11/19/2018
Today from Hiiraan Online:  _
Wararka Maanta- Jimco, May 25, 2012
Barakacayaal ku dhintay Madaafiic ku dhacay deegaannada u dhexeeya Magaalada Muqdisho iyo Degmada Afgooye


Jimco, May 25, 2012 (HOL) — Ugu yaraan shan qof oo barakacayaal ah ayaa lagu dilay madaafiic lagu garaaceen deegaannada u dhexeeya Muqdisho iyo Afgooye oo oo shalay oo dhan ay dadku ka barakacayeen.

Madaafiicdan ayaa waxay ku dhaceen gaari noociisu ahaa mini-bus oo Soomaalidu ay ku tagaanno caasi, kaasoo barakacayaal kasoo qaaday deegaanka Lafoole ee duleedka Muqdisho, iyadoo ku dhaawacmeen madaafiicdaas sagaal qof oo kale.

"Duqeyntu waxay haleeshay gaari nooca mini-bus-ka loo yaqaan ah oo ka yimid deegaanka Lafoole. Shan qof ayaa ku dhintay sagaal qof oo kalena dhaawacyo kala duwan ayaa soo gaaray," ayuu yiri Cali Muuse oo ah madaxa gaadiidka gurmadka deg-degga ah.

Ma cadda cidda duqeyntaas ka dambeysa, inkastoo dadka deegaankaas ay xuseen inay tahay madaafiic ka imaanaysay dhinaca ciidamada dowladda KMg ah iyo kuwa AMISOM ee dagaalka kala dhexeeyo Al-shabaab.

Ciidamada dowladda KMG ah iyo kuwa AMISOM oo horraantii toddobaadkan billaabay dagaal ay ugu magacdareen xoreynta Shabeellooyinka ayaa waxay kula wareegeen dhul ballaaran oo ay horay uga talin jirtay Al-shabaab.

"Waxaan la kulannay dadka ku nool deegaanka Carbiska oo 22-km u jira magaalada Muqdisho, waxaan u sheegnay inaan iyaga la dagaalamayn balse aan la dagaalayno Al-shabaab," ayuu yiri afhayeenka AMISOM, Col. Paddy Ankunda oo saxaafadda la hadlay.

Dadka deegaankaas ayaa iyaguna sheegay inay arkeen ciidamada dowladda KMG ah iyo kuwa AMISOM oo ku sugan deegaan u dhexeeya Afgooye iyo Carbiska, kuwaas oo halkaas ka sameysay dhufeysyo.

Madaafiicda lagu dilay dadka shacab ah ayaa waxay kusoo beegmaysaa xilli ay ka digtay Qaramada Midoobay in waxyeello loo geysto dadka barakacayaasha ah ee ku nool deegaannada u dhexeeya Muqdisho iyo Afgooye.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/25/2012 9:54 AM EST
Jimco, May 25, 2012 (HOL) - Wararkii ugu dambeeyay ee ka imaanaya magaalada Afgooye oo ay hareereeyeen ciidamada AMISOM iyo kuwa Soomaaliya markii ay halkaas ka baxeen Alshabaab shalay ayaa sheegaya in haatan ay magaalada gudaha u galeen ciidamada is kaashanaya.

5/25/2012 9:31 AM EST
Ergayga gaarka ah ee xogyaha guud ee qaramada midoobay u qaabilsan arrimaha Soomaaliya Agustin Mahiga ayaa sheegay in shirkii ka dhacay magaalada Addis ababa uu ahaa mid guul ku dhammaaday heshiisna laga gaaray, waxyaabihii muranka dhaliyay ee ay isku fahmi waayeen hogaamiyayaasha Soomaalida.

5/25/2012 4:44 AM EST
Jimco, May 25, 2012 (HOL) — Ugu yaraan saddex qof ayaa ku dhintay sideed qof oo kalena way ku dhaawacmeen qaraxyo xalay iyo saakay ka kala dhacay degmada Gaalkacyo ee gobolka Mudug ee Soomaaliya iyo xeryaha Qoxootiga Dhadhaab ee dalka Kenya.

5/25/2012 4:16 AM EST
Jimco, May 25, 2012 (HOL) — Maxkamadda gobolka Banaadir ayaa ku xukuntay 30-sano oo xabsi ah, Axmed Salaad Xuseen horraantii sannadkan toogasho ku dilay laba shaqaaale ah oo ka tisranaa hay'adda MSF, kuwaasoo u kala dhasay dalalka Belgium iyo Indooniiisiya.

5/25/2012 3:52 AM EST
Jimco, May 25, 2012 (HOL) — Madaxweynaha Soomaaliya, Sheekh Shariif Sheekh Axmed iyo wafdi uu hoggaaminayo ayaa xalay gaaray dalka Koonfur Afrika, halkaas oo ay kaga qaybgalyaan shir looga hadlayo minimada Qaaradda Afrika.

5/25/2012 3:11 AM EST
Jimco, May 25, 2012 (HOL) — Wararka aan saakay oo Jimco ah ka helayno degmada Afgooye ee gobolka Shabeellada hoose ayaa sheegaya in ciidamada dowladda KMG ah iyo kuwa AMISOM ay ku sugan yihiin duleedka degmadaas, xillli ay xoogaggii Al-shabaab faarujiyeen.