Dowladda Soomaaliya oo shirkad siineyn-sa malaayiin dollar si looga qaado cunaqabateynta uu Mareykanku ku soo rogay
Arbaco, August, 22, 2018 (HOL) – Dowladda Soomaaliya ayaa
ilaa dhamaadka sanadkan ku bixin doonta lacag dhan Sh40 million ($400,000) oo dollar howlgalinta shaqaaleysiinta shirkad Mareykan
ah oo lagu magacaabo Sonoran Policy Group (SPG) taa oo ka shaqeyn doonta sidii
uu Mareykanka cunaqabateynta uga qaadi lahaa ciidamada qalab-ka sida ee
Soomaaliya.
Heshiiska dhaxmaray dowladda
Soomaaliya iyo shirkadda waxaa horaantii bishan kala saxiixday Danjiraha
dowladda Soomaaliya ee Qaramada Midoobey Abuukar Cismaan iyo Ninka lagu
magacaabo Christian Bourge, agaasimaha shirkadda.
Ma’aha oo kaliya waxyaabaha ay
shirkadda-ni u xil saaran tahay qaadista cunaqabateynta ciidamada qalabka sida
ee Soomaaliya ee xitaa waxaa ay ka shaqeyn doontaa sidii uu maamulka madaxweyne
Trump uu xayiraada uga qaadi lahaa Soomaalida doonaya in ay gallaan dalka
Mareykan-ka, madaama ay Soomaaliya ka mid tahay dalal horay looga mamnuucay in
dadkoodu u soo socdaalaan dalka Mareykanka.
Sanadkii hore ayuu ahaa markii
uu Mareykanku ku dhawaaqay in uu joojiyay dhaqaalihii iyo sahaydii uu ku
kaalmeyn jiray ciidamada xoogga dalka Soomaaliyeed kaddib markii ay ka
war-heleen in kaalmadaasi loo maamulay si aan habooneyn [La musuq-maasuqay]
Heshiiska ayaa sidoo kale
waxaa ku jira in shirkaddu ka shaqeyso islamaraana u fududeyso madaxweynaha
dowladda Soomaaliya Maxamed Cabdullaahi Farmaajo booqasho la xiriirta arrimahan in uu ku tago mustaqbalka Mareykanka.
Bil walba dowladda Soomaaliya
ayaa shirkadda siin doonta lacag dhan Sh10, million ($100,000) , iyadoo shirkadda looga
fadhiyo wanaajinta sawirka guud waqtigan laga heysto Soomaaliya dhinaca
Mareykanka.
Sidoo kale shirkadda ayaa
mustaqbalka u ololeyn doonta sidii Soomaaliya looga cafin lahaa deymaha lagu
leeyahay iyadoo arintan kala hadli doonta World Bank iyo hay’adda lacagta
aduunka ee IMF.
C/raxmaan Diini, Hiiraan
Online
[email protected]
