Wefti madax dhaqameed iyo ganacsato reer Somaliland ah oo ka warbixiyey safar ay ku tageen Garoowe
Isniin, July, 16, 2018 (HOL) – Wefti iskugu jiray madax dhaqameed iyo ganacsato
reer Somaliland oo afar cisho joogay Garoowe ayaaa dib ugu soo laabtay
magaalada Hargeysa, waxaanay ka warbixiyeen ujeedadda safarkoodda oo ay ku
sheegeen mid nabadeed.
Weftigan ayaa sheegay inay ka jawaabayeen wefti
hore oo uga yimid Garoowe oo ku casuumad inay Garoowe ugu yimaadaan, waxaanay
xuseen in si wanaagsan oo walaaltinimo ah loogu soo dhoweeyey.
“guddidii uu hogaaminayey suldaan Maxamuud
Guuleed Mire oo ka kooban salaadiin, odayaal, ganacsato, dhakhaatiir iyo
aqoonyahano kale waxaa uu safarkayagu ahaa safar nabadgalyo”ayuu yidhi
afhayeenka guddidan Jamaal Caydiid Ibraahim oo ka mid ah ganacsatadda reer
Somaliland ee weftigan ka midka ahaa.
Jamaal Caydiid oo hadalka sii wata waxa uu yidhi
“Safarkan waxaa ka horeeyey safar kale oo wefti ganacsatado iyo madax dhaqameed
ka kooban nooga yimaadeen Garoowe, kuwaas oo u socday in umadda la isku soo
dhoweeyo ayey tanna jawaab u ahayd, si gobinimo leh ayey madax dhaqameedkii iyo
ganacstadiiba ay noogu soo dhoweeyeen Garoowe”.
Jamaal Caydiid waxa uu sheegay in qodobadda ay
labada dhinac isku afgarteen ay ahaayeen in la waddo geedi socodka nabadda si
loo kala badbaadiyo dhiiga walaalaha ah ee daadanaya iyo in khilaafka is fahan
lagu dhameeyo, waxa kale oo uu sheegay inay isla garteen in soomaalinimadda iyo
wada dhalashadda iyo khilaafka siyaasiga ah la kala saaro.
Waxaa kale oo uu sheegay inay isla qaateen in
wixii kala fogaynaya umadda iyo wararka aan jirin dhinac looga soo wada jeesto
iyo qodobka ugu dambeeya oo ah in maxaabiistii la isku gudbiyo si jawi
nabadgalyo u timaado.
Weftigan ayaaa sheegay in qodobadan ay kala
hadli doonaan xukuumadda Somaliland, haseyeeshe illaa hadda kama jawaabin
xukuumaddu.
Barkhad-ladiif M. Cumar, Hiiraan Online
[email protected]
Hargeysa, Somaliland.
