Soomaalida Cumaan iyo Ardayda Cumaan ee MN oo xusay sanadguuradii 46aad ee dalkaas xornimadiisa

Arbaco, Nofeembar 23, 2016 (HOL)- Jaaliyadda Soomaaliyeed ee gobolka Minnesota oo kaashaneysa Ururka Ardayda dalka Cumaan ayaa u dabbaaldagay 46-guurada maalinta xorriyadda dalkaas oo loo yaqaan National Day Celebration, taasoo sanad kasta lagu qabto meelo badan oo caalamka ka tirsan.

C/xafiid Ibraahim Siciid oo ka mid ah Soomaalida asal ahaan kasoojeeda dalkaas, kana tirsan xubnihii soo qabanqaabiyay xafladan ayaa sheegay in dalka Cumaan uu saaxiib la yahay dalka Soomaaliya, isagoo sheegay in xiriirka labada dal uu yahay mid wanaagsan, taasoo keentay in marar badan ay caawimaad u fidiyeen dadka Soomaaliyeed ee abaaraha iyo colaaduhu saameeyeen.

"Aad iyo aad ayaan ugu faraxsannahay inaan xusno maalinta qiimaha weyn ugu fadhisa shacabka Cumaan iyo shacabka Soomaaliyeed" ayuu yiri C/xafiid oo intaas ku daray "Waxaan hoggaamiyaha Saldanadda Cumaan Suldaan Qaaboos u gudbineynaa salaan iyo hamblyo".

Wuxuu  C/xafiid sheegay in dhinaca kale ardayda iyo jaaliyada dalka Cumaan ay aad ugu faraxsan yihiin kunoolaashaha gobolka Soomaalidu u badantahay ee Minnesota, isagoo sheegay inay dadka Soomaaliyeed ee kunool Saldanada Cumaan ay kuheystaan sharaf iyo xorriyad, ayna la mid yihiin muwaadiniinta dalkaas.

Waxaa sanad kasta x afladaanabaabulkeeda kaalin wayn kaqaata Ganacsadde Zaki Ahmed Albakri oo kamida jaaliyadda Soomaali /Cumaan oo waqti dheer daganaa gobolka Minnesota. 

Cabdi Warsame oo ah guddoomiyaha degmada 6-aad ee magaaladda Minneapolis, kana mid ah golaha deegaanka ayaa sheegay inay aad u soo dhaweynayaan jaaliyadda Cumaan, islamarkaana ay la qeybsanayaan farxadda iyo damaashaadka xorriyada dalkaas.

"Waxaan maanta qoray qaraar kusaabsan in la dhaleeceeyo, isla markaana magaaladda Minneapolis aysan u dulqaadan doonin Islaam-naceybka iyo cunsurinimada, waxaana kufaraxsanahay inaad dhaqankiina iyo diintiina kufaaneysaan, waxaadna tihiin safiirrada dallkiina iyo dhaqankiina ma talaya, waxaana idinku soo dhaweynayaa magaaladdan aan jecelnahay" ayuu yiri Cabdi Warsame.

Caasho Cabdow Maleyka oo ka mid ah fannaaniinta waaweyn ee Soomaaliyeed ayaa sidoo kale heeso Carabi ah oo ay ku ammaaneysay dalka iyo dadka Cumaan waxay kusoo bandhigtay xalafladdaa. 

Ururuka Ardayda ayaa xafladda waxay iyaguna kusoo bandhigeen ciyaaraha hidaha iyo dhaqanka dalkaas, taasoo soo jiidatay dadkii kasooqeyb galay.

Siyad Said Salah
Hiiraan Online
[email protected]
Minneapolis, MN