9/21/2018
Today from Hiiraan Online:  _
Wararka Maanta- Khamiis, May 17, 2012
Danjiraha UK ee Qaramada Modoobay oo sheegay in Caalamku diyaar u yahay in tallaabo laga qaado cid kasta oo is-hortaagta geeddi-socodka nabadda Soomaaliya


Khamiis, May 17, 2012 (HOL) — Hadal uu danjire Ingiriiska ee Qaramada Midoobay, Philip Parham ka jeediyay shirkii golaha ammaanka ee Ummadaha Midoobay ay kaga hadleen Soomaaliya ayaa soo jeediyay in mudnaanta koowaad la siiyo geeddi-socodka siyaasadda dalka Soomaaliya, isagoo u digay kuwa doonaya inay carqaladeeyaan geeddi-socodka nabadda.

Mr. Philip ayaa uga mahadceliyay madaxweynaha Soomaaliya, Sheekh Shariif sida uu uga hadlayo xaaladda dalka Soomaaliya xilligan aadka u adag, isagoo sidoo kale ka mahadceliyay warbixintii uu dajire Augustine Mahiga kaga hadlay arrimaha dalka Soomalaiya.

Danjiraha UN ee UN-ka ayaa wuxuu ka dalbaday madaxweynaha Soomaaliya inuu xoogga saaro laba arrimood oo kala ah: geeddi-socodka nabadda iyo ammaanka Soomaaliya.

"Arrinta mudnaanta koowaad aan siinayno waa in geeddi-socodka nabadda ee Soomaaliya uu ahaado mid ku fula waqtiga loogu talogalay oo ay ka harsan tahay saddex bilood oo keliya," ayuu yiri Philip, isagoo intaas ku daray in mas’uuliyadda ugu dambeysa ee hubinta dhameystirka xilliga KMG ay leeyihiin hoggaamiyeyaasha Soomaalida.

Wuxuu intaas ku daray in beesha caalamka ay dhaqaale ku bixinayso sidii lagu meel marin lahaa qorshahan, isagoo xusay in Ingiriiska uu Qaramada Midoobay siinayo hal milyan oo gini si ay u taageerto geeddi-socodka nabadda Soomaaliya, waxaa sidoo kale ay bixinaysaa taageero shaqaale farsamo, isagoo ugu baaqay dalalka kale inay iyaguna bixiyaan taageero la jaanqaadeysa baahiyaha ay Qaramada Midoobey soo ogaatay.

Danjiruhu wuxuu sheegay in sidoo kale geeddi-socodka nabadda Soomaaliya la siiyo dhiirrigelin ku filan, isla markaana la muujiyo in beesha caalamku ay diyaar u tahay in tallaabo laga qaado cid kasta oo isku dayda inay is-hortaagto geeddi-socodka nabadda Soomaaliya ama daciifiso.

"Waxaan soo dhoweynayaa waraaqdii ay Qaramada Midoobey, Midowga Afrika iyo IGAD ay soo saareen ee ka hadleysey kuwa suuragalka ay tahay in ay kharribaan geeddi-socodka. Waxaan mar kale xaqiijinayaa in ay UK ka go’an tahay in ay tallaabo ka qaaddo kuwa isku daya in ay kharibaan geeddi-socodka, kharibaaddaas oo ay ka mid tahay iskuday kasta oo lagu doonayo in saameyn gurracan lagu yeesho soo xulidda xubnaha Golaha Ta’siisiga.

Sidoo kale, danjiruhu wuxuu sheegay inay jiraan warar soo baxaya oo sheegaya in dadweynuhu aanay ku faraxsaneyn geeddi-socodka. Waxaan jeclahay buu yiri in aan caddeeyo in qabista fikrad ka duwan geeddi-socodka laftiisa aanay ahayn mid kharibaad ah.

"Ka biyo-diidistu ma aha wax xun – waxay tusaale u tahay sida loogu lug-leeyahay geeddi-socodka. Dood dadweynaha lala yeesho waa arrin muhiim ah oo ka mid ah dimuqraaddiyadda. Laakiin waxaa aad muhiim u ah in geeddi-socodka meel looga banneeyo kuwa ka biyo-diidsan si loo maqlo codkooda loona tixgeliyo fikirkooda iyadoo aan waddada laga leexin geeddi-socodka gebi ahaantiisaba," ayuu Danjirhuhu yiri.

