10/21/2019
Today from Hiiraan Online:  _
Wararka Maanta- Isniin, Nov 27, 2012
Ciidamada Ammaanka oo ku guuleysatay inay qaadaan Isbaarooyin yaallay Degmooyin ka tirsan Gobolka Banaadir


Talaado, November 27, 2012 (HOL) — Ciidamada ammaanka dowladda Soomaaliya ayaa maanta ku guuleysatay inay toddoba isbaaro ka qaadaan degmooyin ka tirsan gobolka Banaadir, iyadoo sidoo kalena ay ciidamadu qabteen kooxihii isbaarooyinka ay u yaalleen degmooyinkaas iyo dabley kale.

Howgalkan oo ay uu hoggaaminayay taliyaha nabadsugidda gobolka Banaadir Col. Khaliif Axmed Ereg ayaa waxaa lagu qaaday isbaarooyin yaallay degmooyinka Yaaqshiid iyo Kaaraan oo dhinaca waqooyi ee Muqdisho ku yaalla.

"Waxaan ku guuleysannay inaan qaadno toddoba isbaaro, waxaana sidoo kale ku qabanay howgalka kooxihii ay isbaarooyinkaas u yaalleen iyo kooxo kale oo hub ku sitay magaalada, kuwaasoo ay ku jiraan xubno Al-shabaab ka tirsan," ayuu yiri Col. Ereg oo saxaafadda la hadlay howgalka kaddib.

Howgalkan ayaa wuxuu imaanayaa iyadoo madaxweynaha Soomaaliya uu amar ku bixiyay inaysan jiri karin isbaaro lacago lagu qaado oo dhextaalla magaalada, isagoo sheegay in sidoo kale la joojiyay lacagihii ay qaadi jireen maamulka gobolka iyo wasaaradda maaliyadda.

"Dad kala duwan ayaa gacan nagu siiyay inaan isbaarooyinka qaadno, sidoo kalena aan helno hub ay Al-shabaab qabsadeen, waxaana shacabka ku boorrinaynaa inay sii wadaan gacanta ay siinayaan ciidamada ammaanka," ayuu Ereg mar kale yiri.

Sarkaalkan haysta nabadsugidda gobolka Banaadir ayaa sheegay in howgalladan ay yihiin kuwo magaalada looga sifeynayo isbaarooyinka iyo in gaadiidka lacago sharci-darro ah laga qaado.

Warar hoose ayaa sheegaya in ciidamadu ay maalinta berri ah u socdaan degmada Wadajir halkaasoo ay yaallaan isbaarooyin fara badan, iyadoo wararka laga helayo degmadaasna ay sheegayaan in ciidamada jooga isbaarooyinka la xoojiyay.

Maxamed Xaaji Xuseen, Hiiraan Online
[email protected]
Muqdisho, Soomaaliya









Click here
11/27/2012 10:40 AM EST
Talaado, November 27, 2012 (HOL)- Hal qof ayaa ku dhintay laba kalena waa dhaawac ka dib markii ciidanka la socda sanaaduuqda degmadda Lughaya lageeyey ay rasaas ku fureen dadweyne ku soo ururay goobtii sanaduuqda ladhigay.

11/27/2012 9:30 AM EST
Talaado November 27, 2012 (HOL) Ra’iisul Wasaare ku Xigeenka ahna Wasiiradda Arimaha Dibedda ee Soomaaliya Marwo Fawsiya Yuussuf Xaaji Aadan ayaa magaalada Nayroobi kula kulantay Wasiirka Arimaha Dibedda Kenya Proff Samson Ongeri kaasi oo ay...

11/27/2012 8:38 AM EST
Talaado, November 27, 2012 (HOL) — Guddoomiyaha baarlamaanka Soomaaliya ahna ku simaha madaxweyanaha, Prof. Maxamed Cismaan Jawaari iyo ra'iisul wasaare, Cabdi Faarax Shir-doon (Saacid) ayaa maanta siyaabo kala duwan ula kulmay wafdi ka socday dalalka Yurub.

11/27/2012 7:29 AM EST
Talaado, November 27, 2012 (HOL) — Rag bastoolado ku hubeysan ayaa goor dhaw bartamaha magaalada Baladweyne ku toogtay guddoomiyihii gollaha odayaasha dhaqanka gobollka Hiiraan nabadoon Max’ed Shiikh Xusseen Maryacade.

11/27/2012 6:46 AM EST
Talaado, November 27, 2012 (HOL) — Afhayeenka ciidamada AMISOM, Col. Cali Aadan Xumud ayaa sheegay in ciidamada dalka Itoobiya ee ku sugan Baladweyne ay dib ugu laaban doonaan xuduudda ay Soomaaliya iyo Kenya wadaan markii ay ciidamada Jabuuti kala wareegaan howgalka.

11/27/2012 6:46 AM EST
Talaado, November 27, 2012 (HOL) — Tababar socon doona muddo lix maalmood ah oo sare loogu qaadayo aqoonta Injineerrada,Shaqaalaha Maamulka Mashaariicda (Procurment), iyo Shaqaalaha waaxyaha Hawlaha Guud iyo Qorshaynta degmooyinka gobolka Banaadir ayaa ka furmay maanta oo Talaado ah magaalada Muqdisho, waxaana tababarkan fulinaysa hay'adda shaqaalaha aduunka ee ILO.

11/27/2012 6:02 AM EST
Talaado, November 27, 2012 (HOL) — Horyaalkii 13-aad Kubadda Gacanta ayaa ka furmay garoonka 1da Luulyo (Ex-Lugino) ee Magaalada Muqdisho. Iyadoo ay kasoo qeyb-galeen furitaanka tartarkan mas`uuliyiin ka socotay wasaaradda Isboortiga, maamulka gobolka Banaadir, GOS iyo madaxda xiriirrada kala duwan.

11/27/2012 5:54 AM EST
Talaado, November 27, 2012 (HOL) — Booliiska Kenya ayaa sheegay inay qabteen ruuxa ay uga shakisan yihiin inuu ka dambeeyay dilkii saddex askari oo Kenyan ah toddobaadkii hore loogu geystay degmada Gaarisa ee gobolka Waqooyi-bari.

11/27/2012 5:49 AM EST
Talaado, November 27, 2012 (HOL) — Wefti u hogaaminay gudoomiye ku xigeenka 1aad ee urur siyaasadeedka XAQSOOR oo xalay maleeshiyo ka tirsan Khaatumo State ku afduubteen meel u dhow degmada xudun ee gobolka Sool, ayaa saacado ka dib xoriyadoodii dib loogu soo celiyey.

11/27/2012 3:23 AM EST
Talaado, November 27, 2012 (HOL) —Ciidamada dowladda Soomaaliya oo kaashanaya kuwa Raaskaamboni ayaa ka wada xaafadaha magaalada Kismaayo howlgallo baaritaanno ah, iyadoona howlgalladaasi lagu qabqabtay dad fara badan.

11/27/2012 12:45 AM EST
Talaado, November 27, 2012 (HOL) — Dowladda Uganda oo horraantii bishan ku goodisay inay ciidamadeeda Soomaaliya ku sugan kala baxayso haddii aan laga laaban eedeyn uu u soo jeediyay golaha ammaanka ee Qaramada Midoobay oo ah inay taageeraan jabahad ka dagalaanta dalka DR Congo ayaa sheegtay inay 2,000 oo askari oo dheeraad ah ay ku xoojinayso howgalka AMISOM ee Soomaaliya.