degmooyinka Baydhaba, Berdaale, Qasax-dheere iyo deegaanka Daynuunaay oo dhammaantood ka tirsan gobolka Bay.

7/3/2012 7:25 AM EST
Talaado, July 03, 2012 (HOL) — Maamulka tuulada Xiriiro oo ka tirsan gobolka Bari ayaa sheegay in ciidamada badda Puntland ay deegaankaas ku dileen laba qof oo shacab ah, sideed kalena ay ku dhaawacyo u geysteen.

7/3/2012 4:19 AM EST
Talaado, July 03, 2012 (HOL) — Hay'adda caawisa qoxootiga ee fadhigeedu yahay dalka Norway (NRC) ayaa sheegtay inay joojinsay howlihii samafalka ahaa ee ay ka wadday xeryaha qoxootiga Dhadhaab ee dalka Kenya, kaddib afduubkii loo geystay afar shaqaalaheeda ka mid ah oo ciidamada DKMG ah iyo kuwa Kenya ay xoog kusoo furteen.

7/3/2012 3:52 AM EST
Talaado, July 03, 2012 (HOL) — Ra'iisul wasaaraha Kenya, Raila Odinga ayaa ku hanjabay in ciidamadooda ku sugan Soomaaliya ay xoojin doonaan dagaalka ay kula jiraan Xarakada Al-shabaab oo uu ku eedeeyay weerarro ka dhacay Gaarisa iyo afduubyada shaqaale gargaar oo ka tirsan hay'adda NRC.

7/3/2012 3:45 AM EST
Talaado, July 03, 2012 (HOL) — Kooxo hubeysan ayaa magaalada Garoowe ee xarunta Puntland ku toogtay xalay taliye ku xigeenkii ciidanka booliiska Puntland, G/sare Cabdullaahi Saalax Nadaalo, iyadoo aan si dhab ah loo ogeyn sababta loo dilay iyo cid dilkiisa ka dambeysay.