12/8/2019
Today from Hiiraan Online:  _
Wararka Maanta- Isniin, July 9 , 2012
Jaamacadda Camuud ee Somaliland oo Sannadkan laga billaabi doono Waxbarashada sare ee Master Degree iyo PHD


Isniin, July 09, 2012 (HOL) — Jaamacadda Camuud ayaa sheegtay inay sanad Jaamacadeedkan bilaabi doonto waxbarashadda sare ee Master Degree iyo PHD, iyadoo soo bandhigtay qorshe cusub oo lagu horumarinayo jaamacadda.

Munaasibad lagu soo bandhigayey qorshaha cusub ee waxbarashadda sare ayaa lagu qabtay xarunta jaamacadaasi, waxaana kulankaasi ka soo qaybgalay wasiirka Waxbarashadda Somaliland Marwo:Samsam Cabdi Aadan, Wasiirka Cadaaladda Xuseen Axmed Caydiid, Wasiirka Caafimaadka Dr: Xuseen Xoog, Wasiirka Beeraha Prof: Faarax Geedoolle iyo maamulka sare ee jaamacadda Camuud ayaa si rasmiya loo shaaciyey inay jaamacaddu bilaabi doonto heererka kala sareeya ee waxbarashadda, kuwaas oo ay ku soo dareen Master Degree iyo PHD oo aan hore dalka uga jirin.

Gudoomiyaha Jaamacadda Camuud Prof: Saleebaan Axmed Guuleed ayaa ka waramay marxaladihii kala duwanaa ee ay jaamacadu soo martay, iyo qorshahan cusub ee tacliinta sare ee qofkii doonayaa dalkiisa hooyo ka helayo, isago sheegay in kharashkii badnaa ee dibadda kaga bix jiray u dhigmayo.

Gudoomiyaha ayaa sheegay in saddex iyo tobankii sanno ee ay shaqaynaysay ay ku talaabsatay horumar aad u balaadhan, waxaanu xusay in tacliintan sare ee Master-ka iyo  PHD-da ay ku dhiirigaliyeen jaamcado kale iyo xukuumadda Somaliland, waxaanay sheegay in sanadkan gudihiisa ay ku soo  biirinayaan waxbarashadan cusub ee aqoonta sare ah.

Wasiirka waxbarashadda iyo tacliinta sare Samsam Cabdi Aadan ayaa sheegtay  inay taageerayaan waxbarashadan cusub ee jaamacadda lagu soo kordhiyey, iyadoo uga mahadnaqday dadaalka ay ugu jiraan horumarka waxbarashadda Somaliland.

Wasiirka Cadaaladda Somaliland Xuseen Axmed Caydiid ayaa isna ugu hambalyey jaamacadda qorshahan cusub ee ay ku horumarinayso waxbarashadda dalka, isagoo sheegay inuu afartan Arday oo ka mid ah ardayda ka qalinjabinaysa sanadkan kuulyadda sharciga ay wasaaradiisu ka qaadan doonto, isla markaana ay ka hawlgali doonaan garsoorka dalka iyo cadaaladda.

Wasiirka Caafimaadka iyo Beeraha, Dr: Xuseen Xoog iyo Prof: Faarax Cilmi Geedoolle ayaa iyaguna xusay inay taageero weyn ka gaysan doonaan jaamacadda, gacan weyna ka siin doonaan caafimaadka iyo beeraha.

Sidoo kale, waxa isna dardaaran halkaasi ka soo jeediyey sheekhubaladka magaaladda Boorame Sheekh Cabdilaahi Cali Jawhar, waxaanu ku dhiirigaliyey in dhalinyarada jaamacadda ka soo qalinjabiya lagu qiimeeyo aqoontoodda iyo shahaadooyinka ay sitaan.

Heerarkan waxbarasho ee sare ee jaamacaddu bilowday ayaa noqonaysaa markii ugu horaysay oo dalka gudihiisa laga hirgaliyo waxbarashadda sare, iyagoo intoodda badan jaamacaddaha dalku ku koobnaayeen oo qudha heerka waxbarashadda koowaad ee Degree-ga kowaad, taas oo baahi weyn loo qabay.

Jaamacada Camuud ayaa ah jaamacadii ugu horaysay ee Somaliland laga hirgaliyo, kuwaas oo soo saartay dhallinyaro badan oo aqoonyahano ah, waxaanay ka kooban tahay kuulliyaddo badan oo kala duwan, iyadoo ay wax ka bartaan arday ka kala yimid deegaano kala duwan oo ah deegaamadda Soomaalidu degto oo dhan.

Waxbarashadan sare ee ay bilawdayna waxay noqonaysaa mid fursad u siinaysa dhalinyaro badan oo heerka waxbarashadda kowaad dhamaystay oo u baahnaa inay aqoontoodda kor u sii qaadaan, kuwaas oo inta badan tagi jiray dalalka Dibadda oo kharash badani kaga bixi jiray.

