3/29/2024
Today from Hiiraan Online:  _
Wararka Maanta- Arbaco, Sept 5 , 2012
Ciidamada dowladda Soomaaliya iyo kuwa AMISOM oo qabsaday deegaanno ka tirsan gobolka Shabeellada dhexe

Arbaco, September 05, 2012 (HOL) — Dowladda Soomaaliya iyo AMISOM ayaa sheegay maanta in ciidamadooda ay la wareegeen deegaanno ku yaalla xeebta bad-weynta Hindiya oo ay ka mid tahay Ceel-macaan oo ay ku taallo dekeda macmal ah oo ay sheegeen in Al-shabaab ay u isticmaali jirtay inay kala soo dagaan hbka iyo dagaalyahannada ajnabiga ah.

Afhayeenka maamulka gobolka Shabeellada dhexe ee dowladda Somalia, Daa'uud Xaaji Cirro oo saxaafadda la hadlay maanta oo Arbaco ah ayaa sheegay in shalay ay ciidamada isbahaysana xaqiijiyeen gacan ku haynta deegaannadaas isagoo u sheegay wariyeyaasha inay iska caabin aan badnayn la kulmeen.

"Qorshahan waa mid aan ku doonayno inaan ku xaqiijinno ammaanka deegaannada ku yaalla xeebta, aana ugu diyaar-garowno sidii aan ku gaari lahayn degmada Jowhar ee xarunta gobolka Shabeellada dhexe," ayuu yiri afhayeenka maamulka Shabeellada dhexe.

Kama uusan hadlin afhayeenku khasaaraha ka dhashay dagaalka, balse wuxuu sheegay in xaaladdu ay tahay mid daggan ayna ciidamada dowladda iyo kuwa AMISOM ay si buuxda deegaanadaas gacanta ugu hayaan.

Dhanka kale, Taliyaha ciidamada AMISOM, Jen. Andrew Gutti oo warsaxaafadeed ay AMISOM soo saartay lagu soo xigtay ayaa sheegay in qabsashada ay qayb weyn ka tahay sidii ay u adkeyn lahaayeen ammaanka Muqdisho.

"La wareegidda goobahan waxay qayb weyn ka qaadanaysaa sugidda ammaanka Muqdisho, waxayna dadka ku nool u horseedaysaa inay dib noloshooda u dhisaan," ayuu yiri Jen. Gutti oo xusay in dekeda Ceel-macaan ay ahayd goob ay Al-shabaab kala soo dagto hubka.

Ciidamada dowladda Soomaaliya iyo kuwa AMISOM oo qayb ka ah kuwa gacanta siinaya ayaa waxay tan iyo sannadkan billowgiisii kala wareegeen Al-shabaab dhowr degmo oo muhiim ah, kuwaasoo ay ku jiraan Baladweyne iyo Baydhabo.

Ugu dambeyn, afhayeenka maamulka gobolka Shabeellada dhexe ayaa sheegay inay shacabka ku nool degmada Jowhar ka dalbanayana inay gacan kusii yaan ciidamada isbahaysanaya sidii ay kula wareegi lahaayeen gacan ku haynta degmada Jowhar oo ah xarunta gobolka Shabeellada dhexe.

Illaa iyo hadda ma jiro hadal kasoo baxay dhinaca Al-shabaab oo ku saabsan in laga qabsaday deeganno ku yaalla gobolka Shabeellada dhexe, inkastoo dadka ku nool deegaannadaas ay xaqiijiyeen in ciidamada dowladda iyo kuwa AMISOM ay ku sugan yihiin deegaannadooda.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
9/5/2012 12:13 PM EST
Arbaco, September 05, 2012 (HOL) — Guddiga doorashada madaxweynaha Somalia ayaa maanta shaaciyay magacyada murashaxiin buuxiyay shuruudihii looga baahnaa kuwaasoo ka mid ah 37 xubnood oo illaa iyo hadda gudbiyay araajidooda.

9/5/2012 8:49 AM EST
Arbaco, September 05, 2012 (HOL) — Guddoomiyaha xisbiga Mucaaradka ah ee UDUB, Daahir Rayaale Kaahin ayaa waxba kama jiraan ku tilmaamay qoraal kasoo baxay guddida diiwaangelinta doorashooyinka madaxweynenimo ee Somaliland oo sharci-daro ku tilmaamay shirkii lagu doortay musharaxiinta doorshada madaxweynenimo ee Somaliland uga qaybgeli doona xisbiga UDUB oo kala ah, Cali Waran-Cadde iyo Axmed Xaaji Daahir.

9/5/2012 7:16 AM EST
Arbaco, September 05, 2012 (HOL) — Dalladda dhaliyarada bartamaha iyo Koofurta Soomaaliya (South Central Somali Youth Umbrella) ayaa kulan weyn oo uu ka qayb-galeen arday iyo dadweyne fara badan ayaa waxay ku qabteen Muqdihso.

9/5/2012 3:58 AM EST
Arbaco, September 05, 2012 (HOL) — Madaxweynaha Somaliland, Axmed Maxamed Maxamuud (Siilaanyo) oo shalay galabta ku laabtay magaalada Hargeysa kaddib ka qaybgalkii aaskii ra'iisul wasaarihii hore ee Itoobiya Meles Zenawi ayaa sheegay inay soo dhaweynayaan cid walba oo kusoo baxda doorashada madaxweynenimo ee Soomaaliya.

9/5/2012 3:19 AM EST
Arbaco, September 05, 2012 (HOL) — Dadka ku dhaqan degmooyinka Maxaas iyo Moqokori 24-kii saac ee la soo dhaafay waxaa ay ku jireen gurmad xoog leh oo la xiriir bal sidii wax badan looga ogaan lahaa ugu danbeytii khasaaraha uu sababay dab habeen hore qabsaday dhul howd ah oo u dhaxeeya labada degmo.

9/5/2012 3:14 AM EST
Arbaco, September 05, 2012 (HOL) — Markab dagaal oo laga leeyahay dalka Kenya ayaa duqeeyay Talaadadii shalay dekedda iyo garoonka diyaaradaha ee magaalada Kismaayo oo ah xarunta gobolka Jubbada Hoose, xilli ay degmadaas uga qaxayaan dagaallada awgood dad fara badan.

9/5/2012 3:14 AM EST
Arbaco, September 05, 2012 (HOL) — Ugu yaraan lix qof oo ay ku jiraan labadii dhinac ee dagaalamay ayaa ku dhintay dagaal culus oo xalay saqdii dhexe gudaha degmada Garbahaarey ku dhexmaray ciidamada dowladda Soomaaliya iyo xoogagga Al-shabaab.