Dagaal Ciidamada Maamulka Gobolka Hiiraan iyo Xarakada Al-shabaab ku dhaxmaray Deegaanka Goobo ee Degmada Maxaas
Axad, May 20, 2012 (HOL) — Mas’uuliyiinta maamul gobollka Hiiraan ayaa ka warbixiyay dagaal saacadihii aynu soo dhaafnay deegaanno hoos taga degmada Maxaas ee gobollka Hiiraan gaar ahaan deegaannka Goobo ku dhaxmaray ciidamada maamulka iyo xoogagga Al-shabaab.
Guddoomiye ku-xigeenka arrimaha nabad-galyada Axmed Inji oo warbaahinta la hadllay ayaa sheegay in dagaallku bilaawday kadib markii ay ciidamo ka tirsan maamulka ku baxeen sida uu hadalka u dhigay xoogag ka tirsan Al-shabaab oo dad doonayay in ay xoolo ka qaatay dadka reer Miyiga.
"Markii ay ka war heleen arintaa iyada ah, ayeey ciidamadu ku baxeen, waxaana halkaa ka dhacay dagaall culus, waxaan dilnay 11 ka mid ah xoogagga Al-shabaab, hubkii ay ku dagaallamayeen qaar ka mid ahna waa ka furanay,’’ ayuu yiri guddoomiye ku-xigeenka arrimaha nabad-galyada maamulka gobolka Hiiraan.
Waxaa kaloo uu sheegay in ciidamada maamulka ee hadda gacanta ku haya degmada Maxaas u tagan yihiin bad-baadada dadka rayid ah gaar ahaan reer Miyiga oo soo maray ayuu yiri cadaadis adag oo kala kulmayeen xoogagii horay u maamulayay deegaannadaas.
Marka laga soo tago sheegashada dhinaca mas’uuliyiinta maamulka gobollka Hiiraan ma jiro wax war ah oo ka soo baxay saraakiisha xoogagga Al-shabaab oo ku aadan dagaallka la sheegay in labada dhinac uu ku dhaxmaray qeybo ka mid ah gobollka Hiiraan.
C/raxmaan Diini, Hiiraan Online
[email protected]
Beledweyne, Soomaaliya