Sidoo kale, laba maalmood ka hor waxa jaamacadda Camuud ka qalinjabiyey tobaneeyo Dhakhaatiir ah oo muddo wax ka baranayey kuuliyadda daaweynta, kuwaas oo ku biiri doonna dhakhaatiirta dalka, maadaama oo baahi weyn loo qabo xaga dhakhaatiirta.

Barkhad-Ladiif M. Cumar, Hiiraan Online  
[email protected]
Hargeysa, Somaliland









Click here
7/9/2012 5:19 PM EST
Isniin, July 09, 2012 (HOL) Kooxda kubadda cagta ee SOMALI UNITED ayaa markii sedexaad ku guuleysatay koobkii SOMALI WEEK oo sannad kasta lagu qabto magaalada Toronto ee dalka kanada ka dib markii ay 2 iyo 1 kaga guuleystay kooxda HILAAC.

7/9/2012 3:32 PM EST
Isniin, July 09, 2012(HOL): Madaxweynaha Puntland Dr. Cabdiraxamaan Maxamed Maxamuud Faroole, ayaa maanta hortegey golaha baarlamaanka oo kalfadhigoodii 28aad uu magaalada Garoowe uga socdo. Madaxweynaha oo mudo labo bilood kudhow dalka dibadiisa safaro shaqo ugu maqnaa, wuxuu golaha uga warbixiyey waxyaabihii safaradaas uga soo qabsoomay iyo weliba halka uu marayo geedi socodka nabadda ee dalka.

7/9/2012 11:27 AM EST
General Cusmaan Faalko ayaa magaalada London kaga dhawaaqay in uu musharax u yahay tartanka doorashada madaxweyninimada dalka Soomaaliya

7/9/2012 9:11 AM EST
Isniin, July 09, 2012 (HOL) — Ciidammo Itoobiyaan ah oo wata gaadiid dagaal oo fara badan ayaa la sheegay inay maanta u dhaqaaqeen dhinaca degmada Buur-dhuubo ee gobolka Gedo, halkaasoo ay ka taliso Xarakada Al-shabaab.

7/9/2012 9:03 AM EST
Isniin, July 09, 2012 (HOL) — Ra'iisul waasaraha dowladda KMG Soomaaliya, C/weli Maxamed Cali oo maanta dib ugu soo laabtay dalka ayaa sheegay in shirkii kooxda ICG ee lagu qabtay dalka Talyaaniga looga hadlay sidii lagu taageeri lahaa DKMG ah gargaarka bani'aadamnimana loo gaarsiin lahaa goobaha laga saaray Al-shabaab.

7/9/2012 8:30 AM EST
Isniin, July 09, 2012 (HOL) — Wareegto kasoo baxday xafiiska madaxweynaha DKMG ah ee Soomaaliya, Sheekh Shariif Sheekh Axmed ayaa loogu magacaabay guddoomiyaha bankiga horumarinta ganacsiga Soomaaliya, Prof. C/llaahi Axmed Afrax.

7/9/2012 8:11 AM EST
Isniin, July 09, 2012 (HOL) — Dood-cilmiyeed looga hadlayay sida lagu xoojin karo ammaanka degmada Afgooye ayaa lagu qabtay degmadaas, gaar ahaan beerta Sheekh Zayed, kaasoo ay soo qabanqaabisay hay'adda CCD ayna ka qayb-galeen madax ka tirsan DKMG Soomaaliya, maamullada gobollada Banaadir iyo Shabeellada hoose, waxgaradka, culummo iyo shacabka degmada Afgooye.

7/9/2012 7:50 AM EST
Isniin, July 09, 2012 (HOL) — Xisbiga Hiil-Qaran oo ka mid ah asxaabta siyaasadeed ee ka jirta Soomaaliya ayaa maanta ku dhawaaqay in Prof. Axmed Ismaaciil Samatar oo ka mid ah mas'uuliyiinta xisbigaas uu yahay murashaxa uga qayb-galaya doorashada madaxnimo ee Soomaaliya oo dhacaysa bisha Ogoosto ee sannadkan.

7/9/2012 7:49 AM EST
Isniin, July 09, 2012 (HOL) — Guddoomiye ku-xigeenka arrimaha bulshada maamulka gobollka Hiiraan Max’ed Macalin Yuusuf ‘’Garabey’’ oo warbaahinta kula hadllay magaalada Baladweyne ayaa uga mahad celiyay hay’addaha ICRC iyo Save The Childaren gargaarka ay siinayaan dadka ku dhibaateysan magaalada Baladweyne iyo deegaannada hoos taga.

7/9/2012 1:30 AM EST
Isniin, July 09, 2012 (HOL) — Xarakada Al-shabaab ayaa sheegay in lawado qorshe la doonayo in dastuurka cusub uu noqdo mid u siman diimaha masiixiga iyo Islaamka iyagoo shacabka Soomaaliyeed ugu baaqay inay ka hortagaan qorshahaas.