Ugu dambeyn, wuxuu sheegay in Soomaaliya ay hadda geleyso waqti muhiim ah, saxiixayaasha Garoowena looga baahan yahay inay qaybtooda ka qaataan nabad kusoo celinta Soomaaliya kaddib 21-sano oo dagaal socday iyo inay wanaajiyaan nolosha kumannaan qof oo Soomaali ah iyo inay Soomaaliya kusoo ridaan waddada dib-u-soo-kabashada.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/17/2012 7:53 AM EST
Khamiis, May 17, 2012 (HOL) — Muran ku saabsan xilliga uu xilka hayanayo madaxweynaha Galmudug, Maxamed Axmed Caalin ayaa soo dhexgalay baarlamaanka maamulkaas, iyadoo guddoomiyaha iyo guddoomiye ku xigeenku ay hadallo iska soo horjeeda siiyeen saxaafadda.

5/17/2012 7:18 AM EST
Khamiis, May 17, 2012 (HOL) — Wajiga saddexaad dood-cilmiyeed looga hadlayay xiriirka ka dhaxeeya waalidka iyo macallinka ayaa maanta lagu soo gaba-gabeeyay magaalada Muqdisho, kaasoo ay kasoo qayb-galeen culumaa'udiin, macallimiin iyo waalidiin.

5/17/2012 4:38 AM EST
Khamiis, May 17, 2012 (HOL) — Diyaarad ay la socdeen wafdi uu hoggaaminayo afhayeenka baarlamaanka Soomaaliya ahna ku-simaha madaxweynaha, Shariif Xasan Sheekh Aadan ayaa goor dhaweyd ka dagtay garoonka diyaaradaha ee magaalada Baydhabo.

5/17/2012 4:25 AM EST
Khamiis, May 17, 2012 (HOL) — Gudoomiyaha Maxkamadda sare ee Milatariga Somaliland, Col.Yuusuf Faarax Sharmarke ayaa Dablay hubaysan oo weerar ku soo qaaday Ciidanka Milatariga Somaliland xukuno kala duwan ku xukuntay, ka dib markii eedihii lagu soo eedeeyey ay uu sheegay inay qirteen maxaabiistu.

5/17/2012 4:23 AM EST
Khamiis, May 17, 2012 (HOL) — Diyaarad ay leedahay shirkadda Turkish Airlines oo rakaab u soo waday Soomaaliya ayaa dib ugu laabtay magaalada Istanbuul kaddib markii ay ku degi waday garoonka diyaaradaha ee Muqdisho.

5/17/2012 4:11 AM EST
Khamiis, May 17, 2012 (HOL) — Guddiga doorashooyinka Somaliland, ayaa sameeyey maalin doorasho tijaabo ah oo ay doonayaan inay ka qiyaas qaataan qaabka ay doorashadda u qabanayaan iyo sida ay dadku u fahansan yihiin doorashadan golaha deegaanka oo ka duwan tii hore.

5/17/2012 4:09 AM EST
Khamiis, May 17, 2012 (HOL) — Booliiska Kenya ayaa sheegay in ciidamada ammaanka Kenya ay ku qabteen deegaanka Niivasha ee galbeedka Kenya nin u dhashay dalka Jarmalka oo ay ku sheegeen inuu ka tirsan yahay islaamiyiinta mayalka-adag.

5/17/2012 3:59 AM EST
Khamiis, May 17, 2012 (HOL) — Wasiirka dastuurka iyo arrimaha federaalka DKMG ah ee Soomaaliya, C/raxmaan Xoosh Jabriil ayaa sheegay inay wadahadallo kula jiraan odayaashii Puntland ee ka baxay shirka ka socda Muqdisho, si ay howshu u sii socoto.

5/17/2012 3:33 AM EST
Khamiis, May 17, 2012 (HOL) — Madaxweynaha Puntland, Cabdiraxmaan Sheekh Maxamed Faroole ayaa sheegay inaysan ku qanacsanayn dastuurka cusub ee loo sameeyay Soomaaliya, kaasoo uu sheegay inaysan ku caddeyn awoodaha maamul goboleedyada dalka.