9/21/2018
Today from Hiiraan Online:  _
Wararka Maanta- Isniin, May 28, 2012
Ra'iisul Wasaareyaasha dalalka Soomaaliya iyo Kenya oo Nairobi ku yeeshay kulan ay uga hadleen Arrimaha Soomaaliya



Isniin, May 28, 2012 (HOL) — Ra'iisul wasaaraha Soomaaliya, C/weli Maxamed Cali ayaa maanta oo Isniin ah kula kulmay magaalada Nairobi ee dalka Kenya dhiggiisa dalkaas, Raila Odinga iyagoo kawada hadlay arrimo ay ka mid yihiin xiriirka labada dal, arrimaha amniga iyo howlgallada ka socda Soomaaliya oo ay ciidamada Kenya qaybta ka yihiin.

Kulanka labadan ra'iisul wasaare ayaa waxaa goobjoog ka ahaa, safiirka Soomaaliya u fadhiya dalka Kenya, Maxamed Cali Ameerika iyo Ilyaas Barre Shiil oo ka mid ah mas'uuliyiin Kenya, iyadoo lagu soo qaaday kulanka heshiiskii madaxda Soomaalidu ay ku gaareen magaalada Addis Ababa.

Raila Odinga ayaa ku ammaanay xukuumadda KMG ah howlihii ay qabatay muddadii 11-ka bilood ah ee lasoo dhaafay, wuxuuna sheegay in dowladdiisa ay safaraaddii ay ku lahayd Soomaaliya dib uga furayso magaalada Muqdisho, si wada-shaqeynta labada dowladood ay u noqoto mid joogto ah.

Mudane C/weli Gaas ayaa dhankiisa warbixin dheer ka siiyay dhigiisa Kenya, xaalka dalka iyo horumarka baaxadda leh ee laga sameeyay dhinaca ammaanka, wuxuuna sidoo kale uga warbixiyay go'aanka xukuumadda ee ku aaddan soo afjaridda xilliga KMG ah si Soomaaliya ay u yeelato gudbto dowlad joogto ah.


Labada ra'iisul wasaare waxay isku waafaqeen in muddada yar ee ka dhimay 20-ka Ogoosto ee sannadkan laga faa'iideyto, sidoo kale waxay kawada hadleen shirka Istanbuul II oo looga hadlayo mustaqbalka Soomaaliya.

Dalka Kenya ayaa waxaa kaga sugan Soomaaliya kumannaan askari oo bil ka hor ku biiray howlgalka AMISOM, iyagoo kula dagaalamaya Koonfurta Soomaaliya xoogagga Al-shabaab oo Kenya ay ku eedeysay inay dalkooda ka geysteen falal isugu jira afduub iyo dilal qorsheysan.

Sidoo kale, ra'iisul wasaaraha Soomaaliya ayaa magaalada Nairobi kulammo kula yeeshay siyaasiyiin beesha caalamka ka tirsan, waxaana xubnihii uu la kulmay ka mid ahaa; safiirrada Mareykanka, Shiinnada iyo ergeyga gaarka ah ee Qaramada Midoobay u qaabilsan Soomaaliya, Dajire Augustine Mahiga.

Ra'iisul wasaaraha Soomaaliya ayaa lagu wadaa inuu maalinta berri ah u dhoofo dalka Turkiga si uu uga qaybgalo shirka looga hadlayo aayaha Soomaaliya, kaasoo ay ka qaybgalayaan mas'uuliyiin ka socda dalalka daneeya arrimaha Soomaaliya.




Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/28/2012 8:22 AM EST
Isniin, May 28, 2012 (HOL) — AMISOM ayaa sheegtay in ciidamadooda iyo kuwa DKMG ah oo iskaashanaya ay sugeen ammaanka deegaannada ku yaalla inta u dhexeysa magaalada Muqdisho iyo degmada Afgooye ee gobolka Shabeellada Hoose.

5/28/2012 7:57 AM EST
Isniin, May 28, 2012 (HOL) — Maamulka Puntland ayaa sheegay in ciidamadooda ammaanku xirneen 11-burcadbadeed Soomaaliyeed ah, kuwaasoo watay hub isugu jira qoryaha fudud, kuwa culus iyo gaari.

5/28/2012 7:49 AM EST
Isniin, May 28, 2012 (HOL) — Qarax weyn oo ka dhacay magaalada Nairobi ee xarunta dalka Kenya ayaa waxaa ku dhaawacmay 35-qof oo shan ka mid ah la sheegay in dhaawacyadoodu yihiin kuwo culus.

5/28/2012 6:40 AM EST
Isniin, May 28, 2012 (HOL) — Madaxweynaha Somaliland, Axmed Maxamed Maxamuud (Siilaanyo) ayaa dhagax dhigay Madaarka Caalamiga ah Cigaal ee magaaladda Hargaysa oo laga bilaabay hawl dib loogu hagaajinayo madaarka, isla markaana laga dhigayo mid casri ah oo la jaanqaada madaarada caalamiga ah ee aduunka.

5/28/2012 6:38 AM EST
Isniin, May 28, 2012 (HOL) — Warar goor dhaw naga soo gaaray degmada Cadaado ee gobolka Galguduud ayaa sheegaya in dagaal khasaare sababta uu dhex-martay xoogag ka kala tirsan Ahlusunna Waljameeca iyo maamulka Ximin iyo Xeeb oo ka dhisan bartamaha Soomaaliya.

5/28/2012 6:24 AM EST
Isniin, May 28, 2012 (HOL) — Ciidamada dowladda KMG oo garab ka helaya kuwa Kenya iyo Xarakada Al-shabaab ayaa saaka aroortii ku dagaalamay deegaanka Qooqaani ee gobolka Jubada Hoose, iyadoona dagaalkaasi uu ahaa mid aad u culus oo ay labada dhinac isu adeegsanayeen hubka noocyadiisa kala duwan.

5/28/2012 3:59 AM EST
Isniin, May 28, 2012 (HOL) — Kooxo bastoolado ku hubeysan ayaa xalay ku dilay degmada Wardhiigley ee gobolka Banaadir mid ka mid ah guddoomiye waaxeedyada maamulka degmadaas, iyadoo dilkan uu imaanayo xilli ay ciidamada dowladda KMG ah iyo kuwa AMISOM qabsadeen degmada Afgooye oo 30-km u jirta Muqdisho.

5/28/2012 3:38 AM EST
Isniin, May 28, 2012 (HOL) — Afhayeenka Xarakada Al-Shabaab, Sheekh C/casiis Abuu-Muscab oo la hadlay idaacadda ku hadasha afka Al-shabaab ee Andulus ayaa sheegay inuu weji cusub galay dagaalka ay kula jiraan ciidamada AMISOM iyo kuwa DKMG ah ee Soomaaliya.

5/28/2012 3:26 AM EST
Isniin, May 28, 2012 (HOL) — Wasiirka arrimaha dibadda ee dalka Turkiga, Ahmet Davutoğlu ayaa sheegay in Turkiga aysan wax dano dhaqaale iyo mid siyaasadeed ah ka lahayn Soomaaliya, sidoo kalena aysan u arag meel ay khatar weyn oo dhinaca ammaanka ah ka jirto.