Madaxweyne Rayaale oo safar kedis ah ugu kicitimay Jabuuti

Isniin, 23 June 2008 (HOL): Madaxweynaha Somaliland Daahir Rayaale Kaahin, ayaa maanta socdaal aan hore loo sii shaacin ugu kicitimay Dalka Jabuuti.

Sida lagu sheegay Warsaxaafadeed ka soo baxay Madaxtooyada Somaliland oo uu ku saxeexan yahay Afhayeenka Madaxtooyadu Siciid Caddaani, socdaalka Madaxweynaha ee Jabuuti ayaa ka dambeeyay marti-qaad uu ka helay Madaxweynaha Jabuuti Md. Ismaaciil Cumar Geelle, isla markaana socdaalkan Madaxweynuhu wuxuu qaadan doonaa muddo afar maalmood ah.

Warsaxaafadeedkaas oo nuqul ka mid ahi soo gaadhay HOL, waxa uu u dhignaa sidan;
"Madaxweynaha Somaliland Mudane Daahir Rayaale Kaahin , oo hogaaminaya Wefdi balaadhan oo ka tirsan Xukuumada Somaliland, ayaa maanta u amba baxay Magaalo Madaxda Jamhuuriyada Jabuuti.
Socdaalka Madaxweynaha oo qaadan doona muddo laba maalmood ah , waxa uu marti qaad rasmi ah ka helay Jamhuuriyada Jabuuti , waxana la filayaa in wada hadalo rasmi ah la yeelan doono xukuumada Jamhuuriyada Jabuuti , oo ay ka wada hadli doonaan sidii loo sii xoojin lahaa xidhiidhka labada dal ee walaalaha ah.

Wefdigaasi uu Madaxweynaha Somaliland Mudane Daahir Rayaale Kaahin hogaaminayo , waxa kale oo ka mid ahaa Marwada Koowaad ee Madaxweynaha , Wasiirada Arrimaha Dibada, Arrimaha Gudaha, Maaliyada, Wasiir xigeenka Warfaafinta, Madaxa Sirdoonka Qaranka iyo Xoghayaha gaarka ah ee Madaxweynaha."

Barkhad M. Kaariye Hiiraan Online
[email protected]
Hargeysa, Somaliland