3/29/2024
Today from Hiiraan Online:  _
Wararka Maanta- Arbaco, Aug 7 , 2013
Dowladda Soomaaliya oo deeqo waxbarasho oo ay ka heshay dalka Yemen qayb ka siisay Somaliland iyo Puntland

Arbaco, August 07, 2013 (HOL) — Wasiirka horumarinta adeegga bulshada Xukuumada Soomaaliya, Maryan Qaasim Axmed ayaa maanta oo Arbaco ah ku dhawaaqday in dowladda Soomaaliya ay ka heshay dalka Yemen deeqo waxbarasho jaamacadeed ah, kuwaasoo tiradoodu tahay 100, kuwasoo kala ah waxbarashada sare iyo shahaadaha koowaad ee Bachelor-ka.

Maryan Qaasim ayaa sheegay in wasaaradd ay sameyay guddi ka kooban sagaal qof oo ka madax-bannaan kuwaasoo loo xilsaaray inay imtixaanaad ka qaadaan ardayda doonaysa inay ka faa’iideystaan deeqdaas waxbarasho, iyadoo sheegtay in guddigan uu yahay mid lagu kalsoon yahay.

“Deeqda waxbarsho ee aan Yemen ka helnay oo 100 kursi, waa kuwo ku siman oo keliya waxbarashada, ardayguna uu iska bixinayo nooligiisa. 10 ka mid ah waa waxbarashada sare, 90-ka kalena waa waxbarshada shahaadada koowaad, 20 ka mid ah waxaan siinnay inay ardayda Soomaaliyeed ee wax ka barta dalka Yemen, 12 waxaan ugu deeqnay ardayda ku nool Somaliland, halka 13 aan siinnay arday Puntland, 45-ka kursi ee kalena ardayda kale ee Soomaaliyeed ayay ka dhexeysaa,” ayay wasiiraddu ku tiri shir jaraa’id oo ay maanta qabatay.

Sidoo kale, wasiiraddu waxay xustay in is-diiwaangelinta ardayda doonaysa inay kafaa’iideystaan waxbarashadan ay billaabanayso maalinta Sabtida ah ee soo socota, iyagoo iska qori doona waaxda agaasinta waxbarashada ee wasaaradda horumarinta adeegga bulshada.

“Waxaan rajeynayaa in deeqdan waxbarasho ardayda kusoo baxa ay aadi doonaan dalka Yemen si ay wax u bartaan,” ayay tiri wasiiradda oo aan sheegin kulliyada ay ka kooban yihiin deeqahan waxbarasho.

Dhanka kale, agaasimaha waaxda waxbarashada wasaaradda horumarinta adeegga bulshada, Maxamed Cabdiqaadir Nuur ayaa isaguna wuxuu sheegay in gudigga loo saaray maamulidda deeqaha waxbarasho uu yahay mid lagu kalsoonyahay, isla markaana aysan jiri doonin wax is-damarin ku saabsan deeqdan waxbarasho.

Ugu dambeyn, wasiirrada ayaa sheegtay in deeqdan waxbarasho ay qayb ka tahay horumarinta aqoonta bulshada Soomaaliyeed, iyadoo sheegtay inay si aad ah uga mahadcelinayaan dalka Yemen deeqdan uu siiyay shacabka iyo dowladda Soomaaliya.

Waa markii ugu horreysay oo wasaaradda horumarinta adeegga bulshada ay ku dhawaaqdo in deeq waxbarasho ah ay ka heshay dalka Yemen, waxaana horay deeqo waxbarasho oo noocan oo kale ah u siin jiray ardayda Somalia dalalka Turkiga iyo Suudaan.

Maxamed Maaji Xuseen, Hiiraan Online
[email protected]
Muqdisho, Soomaaliya













Click here
8/7/2013 3:32 PM EST
Arbaco, August 07, 2013 (HOL) — Xukuumadda Soomaaliya ayaa caawa ku dhawaaqay inay maalinta berri ah tahay ciid, waxaana hambalyo ku aaddan ciidda u diray shacabka Soomaaliyeed ra’iisul Soomaaliya, Cabdi Faarax Shirdoon Saacid.

8/7/2013 10:01 AM EST
Arbaco, August 07, 2013 (HOL) — Hay’adda gargaarka bani’aadmanimo ee Afrika (HARO) ayaa gargaar raashin ah oo loogu talo-galay sakaatul fidriga ka qaybisay degmada Wadajir ee gobolka Banaadir iyo magaalada Kismaayo ee gobolka Jubbada Hoos, iyadoo loo qaybiyay dad dan-yar oo ay ku jireen kuwo indhoolayaal ah.

8/7/2013 8:47 AM EST
Arbaco, August 07, 2013 (HOL) — Bannaanbax looga horjeedo go’aankii uu ku gaaray bankiga Barclays inuu joojiyo adeegyadii uu u qaban jiray xawaaladaha Soomaalida ayaa maanta ka dhacay magaalada London, gaar ahaan afaafka hore ee xafiiska ra’iisul wasaaraha Britain, David Cameron.

8/7/2013 8:17 AM EST
Arbaco, August 07, 2013 (HOL) — Dabley hubeysan ayaa xalay ku gubey inta u dhexeysa magaalada Boosaaso iyo tuulada Kala-bayr labo gaari oo nooca xamuulka qaada ee ay Soomaalidu (Candho-meydlaha) u taqaan ah.

8/7/2013 8:16 AM EST
Arbaco, August 07, 2013 (HOL) — Magaalada Muqdisho ayaa waxaa lagu qabtay munaasabad lagu xusayay sannadkii laabad ee kasoo wareegay markii la aasaasay xisbiga DADKA Soomaaliyeed oo ka mid ah xisbiyadii siyaasadeed ee ka qaybgalay doorashadii madaxnimo ee Soomaaliya.

8/7/2013 8:10 AM EST
Arbaco, August 07, 2013 (HOL) — Iyadoo ay maalin keliya ka harsan tahay munaasabaddii Iidul Fidriga ayaa waxaa suuqa weyn ee magaalada Boosaaso laga dareemayaa dhaqdhaqaaq ganacsi oo xooggan.

8/7/2013 4:57 AM EST
Arbaco, August 07, 2013(HOL) :- Xoogagga Al-shabaab ayaa dagaal xooggan ku qaaday degmada Afmadow ee gobolka Jubbada hoose, iyadoona dagaalkaasi uu sababay khasaarooyin lixaad leh oo kala gaaray dhinacyadii dagaalamay.

8/7/2013 4:01 AM EST
Arbaco, August 07, 2013 (HOL) — Xukuumadda Kenya ayaa shuruud ku xirtay wareejinta garoonka diyaaradaha iyo dekedda magaalada Kismaayo ee xarunta goblka Jubbada Hoose, iyadoo dhawaan ay madaxda dalalka ay ciidamadu ka joogaan Somnalia ay kasoo saareen shir ay ku yeesheen Kampala in maamulka garoonka iyo dekedda Kismaayo lagu wareejiyo dowladda Soomaaliya.

8/7/2013 2:52 AM EST
Arbaco, August 07, 2013 (HOL) — Deeq lacageed oo gaareysa 1,440 dollar ayaa la gaarsiiyay bukaannada ku jira isbitaalka guud ee magaalada Laascaanood ee xarunta gobolka Sool.

8/7/2013 2:41 AM EST
Arbaco, August 07, 2013 (HOL) — Xilli ay muddo yari ka harsan tahay munaasabaddii Iidul Fidriga ayaa waxaa magaalooyinka waaweyn ee Puntland ka bilowday howlagallo ay ciidamada Boolisku ammaanka si weyn ugu adkeynayaan.

8/7/2013 2:17 AM EST
Arbaco, August 07, 2013 (HOL) — Dab weyn oo aan la ogeyn wixii sababay ayaa saakay oo Arbaco ah ka kacay garoonka diyaaradaha Jommo Kenyata ee magaalada Nairobi, taasoo keentay in garoonka la xiro tan iyo inta amar kale laga soo saarayo.